ޖޭއެސްސީގައި އިންނަވާ މަޖިލީސް މެންބަރަކަށް ރިޒާގެ ނަން

ޖުޑިޝަލް ސާވިސް ކޮމިޝަން (ޖޭއެސްސީ) އަށް ރައްޔިތުންގެ މަޖިލީހުން ކަނޑައަޅާ މެންބަރަކަށް މާފުށި ދާއިރާގެ މެންބަރު ހުސެއިން ރިޒާ އާދަމްގެ ނަން ހުށަހަޅައިފި އެވެ.

ޖޭއެސްސީ އެކުލަވާލާފައިވާ ގޮތުން، މަޖިލީސް މެންބަރެއް އިންނަން ޖެހެ އެވެ. ރައްޔިތުންގެ މަޖިލީހުގެ މިއަދުގެ ޖަލްސާގައި މިކަމަށް ހުޅުވާލުމުން ރިޒާގެ ނަން ހުށަހެޅުއްވީ މަނަދޫ ދާއިރާގެ މެމްބަރު ހުސްނީ މުބާރިކް އެވެ. ހުސްނީގެ ހުށަހެޅުއްވުމަށް މާފަންނު ދެކުނު ދާއިރާގެ މެންބަރު އަބްދުﷲ ރިފާއު ވަނީ ތާއީދު ކުރައްވާފަ އެވެ.

އިތުރު ނަމެއް ހުށައެއް ނާޅަ އެވެ. ޖޭއެސްސީއަށް ރިޒާ އިންތިހާބު ކުރުމާމެދު ވޯޓު ނެގުން އޮންނާނީ މިއަދުގެ ވޯޓް ގަޑީގަ އެވެ. ވޯޓް ނަގާނީ މެންދުރު 1:00 ގައެވެ.

ޖޭއެސްސީގައި މަޖިލީހުގެ ރައީސް ވެސް އިންނަވަ އެވެ. އަދި އެ މަގާމަށް އެމަނިކުފާނު އައްޔަނު ނުކުރައްވަ އެވެ. މަޖިލީހުން ކަނޑައަޅާ އާންމު މީހަކާއި ބަންޑާރަ ނައިބާއި ރައީސުލްޖުމްހޫރިއްޔާ ކަނޑައަޅުއްވާ މެންބަރަކާއި ސުޕްރީމް ކޯޓާއި ހައިކޯޓުން ކަނޑައަޅާ މެންބަރެއް ވެސް ޖޭއެސްސީގައި އިންނަވާނެ އެވެ.

ހުސައިން ރިޒާއަކީ މިސްރުގެ އަލްއަޒްހަރު ޔުނިވާސިޓީން މަތީ ތައުލީމު ހާސިލުކުރައްވާފައިވާ ބޭފުޅެކެވެ. އޭނާވަނީ ކުރިމިނަލް ކޯޓުގައި ކުރިން މަސައްކަތްކުރައްވާފައެވެ. އޭނާއަކީ ގުރައިދޫ ދާއިރާގެ ކުރީގެ މެންބަރު އަދި 18 ވަނަ މަޖިލީހުގެ ދައުރުގައި މަޖިލީހުގެ ފަރާތުން ޖޭއެސްސީގެ މެންބަރުކަން ކުރެއްވި އިބްރާހީމް ރިޒާގެ ކޮއްކޯފުޅެވެ.