ސޯނާކްޝީ އާއި ޒަހީރު ކައިވެނި ކުރަނީ
އިންޑިއާގެ ބައެއް މީޑިއާތަކުން ރިޕޯޓް ކޮށްފައި ވާގޮތުގައި މި ދެ ތަރިން ކައިވެނި ކުރަނީ މި މަހުގެ 23 ވަނަ ދުވަހު މުމްބާއި ގައެވެ.
ބޮލީވްޑްގެ މަޝްހޫރު ބަތަލާ ސޯނާކްޝީ ސިންހާއި ބައެއް ފިލްމަތަކުން ފެނިގެން ގޮސްފައިވާ ޒަހީރު އިގްބާލް ކައިވެނި ކުރަން އުޅޭ ކަމުގެ އަޑުތައް ގަދަވެއްޖެ އެވެ.
ސޯނާކްޝީއާއި ޒަހީރު ރައްޓެހި ވެގެން އުޅޭކަމުގެ ހަބަރުތައް ފެތުރިފައި އޮންނަތާ ދުވަސް ގަނޑަކަށް ފަހު ދެ މީހުން ކައިވެނި ކުރަން އުޅޭކަމުގެ އަޑުތައް ވަނީ ގަދަވެފަ އެވެ.
ރިޕޯޓްތައް ބުނާ ގޮތުން ދާދި ފަހުން ރިލީޒްވި ބޮލީވުޑްގެ މަޝްހޫރު ވެބް ސީރީޒް "ހީރަމަންޑީ: ދަ ޑައިމަންޑް ބާޒާރު" ގެ ކާމިޔާބީ ފާހަގަ ކުރަމުން އަންނަ ސޯނާކްޝީ އާއި ޒަހީރު ކައިވެނި ކުރާނީ މި މަހުގެ 23 ވަނަ ދުވަހު އެވެ.
"އިންޑިއާ ޓްޑޭ" ގައި ރިޕޯޓް ކޮށްފައިވާ ގޮތުގައި ހަގީގަތުގައި ވެސް އެ ދެތަރިންގެ ކައިވެނި ހަފްލާ މި މަހު ކުރިއަށް ދާނެ އެވެ. ހަފްލާ ބާއްވަން ހަމަޖައްސާފައި ވަނީ މުމްބާއީގެ ޕްލިޝް ބަސްޓިއަންގަ އެވެ. ނަމަވެސް ކައިވެނި އޮންނަ ސީދާ ތަނުގެ އިތުރު ތަފްސީލެއް އަދި ނެތެވެ.
ހަފްލާއަށް މިހާރު ވެސް ދައުވަތު ބަހާފައިވާ ކަމަށް ރިޕޯޓްތައް ބުނާއިރު، "ހީރާމަންޑީ: ދަ ޑައިމަންޑް ބާޒާރު" ގެ މުޅި ޓީމަށް ސޮނާކްޝީ ސިންހާ އާއި ޒަހީރު އިގްބާލްގެ ހާއްސަ ދުވަހުގައި ބައިވެރިވުމަށް ދައުވަތު ދީފައި ވެއެވެ. ކައިވެނީގެ ދައުވަތު ކާޑު، މަޖައްލާ ކަވަރެއްގެ ގޮތަށް ޑިޒައިން ކޮށްފައި ވާއިރު އޭގައި ލިޔެފައި ވަނީ "ދެކެވޭ ވާހަކަތަކަކީ ހަގީގަތެއް" ކަމަށް ރިޕޯޓްތައް ބުނެ އެވެ.
މި ހަފްލާ އަކީ ވަރަށް ޕްރައިވެޓް ހަފްލާއަކަށް ވުމުގެ އިތުރުން ބޮލީވުޑްގެ މި މަގުބޫލު ކައިވެންޏާ ގުޅޭ އިތުރު ތަފްސީލެއް އަދި ހާމައެއް ނުކުރެ އެވެ.
ސޮނާކްޝީ ސިންހާ އާއި ޒަހީރު އިގްބާލްގެ ވާހަކަތައް ފެތުރެން ފެށީ ހުމާ ގުރައިޝީ އާއި މަހާތު ރާގަވަންދްރާ އެކުގައި ކުޅުނު ފިލްމު "ޑަބަލް އެކްސްއެލް" 2022 ގައި ނިންމާލި ހިސާބުންނެވެ. މި ދެ ތަރިން އެކަކު އަނެކަކާއެކު ނަގާފައިވާ ހިތްގައިމު ފޮޓޯތައް ހިއްސާކޮށް، އެކަކު އަނެކަކާ މެދު ކުރެވޭ އިހުސާސްތައް ވެސް ސޯޝަލް މީޑިއާގައި ޝެއާރ ކޮށްފައި ހުރެއެވެ.
ސަންޖޭ ލީލާ ބަންސާލީގެ ވެބް ސީރީޒް ރިލީޒް ކުރުމުގެ ކުރިން ޒަހީރު ވެސް ވަނީ ސޮނާކްޝީ ސިންހާއަށް ހިތްވަރުދީ ސޯޝަލް މީޑިއާގައި ލިޔެފަ އެވެ.
ކޮމެންޓް
Republic of Maldives