އޭޕްރީލު މަހު ތަކެތީގެ އަގަށް ލުޔެއް، އިންފުލޭޝަން ދަށަށް

ފާއިތުވި އޭޕްރީލު މަހުގައި ރާއްޖޭގެ އިންފްލޭޝަން ރޭޓު ނުވަތަ މުދަލާއި ޚިދުމަތުގެ އަގު މާޗު މަހާ އަޅާބަލާއިރު 0.70 އިންސައްތައިން ދަށްވެފައިވާ ކަމަށް ތަފާސްހިސާބާ ބެހޭ ޤައުމީ އިދާރާއިން ބުނެފި އެވެ. 

މޯލްޑިވްސް ބިއުރޯ އޮފް ސްޓެޓިސްޓިކްސްއިން އާންމުކޮށްފައިވާ ކޮންޒިއުމާ ޕްރައިސް އިންޑެކްސްއަށް ބަލާއިރު މާޗު މަހާ އަޅާބަލާއިރު އޭޕްރީލު މަހުގައި އެންމެ ބޮޑަށް އަގު ދަށްވީ ކަރަންޓާއި ފެނުގެ އަގުންނެވެ. އެގޮތުން ކަރަންޓުގެ އަގު މާޗު މަހަށްވުރެ 10.6 އިންސައްތަ ދަށްވެފައިވާކަމަށް އެ އިންޑެކްސްއިން ދައްކަ އެވެ. އަދި ސާފު ބޯފެނުގެ އަގުވަނީ 23.85 ޕަސެންޓު ދަށްވެފަ އެވެ. 

އިތުރަށް އަގުދަށްވީ މުދަލުގެ ތެރޭގައި ތަރުކާރީވެސް ހިމެނެ އެވެ. އެގޮތުން އޭޕްރީލު މަހުގައި ތަރުކާރީގެ ބާވަތްތަކުގެ އަގު 1.73 އިންސައްތައިން ދަށްވިއެވެ. ވައިގެ މަގުން ފަސިންޖަރުން ކުރާ ދަތުރުތަކުގެ އަގު 2.00 އިންސައްތައިން ދަށްވިއިރު، މުހިއްމު ކަރަންޓު ސާމާނު ހިމެނޭހެން ގޭބީސީތަކަށް ބޭނުންވާ މުދަލުގެ އަގުވަނީ 2.16 އިންސައްތައިން ދަށްވެފައެވެ. 

ނަމަވެސް ބައެއް މުދަލުގެ އަގު އޭޕްރީލު މަހުގައި ބޮޑުވެފައިވެއެވެ. އަގު ބޮޑުވީ ތަކެތީގެ ތެރެއިން އެންމެ ބޮޑަށް އަގު އުފުލުނީ މަހުގެ ބާވަތްތަކެވެ. މަހުގެ އަގު 1.30 އިންސައްތައިން އުފުލުނުކަމަށް ސީޕީއައި އިން ދައްކަ އެވެ. މޭވާއާއި އެއްގަމު މަހުގެ އަގުވެސް އުފުލުނެވެ. އެގޮތުން މޭވާގެ އަގު 0.68 އިންސައްތައިން އުފުލުނުއިރު އެއްގަމު މަހުގެ އަގުވަނީ 2.01 އިންސައްތައިން މަތިވެފައެވެ. 

އެ މުއްދަތުގައި އިންޝުއަރޭންސްއާއި އެހެނިހެން މާލީ ހިދުމަތްތަކުގެ އަގު 0.49 އިންސައްތައިން ދަށްވިކަމަށް ކޮންސިއުމާ ޕްރައިސް އިންޑެކްސްއިން ދައްކައެވެ. އަގަށް އައި ބަދަލަކީ ބޮޑު ބަދަލެއްކަމަށްނުވި ނަމަވެސް ބަދަލު އައިސްފައިވަނީ ހެލްތު އިންޝުއަރޭންސްގެ އަގަށް ކަން އެ އިންޑެކްސްގައި ފާހަގަކޮށްފައިވެއެވެ. 

އިތުރަށް އެ ރިޕޯޓުން ފާހަގަވި ގޮތުގައި މާލެ ސަރަހައްދުގައި އެންމެ ބޮޑަށް އުފުލުނީ ކާބޯތަކެތީގެ އަގެވެ. އެގޮތުން ކާބޯތަކެތީގެ އަގު 1.29 އިންސައްތައިން އިތުރުވިކަމަށް އެ ރިޕޯޓުގައި ފާހަގަކުރިއެވެ. ފަރުމަހުގެ އަގު 14.29 އިންސައްތައިން އުފުލުނުއިރު، ގަނޑުކުރި ކުކުޅުގެ އަގު 4.5 އިންސައްތއިން އުފުލުނެވެ. ތަރުކާރީއާއި މޭވާގެ އެކި ބާވަތްތަކުގެ އަގުވެސް މާލެ ސަރަހައްދުގައި އުފުލުނެވެ. 

މާލެއާ ހިލާފަށް އަތޮޅު ތެރޭގައި އެންމެ ބޮޑަށް އަގު އުފުލުނީ ސިއްހީ ހިދުމަތްތަކާއި ސިއްހަތާ ގުޅުންހުރި މުދަލުގެ އަގުތަކެވެ. އެގޮތުން ސިއްހީ ހިދުމަތުގެ އަގު 0.48 އިންސައްތައިން އުފުލިފައިވާކަމަށް އެ ރިޕޯޓުގައި ދައްކައެވެ.