ފުވައްމުލަކުގައި ޑައިވިނަށް ދިޔަ ފަތުރުވެރިޔަކު މަރުވެއްޖެ

ފުވައްމުލަކުގައި ޑައިވިނަށް ދިޔަ ފަތުރުވެރިޔަކު މަރުވެއްޖެ އެވެ. 

ފުލުހުން ބުނީ ފުވައްމުލަކު ކައިރީގައި އޮންނަ ފަތުރުވެރިންގެ މެދުގައި މަގުބޫލު "ޓައިގާ ޝާކް ޕޮއިންޓަ" ށް ފީނަން ދިޔަ ފަތުރުވެރިޔަކު، ދޯންޏަށް އެރި ފަހުން ހާލު ދެރަވެގެން މިއަދު މެންދުރު 11:26 ގައި އެ ސިޓީގެ ހޮސްޕިޓަލަށް ގެންދިޔަ އިރު ވެސް އޮތީ މަރުވެފައި ކަމަށެވެ. 

މަރުވި ފަތުރުވެރިޔާ އަކީ ޗައިނާގެ 70 އަހަރުގެ ރައްޔިތެކެވެ. 

ފުލުހުން ބުނީ މިކަމާ ގުޅިގެން ބަލަން ޖެހޭ ކަންކަން ބަލަމުން ގެންދާކަމަށެވެ.