ފަންނު ކުރިއެރުމުވުމަކީ ކޮންމެ މުއައްސަސާއެއްގެ ވާޖިބެއް: އަސްވާޑު

ފަންނު ކުރިއެރުވުމަށް މަސައްކަތް ކުރުމަކީ ކޮންމެ މުއައްސަސާއެއްގެ މައްޗަށް ވެސް އޮތް ވާޖިބެއް ކަމަށް ޔޫތު މިނިސްޓަރ އިބްރާހިމް ވަހީދު (އަސްވާޑު) ވިދާޅުވެއްޖެ އެވެ. 

ތިމާވެށީގެ ދުވަހާ ގުޅުވައިގެން އެމްޑަބްލިއުއެސްސީ އިން ކުރިއަށްގެންދާ "ފެނުން ދިރުން" ކުރެހުމުގެ މުބާރާތް އިފްތިތާހު ކުރުމަށް ބޭއްވި ރަސްމިއްޔާތުގައި ވާހަކަ ދައްކަވަމުން މިނިސްޓަރު އަސްވާޑު ވިދާޅުވީ، ފަންނުވެރިން ކުރިއެރުވުމަކީ ދައުލަތުގެ ކޮންމެ މުވައްސަސާއަކުން ވެސް ކުރަން ޖެހޭ މަސައްކަތެއް ކަމަށް ގަބޫލުކުރައްވާކަމަށެވެ. އަދި އެކަމުގައި ކުންފުނިތަކާއި މުވައްސަސާތަކުގެ އެއްބާރުލުން ލިބޭނެކަމަށް އުންމީދުކުރައްވާކަމަށް ވިދާޅުވި އެވެ. 

މިނިސްޓަރު ވިދާޅުވީ ކުރެހުމެއްގެ ފަހަތުގައި އޭގެ އެތައް މާނައެއް ވާނެކަމަށާއި، އެ ބުނެދޭ ވާހަކައެއް ނަގައިގަނެވޭނީ އެ ބަލާ މީހާއަށާއި އާޓިސްޓަށް ކަމަށެވެ. 

އެމްޑަބްލިއުއެސްސީއިން ކުރިއަށް ގެންދާ "ފެނުން ދިރުން" ކުރެހުމުގެ މުބާރާތުގެ ބޭނުމަކީ ފެނާއި ދިރިހުރުމުގެ ގުޅުން ދައްކުވައިދިނުމެވެ. އަދި ފެނުން ދިރުން ގެނެސްދޭ ގޮތާއި، ކަނޑާއި ވެށި އަދި ހަލްގު ކުރި ކޮންމެ އެއްޗެއް ވެސް ދިރިހުރުމަށް ބޭނުންތެރި އެއްޗެއްކަން ދައްކުވައިދިނުމެވެ.

މި ހަރަކާތުގައި ހުށަހަޅާ ކުރެހުންތައް ބަލާނީ ޔޫތު މިނިސްޓްރީ އާއި ނެޝަނަލް ސެންޓާ ފޯ ދި އާޓްސްއިން ކަނޑައަޅާ ޖަޖުންގެ ޕެނަލަކުންނެވެ. 

މި މުބާރާތުގައި ވަނަވަނައަށް ދާ ފަރާތްތަކަށް އަގުހުރި އިނާމުތަކެއް ހުށަހަަޅާފައި ވެއެވެ. އެގޮތުން އެއްވަނައަށް 50،000 ރުފިޔާގެ އަގުހުރި އިނާމެއް ލިބޭ އިރު ދެވަނައަށް 35،000 އަދި ތިން ވަނައަށް 15،000 ރުފިޔާ ދޭން ވަނީ ނިންމާފަ އެވެ.