ހާއްސަ މެހެމާނުންގެ ގޮތުގައި ފަލަސްތީނުގެ 500 ހައްޖުވެރިން މައްކާއަށް

ފަލަސްތީނުގައި ހިނގަމުންދާ ހަނގުރާމައިގައި ޒަހަމްވި މީހުނާއި ޝަހީދުވި މީހުންގެ އާއިލާތަކަށް ސައުދީ ސަރުކާރުން ދޭ ހައްޖު ދަތުރުގެ ތެރެއިން ފަލަސްތީނުގެ 500 މީހަކު މައްކާއަށް ގެންގޮސްފި އެވެ.

ސައުދީ ރަސްގެފާނުގެ އެންގެވުމަށް ކުރިއަށް ގެންދާ "ގެސްޓް ޕްރޮގްރާމް ފޯ ހައްޖު އެންޑް އުމްރާ" ގެ ދަށުން ބުރާސްފަތި ދުވަހު ފަލަސްތީނުގެ އިތުރު 2،000 ހައްޖުވެރިން މައްކާއަށް ދާން ވެސް ވަނީ ހަމަޖައްސާފަ އެވެ. 

މި ޕްރޮގްރާމުގެ ތެރެއިން ހައްޖުގެ އަޅުކަން އަދާ ކުރުމުގެ ފުރުސަތު ފަހިކޮށްދިން ކަމަށްޓަކައި ސައުދީ ސަރުކާރަށް ފަލަސްތީން ހައްޖުވެރިން ވަނީ ޝުކުރު އަދާކުރާ ކޮށްފަ އެވެ.

މި އަހަރުގެ ޕްރޮގްރާމުގައި ދުނިޔޭގެ 88 ގައުމަކުން 3،322 މީހުން ހައްޖަށް ގެންދާނެ އެވެ. 

ދުނިޔޭގެ އެކި ގައުމުތަކަށް ހާއްސަކޮށް ސަލްމާން ރަސްގެފާނު ވަނީ ޚާއްސަ ޕްރޮގްރާމެއް އެކުލަވާލައްވައިފަ އެވެ. މި ޕްރޮގްރާމް އިންތިޒާމުކޮށް ހިންގަނީ ސައުދީގެ ހައްޖު މިނިސްޓްރީންނެވެ. މި ޕްރޮގްރާމް ފެށި ފަހުން މިހާތަނަށް އެކި ގައުމުތަކުން އެތައް ހާސް ބަޔަކަށް ރަސްގެފާނުގެ ޚާއްސަ މެހެމާނުންގެ ގޮތުގައި ހައްޖާއި އުމްރާގެ އަޅުކަން ފުރިހަމަ ކުރަން ވަނީ ފުރުސަތު ދީފަ އެވެ.