ސަރުކާރުގެ ރިކަރަންޓު ހަރަދުތައް ނިމުނު އަހަރަށްވުރެ 5 އިންސައްތަ އިތުރުވެއްޖެ

ފާއިތުވި އަހަރާ އަޅާބަލާއިރު މި އަހަރު ސަރުކާރުގެ ރިކަރަންޓު ހަރަދުތައް 4.6 އިންސައްތައިން އިތުރުވެފައިވާކަން ހާމަވެއްޖެ އެވެ. 

ފިނޭންސް މިނިސްޓްރީން ހަފުތާއަކު އެއްފަހަރު އާންމުކުރާ ދައުލަތުގެ ހަރަދުތަކާއި އާމްދަނީގެ ހިސާބުތަކަށް ބަލާއިރު މި އަހަރުގެ ޖަނަވަރީ އެއްވަނަ ދުވަހުން ޖޫން މަހުގެ ހަވަނަ ދުވަހުގެ ނިޔަލަށް ރިކަރަންޓު ހަރަދުގެ ގޮތުގައި ހޭދަކޮށްފައިވަނީ 14.1 ބިލިއަން ރުފިޔާ އެވެ. ފާއިތުވި އަހަރުގެ އެ މުއްދަތުގައި ހަރަދުކުރީ 13.5 ބިލިއަން ރުފިޔާ އެވެ. 

އެހެންކަމުން ފާއިތުވި އަހަރުގެ އެ މުއްދަތުގައި ރިކަރަންޓު ހަރަދުތަކަށް ހޭދަކުރި މިންވަރަށްވުރެ މި އަހަރު ރިކަރަންޓު ހަރަދުތަކަށް ހޭދަކުރި މިންވަރު 4.5 އިންސައްތަ އިތުރެވެ. އެއީ ނިމުނު އަހަރަށްވުރެ ގާތްގަނޑަކަށް 627 މިލިއަން ރުފިޔާ އިތުރު އަދަދެކެވެ. 

ރިކަރަންޓު ހަރަދުތައް ބެހިފައިވާ ގޮތަށް ބަލާއިރު އެންމެ ބޮޑަށް އިތުރުވެފައިވަނީ މުސާރައާއި އިނާޔަތްތަކަށް ކުރި ހަރަދެވެ. މި އަހަރުގެ ޖޫން ހަވަނަ ދުވަހުގެ ނިޔަލަށް މުސާރައާއި އިނާޔަތްތަކާއި ޕެންޝަނަށް ހަރަދުކުރީ 5.5 ބިލިއަން ރުފިޔާ އެވެ. މިދިޔަ އަހަރުގެ އެ މުއްދަތުގައި ހަރަދުކުރީ 4.9 ބިލިއަން ރުފިޔާ އެވެ. 

މި ހިސާބުތަކަށް ބަލާއިރު މުސާރައާއި އިނާޔަތްތަކާއި ޕެންޝަނަށް ކުރި ހަރަދު ފާއިތުވި އަހަރާ އަޅާބަލާއިރު 12.2 އިންސައްތައިން އިތުރުވެފައިވެ އެވެ. އެއީ ގާތްގަނޑަކަށް 552 މިލިއަން ރުފިޔާގެ އިތުރުވުމެކެވެ.

މުސާރައާއި އިނާޔަތްތަކަށް ކުރި ހަރަދުގެ އިތުރަށް ހިންގުމުގެ ހަރަދުތައްވެސް ފާއިތުވި އަހަރަށްވުރެ އިތުރުވެފައިވެ އެވެ. އެގޮތުން މި އަހަރު 8.5 ބިލިއަން ރުފިޔާ ހިންގުމުގެ ހަރަދުތަކަށް ހޭދަވިއިރު ފާއިތުވި އަހަރުގެ އެ މުއްދަތުގައި ހޭދަވީ 8.3 ބިލިއަން ރުފިޔާ އެވެ.