ސައިކަލުތަކެއްގައި ރޯކުރިކަމަށް ތުހުމަތުވާ މީހާ 30 ދުވަހަށް ބަންދުކޮށްފި
ޖެން ހޮޓާ ކައިރީ ރައްޔިތުންގެ މަޖިލީހުގެ އިދާރާ ކުރިމައްޗަށްވާ ގޮތަށް އޮންނަ ޕާކިން ޒޯނުގައި ބަހައްޓާފައި ހުރި ސައިކަލުތަކެއްގައި ރޯކޮށްލިކަމަށް ތުހުމަވާ މީހާ ހައްޔަރުކޮށްފިއެވެ.
މިދިޔަ އަންގާރަދުވަހު ސައިކަލުތަކެއްގައި ރޯކޮށްލައިގެން އެ މައްސަލަ ބަލަން ފަށެކަން ފުލުހުންވަނީ މީޑީއާއަށް ހާމަކޮށްފައެވެ.
އެ ދުވަހު ފުލުހުން ބުނި ގޮތުގައި އެ މައްސަލާގައި ތުހުމަތުވާ މީހާވަނީ ދެނެގަނެވިފައެވެ. އަދި އޭނާ ހައްޔަރުކުރުމުގެ މަސައްކަތްކުރަމުންދާ ކަމަށް ފުލުހުން ބުންޏެވެ.
މިއަދު އެ މައްސަލައާ ގުޅިގެން މީހަކު ހައްޔަރުކުރިކަން ހާމަކޮށް ފުލުހުން ބުނެފައިވަނީ އެ މައްސަލާގައި ހައްޔަރުކުރީ 36 އަހަރުގެ ދިވެހި ފިރިހެނެއް ކަމަށެވެ.
އެމީހާގެ ބަންދާމެދު ގޮތެއް ނިންމުމަށް ކުރިމިނަލް ކޯޓަށް ހާޒިރުކުރުމުން 30 ދުވަހަށް އޭނާ ބަންދުކުރަން ކޯޓުން އަމުރުކޮށްފައިވެއެވެ.
ސައިކަލުތަކުގައި ރޯކޮއްލުމުން ހުޅުގަނޑު ފެތުރި ހަތް ސައިކަލަކާއި ވޭނަކަށް ގެއްލުން ލިބުނުއިރު، އެއިން ތިން ސައިކަލެއް ބޭނުންނުކުރެވޭ މިންވަރަށް ހަލާކުވެފައިވެއެވެ.
ކޮމެންޓް
Republic of Maldives