ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲއާއި މަޖިލީހުގެ މެންބަރުންގެ ތެރެއިން ޖޭއެސްސީގެ މެންބަރުކަމަށް އައްޔަންކުރުމަށް މަޖިލީހުން ނިންމި މާފުށީ ދާއިރާގެ މެންބަރު ހުސައިން ރިޒާ ޖުޑީޝަލް ސާވިސަސް ކޮމިޝަނުގެ މެންބަރުކަމުގެ ހުވައި ކުރައްވައިފިއެވެ.
މިއަދު ރައީސް އޮފީހުގައި އޮތް ރަސްމިއްޔާތެއްގައި ދެ ބޭފުޅުން މަޤާމުގެ ހުވައިކުރެއްވީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ކުރިފުޅުމަތީގައެވެ. އެ ބޭފުޅުންނަށް ޖޭއެސްސީގެ މެންބަރުކަމުގެ ހުވާލައިދެއްވީ ދިވެހިރާއްޖޭގެ ސުޕްރީމް ކޯޓުގެ ފަނޑިޔާރު ޑރ.މުހައްމަދު އިބްރާހީމެވެ.
ހުވާ ކުރެއްވުމަށްފަހު ޖޭއެސްސީގެ މެންބަރުކަމުގެ ފަތްކޮޅު ދެ ބޭފުޅުންނަށް އެރުއްވީ ރައީސް މުޢިއްޒެވެ.
ޖޭއެސްސީ އެކުލެވިގެންވާ ގޮތް
- ރައްޔިތުންގެ މަޖިލީހުގެ ރައީސް
- ސުޕްރީމު ކޯޓުން އިންތިހާބުކުރާ އެ ކޯޓުގެ ފަނޑިޔާރެއް
- ހައިކޯޓުން އިންތިހާބުކުރާ އެ ކޯޓުގެ ފަނޑިޔާރެއް
- ދަށު ކޯޓުތަކުގެ ފަނޑިޔާރުންގެ ތެރެއިން އިންތިހާބުކުރާ ފަނޑިޔާރެއް
- ރައްޔިތުންގެ މަޖިލީހުން ކަނޑައަޅާ މަޖިލިސް މެންބަރެއް
- އާންމުންގެ ތެރެއިން މަޖިލީހުން ކަނޑައަޅާ މީހެއް
- ސިވިލް ސާވިސް ކޮމިޝަނުގެ ރައީސް
- ރައީސް އައްޔަންކުރާ މެންބަރެއް
- ބަންޑާރަނައިބު
- ގާނޫނީ ވަކީލުންގެ ތެރެއިން އިންތިހާބުކުރާ ވަކީލެއް
ޖުޑީޝަލް ސާވިސް ކޮމިޝަނަކީ އުއްތަމަފަނޑިޔާރާއި ސުޕްރީމް ކޯޓުގެ ފަނޑިޔާރުން ފިޔަވައި އެހެން ފަނޑިޔާރުން އައްޔަންކުރުމާއި، މަގާމުގެ ކުރިއެރުން ދިނުމާއި، ބަދަލުކުރުމުގެ ޒިންމާ ގާނޫނުއަސާސީން މަތިކޮށްފައިވާ މިނިވަން މުއައްސަސާއެކެވެ.
ފަނޑިޔާރުންނާ ގުޅޭ ޝަކުވާތައް ބަލައި، އެފަދަ މައްސަލަތަކުގއި ފަނޑިޔާރުންނާމެދު އަޅަންޖެހޭ ފިޔަވަޅުތައް އެޅުމާއި، ފަނޑިޔާރުން މަގާމުން ވަކިކުރަންޖެހޭ ހާލަތްތަކުގައި މަގާމުން ވަކިކުރުމަށް ރައްޔިތުންގެ މަޖިލީހަށް ހުށަހަޅާނީވެސް ޖޭއެސްސީންނެވެ.
އޭގެ އިތުރަށް އަދުލު އިންސާފު ގާއިމުކުރުމުގެ ކަންކަން ހިންގުމާއި ކޯޓުތަކާ ގުޅޭ އެކި ކަންކަމުގައި ރައީސަށް ލަފާދޭ ކޮމިޝަނަކީވެސް ޖޭއެސްސީއެވެ.
ޖޭއެސްސީގައި ސިޔާސީ ބޭފުޅުން ތިއްބެވުމުގެ ސަބަބުން ޖުޑީޝަރީއަށް ސިޔާސީ ނުފޯޒު ފޯރާކަމަށް އަބަދުވެސް ތުހުމަތުކުރެވޭތީ، ޝަރުއީ ދާއިރާއަށް ސިޔާސީ ނުފޫޒު ނުފޯރާނެ ގޮތަށް ޖޭއެސްސީގެ އެކުލެވުން ބަދަލުކުރުމަކީ ރައީސް ޑރ.މުއިއްޒުގެ ވައުދުފުޅެކެވެ. އަދި އެކަމަށް ބޭނުންވާ އިސްލާހުތައް ވަރަށް އަވަހަށް ރައްޔިތުންގެ މަޖިލީހަށް ފޮނުއްވާނެކަމަށް ރައީސް ވިދާޅުވެފައިވެއެވެ.
ކޮމެންޓް
Republic of Maldives