ފަސް އަހަރުގެ ލެޖިސްލެޓިވް އެޖެންޑާ ރައީސުލްޖުމްހޫރިއްޔާ ނިންމަވައިފި

މި ވެރިކަމުގެ ފަސް އަހަރު ދުވަހުގެ ދައުރުގައި ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހަޅަން ގަސްދުކުރާ ބިލުތައް އެކުލެވޭ "ސަރުކާރުގެ ލެޖިސްލެޓިވް އެޖެންޑާ 2023-2028" ކަނޑައެޅިފައިވާ ތާވަލާ އެއްގޮތަށް ކުރިއަށް ގެންދެވުމަށް ވަޒީރުންގެ މަޖިލީހުގެ ލަފާފުޅާ އެކު ރައީސުލްޖުމްހޫރިއްޔާ ޑޮކްޓަރު މުހައްމަދު މުއިއްޒު ނިންމަވައިފި އެވެ.

ރައީސުލްޖުމްހޫރިއްޔާ މިގޮތަށް ނިންމެވީ މިއަދު ރައީސުލްޖުމްހޫރިއްޔާގެ އޮފީހުގައި ކުރިއަށްދިޔަ ވަޒީރުންގެ މަޖިލީހުގެ ބައްދަލުވުމުގައި އެޓާނީ ޖެނެރަލްގެ އޮފީހުން ހުށަހެޅުއްވި ކަރުދާހުގެ މައްޗަށް ވަޒީރުންގެ މެދުގައި މަޝްވަރާ ކުރެއްވުމަށް ފަހުގައެވެ.

ސަރުކާރުގެ ލެޖިސްލެޓިވް އެޖެންޑާ އަކީ އެއިރެއްގައި ވެރިކަމަށް އަންނަ ސަރުކާރަކުން އެ ސަރުކާރުގެ ފަސް އަހަރު ދުވަހުގެ ދައުރުގައި ފުރިހަމަ ކުރާނެ ކަމަށް ބަޔާންކޮށްފައިވާ ވައުދުތަކާއި ކުރިއަށް ގެންދަން ނިންމާފައިވާ އިސްލާހީ މަސައްކަތްތަކާ ގުޅިގެން އަދި ދައުލަތް ހިންގުން ހަރުދަނާ ކުރުމަށާއި ގައުމާއި ރައްޔިތުންގެ ރައްކާތެރިކަމާއި ކުރިއެރުމަށްޓަކައި އެންމެ އިސްކަމެއްދީގެން ތައާރުފު ކުރަން ނިންމާ ގާނޫނުތަކާ ގުޅޭ ބިލުތައް އަންގައިދޭ އެޖެންޑާ އެކެވެ.

ލެޖިސްލެޓިވް އެޖެންޑާގައި 15 މައުލޫއު އަކާ ގުޅޭ ޖުމްލަ 213 ބިލެއް އެކުލެވިގެންވެ އެވެ. އޭގެތެރޭ ގައި މުޅިން އަލަށް އެކުލަވާލަން ޖެހޭ 78 ގާނޫނަކާގުޅޭ ބިލާއި މިހާރު އަމަލުކުރެވޭ ގާނޫނުތަކުގެ ތެރެއިން އިސްލާހު ގެންނަންޖެހޭ ނުވަތަ އުވާލަން ޖެހޭ ގާނޫނުތަކަށް އިސްލާހު ގެނައުމަށްޓަކައި ހުށަހަޅަން ގަސްދުކުރާ 135 ބިލެއް ހިމެނެ އެވެ.

އެޖެންޑާގައި ހިމެނޭނީ މައިގަނޑު ގޮތެއްގައި ހަ ދާއިރާއެއްގެ ބިލުތަކެވެ. އެއީ؛ 

ލެޖިސްލޭޓިވް އެޖެންޑާގައި ހިމެނޭ ބިލުތަކުގެ ތެރޭގައި ދުސްތޫރީ އަދި ގާނޫނީ ކަންކަމާ ގުޅޭ 15 ބިލަކާއި ދައުލަތް ހިންގުމާ ގުޅުންހުރި 9 ބިލަކާއި، ހައްގުތަކާއި މިނިވަންކަމާ ގުޅުންހުރި 8 ބިލާއި، އިސްލާމްދީނާއި ގައުމިއްޔަތާ ގުޅުންހުރި 8 ބިލާއި، ގައުމީ ސަލާމަތާއި ހާރިޖީ ގުޅުންތަކާ ބެހޭ 15 ބިލާއި، ސިއްހަތާއި ދުޅަހެޔޮކަމާ ގުޅުންހުރި 11 ބިލެއް ހިމެނެ އެވެ. 

އޭގެ އިތުރަށް ކޮރަޕްޝަނާއި ކުށްކުރުން ހުއްޓުވުމާ ގުޅޭ 22 ބިލަކާއި އާއިލާއާ މުޖުތަމައާ ގުޅުންހުރި 20 ބިލަކާއި، ފައިސާއާއި މާލީ ކަަންކަމާ ގުޅުންހުރި 22 ބިލެއް ހިމެނެ އެވެ. އަދި ޒަމާނާ ނުގުޅޭތީ އުވައިލަން ނުވަތަ އިސްލާހުކރުަންޖެހޭ ގާނޫނުތަކާ ގުޅޭ 26 ބިލެއް ލެޖިސްލޭޓިވް އެޖެންޑާގައި ހިމެނެ އެވެ. އަދި ވިޔަފާރިއާއި އިގުތިސާދުގެ ދާއިރާގެ 22 ބިލެއް ހުށަހަޅަން ހިމެނިފައިވެ އެވެ.

ވިހިވަނަ ރއްޔިތުންގެ މަޖިލީހުގެ ފުރަތަމަ ދައުރަށް ސަރުކާރުގެ ފަރާތުންވަނީ 37 ބިލެއް ހުށަހަޅާފަ އެވެ. އުޝާމު ވިދާޅުވި ގޮތުގައި އެ ބިލުތަކުގެ ތެރެއިން ތިން ބިލަކީ ލެޖިސްލޭޓިވް އެޖެންޑާގައި ހިމެނޭ ބިލުތަކެވެ.