ފުރަތަމަ ކުއާޓާގައި ޑޮލަރުން ލިބުނު އާމްދަނީ %12 މައްޗަށް

ފާއިތުވި އަހަރުގެ ފުރަތަމަ ކުއާޓާއާ އަޅާބަލާއިރު މި އަހަރުގެ ފުރަތަމަ ކުއާޓާގައި ޑޮލަރުން ލިބުނު އާމްދަނީ 12.2 އިންސައްތަ އިތުރުވެއްޖެ އެވެ. 

މީރާއިން އާންމުކޮށްފައިވާ ފުރަތަމަ ކުއާޓާގެ އާމްދަނީގެ ހިސާބުތަކަށް ބަލާއިރު މި އަހަރުގެ ފުރަތަމަ ކުއާޓާގައި އާމްދަނީގެ ގޮތުގައި ޖުމްލަ 8.89 ބިލިއަން ރުފިޔާ މީރާއިން ޖަމާކޮށްފައިވެ އެވެ. އެއީ ފާއިތުވި އަހަރުގެ ފުރަތަމަ ކުއާޓާއަށްވުރެ 21.3 އިންސައްތަ އިތުރު އަދަދެކެވެ. އަދި މި އަހަރުގެ ފުރަތަމަ ކުއާޓާގައި ލިބޭނެކަމަށް އަންދާޒާކުރި އާމްދަނީއަށްވުރެ 21.4 އިންސައްތަ އިތުރު މިންވަރެކެވެ. 

ފުރަަތަމަ ކުއާޓާގައި ލިބުނު އާމްދަނީގެ ތެރެއިން 56 އިންސައްތައަކީ ޑޮލަރުން ލިބުނު އާމްދަނީ އެވެ. އެއީ 324.63 މިލިއަން ޑޮލަރު ނުވަތަ 4.98 ބިލިއަން ރުފިޔާ އެވެ. ޑޮލަރުން ލިބުނު އާމްދަނީ އިތުރުވީ ޓީޖީއެސްޓީގެ ގޮތުގައި ޑޮލަރުން ލިބުނު އާމްދަނީއާއި ވިޔަފާރީގެ އާމްދަނީން ނަގާ ޓެކުހުގެ ގޮތުގައި ޑޮލަރުން ލިބުނު އާމްދަނީ އިތުރުވުމުންނެވެ. 

ޑޮލަރުން ލިބުނު އާމްދަނީގެ އެންމެ ބޮޑު ބަޔަކީ ޓީޖީއެސްޓީގެ ގޮތުގައި ލިބުނު އާމްދަނީ އެވެ. ޑޮލަރުން ލިބުނު އާމްދަނީގެ 65.5 އިންސައްތައަކީ ޓީޖީއެސްޓީގެ ގޮތުގައި ލިބުނު ފައިސާ އެވެ. އަދި ޓުއަރިޒަމަށް ދޫކޮށްފައިވާ ބިމުގެ ކުލީގެ ގޮތުގައި ލިބުނު ފައިސާއަކީ ޑޮލަރުން ލިބުނު އާމްދަނީގެ 9.8 އިންސައްތަ އެވެ. 

ފުރަތަމަ ކުއާޓާގައި ދިވެހި ރުފިޔާއިން އާމްދަނީގެ ގޮތުގައި 3.92 ބިލިއަން ރުފިޔާ ލިބުނެވެ. އެއީ ޖުމްލަ އާމްދަނީގެ 44 އިންސައްތަ ކަމަށް މީރާގެ ރިޕޯޓުގައި ބުނެފައިވެ އެވެ. 

ނިމުނު އަހަރުގެ ފުރަތަމަ ކުއާޓާއަށްވުރެ މި އަހަރުގެ ފުރަތަމަ ކުއާޓާގައި ޓެކުހުން ލިބުނު އާމްދަނީވަނީ 20.7 އިންސައްތަ އިތުރުވެފަ އެވެ. ފުރަތަމަ ކުއާޓާގައި ލިބުނު އާމްދަނީގެ 87 އިންސައްތައަކީ ޓެކުހުން ލިބުނު އާމްދަނީ އެވެ. ޓެކުހުގެ ގޮތުގައި 7.70 ބިލިއަން ރުފިޔާ ފުރަތަމަ ކުއާޓާގައި ލިބުނެވެ. 

ޓެކުސް ނޫން އާމްދަނީގެ ގޮތުގައި 1.19 ބިލިއަން ރުފިޔާ ފުރަތަމަ ކުއާޓާގައި ލިބިފައިވެ އެވެ. އެއީ ފާއިތުވި އަހަރުގެ ފުރަތަމަ ކުއާޓާގައި ޓެކުސް ނޫން ގޮތްގޮތުން ލިބުނު އާމްދަނީއަށްވުރެ 25.3 އިންސައްތަ އިތުރު އަދަދެކެވެ.