ބިމުގެ ފެނާއި ސްޓެލްކޯ ފެން މަސްހުނި ނުކުރުމަށް އެދިއްޖެ

ސްޓެލްކޯއިން ފެނުގެ ހިދުމަތް ދޭ ރަށްރަށުގައި ގޭގެއަށް ފެން ވަޔަރުކުރުމުގައި ބިމުގެ ފެނާއި، ކުންފުނީގެ ސާފުކުރި ފެން މަސްހުނިވާ ގޮތަށް، ވަޔަރު ނުކުރުމަށް އެދިއްޖެ އެވެ. 

ސްޓެލްކޯއިން ބުނީ އެ ކުންފުނިން ފެނުގެ ހިދުމަތް ފޯރުކޮށްދެމުންގެންދާ ރަށްރަށުގެ ފެނުގެ ނިޒާމަށް ހައުސް ކަނެކްޝަން ގުޅާއިރު، ބިމުގެ ފެނާއި އެކުންފުނިން ފޯރުކޮށްދޭ ފެން އެކުވާގޮތަށް ކަނެކްޝަން ހަދަމުންދާކަން ފާހަގަ ކުރެވިފައިވާ ކަމަށާއި، އެއީ ފެނާއި ނަރުދަމާ ގާނޫނު މަނާކުރާ ކަމެއް ކަމަށެވެ. 

ސްޓެލްކޯއިން ބުނީ އެކުންފުނިން ދޭ ފެނުގެ ހިދުމަތަކީ ސަރުކާރުން ކަނޑައަޅާފައިވާ މިންގަނޑުތަކަށް ޓެސްޓް ކުރެވިގެން ފޯރުކޮށްދެވޭ ހިދުމަތެއް ކަމަށެވެ. 

"...މި ނިޒާމުގެ ތެރެއަށް އިތުރު އެއްވެސް ފެނެއް އެއްކުރެވޭ ނަމަ، އެކަމުގެ ސަބަބުން ފެން ތަގައްޔަރުވެ، ފެނުގެ ހިދުމަތް ބޭނުންކުރާ ހުރިހާ ރައްޔިތުން ސިއްހީ ނުރައްކާތެރި ކަމެއްގެ ތެރެއަށް ހުށަހެޅުމުގެ ފުރުސަތު ވަރަށް ބޮޑު ވާނެ،" ސްޓެލްކޯއިން މިއަދު ކުރި އިއުލާނުގައި ބުނެ އެވެ. 

އަދި މިގޮތަށް ކަނެކްޝަން ހަދާފައިވާ ތަންތަނުން މިއަދުން ފެށިގެން ފަސް ދުވަހުގެ ތެރޭގައި މިކަން ރަނގަޅު ކުރުމަށް ސްޓެލްކޯއިން އަންގާފައި އެވެ. 

މި މުއްދަތުގައި މިކަން ރަނގަޅު ނުކުރާ ފަރާތްތަކާ މެދު ހަމަޖެހިފައިވާ އުސޫލުން ފިޔަވަޅު އަޅަމުން ގެންދާނެ ކަމަށް ވެސް އެކުންފުނިން ބުނެ އެވެ.