އާންމުންނަށް އުނދަގޫވާގޮތަށް ޕާކުކޮށްފައި ހުރި 163 އުޅަނދު ޓޯކޮށްފި

މަގުތަކާއި އާންމު ދަތުފަތުރަށް އުނދަގޫވާ ގޮތަށް މާލޭގެ މަގުތަކުގައި ޕާކުކޮށްފައި ހުރި 163 އުޅަނދެއް ފުލުހުން ނަގައިފި އެވެ. 

ފުލުހުން ބުނީ ބުރާސްފަތި އަދި ހުކުރު ދުވަހު އެކަނި މާލޭގެ އެކި ސަރަހައްދުތަކުން ގިނަ އަދަދަކަށް އުޅަނދު ޓޯކޮށްގެން ފުލުހުންގެ ބެލުމުގެ ދަށަށް ގެންގޮސްފައިވާކަމަށެވެ. މި ހުރިހާ އުޅަނދަކީ ވެސް އާންމު ދަތުރުފަތުރަށް އުނދަގޫވާ ގޮތަށް ޕާކުކޮށްފައި ހުރެގެން ޓޯކުރި ތަކެތިކަމަށް ފުލުހުން ބުނެ އެވެ. 

އެގޮތުން ބޮޑުތަކުރުފާނު މަގު، ކަޅުތުއްކަލާ ކޮއްޓާ ހިސާބުން ފެށިގެން މާލޭ ފަތާ ޓްރެކާ ހަމައަށް މަގުގެ ދެކައިރި ހުސްކޮށް 84 އުޅަނދެއް ފުލުހުން ޓޯކުރި އެވެ.

 އަދި އަމީނީ މަގުގެ، ދަރުބާރުގެއިން ފެށިގެން އައިޖީއެމްއެޗްއާ ހަމައަށް، އަދި ސެނެހިޔާއިން ފެށިގެން މާގިރި ހޮޓެލާ ދެމެދުގައި މިގޮތަށް ޕާކުކޮށްފައި ހުރި އުޅަނދުތައް ވެސް ފުލުހުން ނެގި އެވެ. އިއްޒުއްދީން މަގުން ޓޯކުރި ރަޖިސްޓްރީ ނެތް އުޅަނދަކާ އެކު 79 އުޅަނދެއް މި ސަރަހައްދުތަކުން ފުލުހުން ނެގި އެވެ.

އެއްގަމު އުޅަނދުތަކުގައި ސްޓިކާ ޖެހުން ހުއްޓާލުމާ އެކު، މަގުތަކުގައި ގަވައިދާ ހިލާފަށް ޕާކުކުރުން އަނެއްކާވެސް އޮތީ ބޮއްސުންލައިގެން ގޮސްފަ އެވެ. ޕާކު ކުރާ އިރު، އާންމު ދަތުރުފަތުރަާއި ހިނގާ މީހުންނަށް އުނދަގޫ ނުވާނޭހެން ވެހިކަލްތައް ބެހެއްޓުމަށް ފުލުހުން އަބަދުވެސް އިލްތިމާސްކުރެ އެވެ.