އީދު ދުވަހުގައި އުޅަނދު ދުއްވުން މަނާކޮށްފައިވާ ވަގުތުގައި އުޅަނދު ދުއްވައިގެން ޖޫރިމަނާކޮށްފައިވަނީ ޖުމްލަ 43 މީހުންނެވެ.
އަޟްހާ އީދު ދުވަހުގައި މާލޭ ސަރަހައްދުގައި އެއްގަމު އުޅަނދު ދުއްވުން މަނާކުރި ވަގުތުގައި އުޅަނދު ދުއްވައިގެން 43 މީހަކަށް ފިޔަވަޅު އަޅައިފި ކަމަށް ފުލުހުން ބުނެފި އެވެ.
މީޑިއާއަށް މައުލޫމާތު ދެއްވަމުން ފުލުހުންގެ ތަރުޖަމާން އަހުމަދު ޝިފާނު ވިދާޅުވެފައިވަނީ ޓްރާންސްޕޯޓު މިނިސްޓްރީގެ އެންގުމާ ހިލާފަށް އެއްގަމު އުޅަަނދު ދުއްވައިގެން މާލެއިން ފިޔަވަޅު އަޅާފައިވަނީ 3 މީހުންނަށް ކަމަށެވެ.
އޭނާ އިތުރަށް ވިދާޅުވީ މިނިސްޓްރީގެ އެންގުމާ ހިލާފުވެގެން ހުޅުމާލެއިން 27 މީހުން އަދި ހުޅުމާލޭ ފޭސް 2 އިން 13 މީހުންނަށް ފިޔަވަޅުއަޅާފައިވާ ކަމަށެވެ.
ޖުމްލަކޮށް އީދު ދުވަހުގައި އުޅަނދު ދުއްވުން މަނާކޮށްފައިވާ ވަގުތުގައި އުޅަނދު ދުއްވައިގެން ޖޫރިމަނާކޮށްފައިވަނީ 43 މީހުންނެވެ.
އީދު ދުވަހުގެ ހަވީރު 4:00 އިން 6:00 އަށް މާލެއާއި ވިލިމާލެ އަދި ހުޅުމާލޭގެ ހުރިހާ މަގެއްގައި އުޅަނދުތައް ދުއްވުން އޮތީ މަނާކޮށްފަ އެވެ.
ކޮންމެ އީދު ދުވަހެއްގައިވެސް ހަވީރު ވަގުތުގައި ވެހިކަލު ދުއްވުން މަނާކުރަނީ އާއިލާއާއެކު ކުޑަކުދިންނާއި ބޮޑެތި މީހުންނަށްވެސް އީދު އެންމެ ފުރިހަމަ ގޮތުގައި ފާހަގަކުރުމުގެ މަގު ފަހިކޮށްދިނުމަށެވެ.