ޓިކްޓޮކް މަނާކުރައްވަން އުޅުއްވި ޓްރަމްޕު ޓިކްޓޮކަށް

ކުރު ވީޑިއޯ ޝާއިއުކުރާ މަގުބޫލު މީސްމީޑިއާ މަންސަ ޓިކްޓޮކް މަނާކުރެއްވުމަށް އޭނާގެ ވެރިކަމުގައި އެތައް މަސައްކަތެއް ކުރެއްވުމަށްފަހު އެމެރިކާގެ ކުރީގެ ރައީސް ޑޮނާލްޑް ޓްރަމްޕް ޓިކްޓޮކަށް ވަދެވަޑައިގެން އެކައުންޓެއް އުފައްދަވައިފިއެވެ.

ޓިކްޓޮކުގައި ޓްރަމްޕު ހިއްސާކުރެއްވި ފުރަތަމަ ޕޯސްޓަކީ 13 ސިކުންތުގެ ކުރު ވީޑިއޯއެކެވެ. އެއީ އަލްޓިމޭޓް ފައިޓިން ޗެޕްމިއަންޝިޕް (ޔޫއެފްސީ)ގެ މެޗެއް ބައްލަވައިލެއްވުމަށް ވަޑައިގެން އުޅުއްވުމުގެ ތެރެއިން ރެކޯޑުކުރައްވާފައިވާ ވީޑިއޯއެކެވެ. އެތަނަށް ޓްރަމްޕު ވަޑައިގަތީ އޭނާގެ މައްޗަށް އުފުލި 34 ޖިނާއީ ދައުވާއެއް ސާބިތުވާކަމަށް ނިއުޔޯކުގެ ކޯޓަކުން ނިންމިތާ ދުވަސްކޮޅެއް ފަހުންނެވެ. 

ޓްރަމްޕު ޝާއިއުކުރެއްވި ވީޑިއޯގައި ފެންނަނީ ޔޫއެފްސީގެ އޯނަރު ޑަނާ ވައިޓްއާއެކު އޭނާ ހުންނަވަނިކޮށެވެ. ވައިޓް ބުނަނީ "ރައީސް މިހާރު ޓިކްޓޮކް ބޭނުންކުރައްވާ" ކަމަށެވެ. ޖަވާބުގައި ޓްރަމްޕު ވިދާޅުވަނީ "އެއީ އަޅުގަނޑަށް ލިބޭ ޝަރަފެއް" ކަމަށެވެ. އެއަށްފަހު އެރީނާގައި ތިބި އޭނާގެ ސަޕޯޓަރުންނާ މުއާމަލާތްކުރައްވައެވެ.

ހޮނިހިރުދުވަހު ޓްރަމްޕު ޓިކްޓޮކް ބޭނުންކުރައްވަން ފެއްޓެވުމަކީ އޭނާގެ ވެރިކަމުގެ ދައުރުގައި ގެންގުޅުއްވި ވިސްނުންފުޅާ ވަރަށް ބޮޑަށް ދުރުވެވަޑައިގަތުމެވެ. އޭނާގެ ވެރިކަމުގައި ޓިކްޓޮކް އެމެރިކާގައި މަނާކުރެއްވުމަށް ރިޔާސީ ގަރާރެއް ނެރުއްވިއެވެ. އެ ގަރާރަށް އަމަލުކުރުން ހުއްޓުވީ ކޯޓުތަކުންނެވެ.

"އެމެރިކާގެ ގައުމީ ސަލާމަތް ކަށަވަރުކުރުމަށް، ޓިކްޓޮކްގެ އޯނަރުންނާ ދެކޮޅަށް ހަރުކަށި ފިޔަވަޅުއަޅަންޖެހޭ،" ޓުރަމްޕު ސޮއިކުރައްވައި ނެރުއްވި ރިޔާސީ ގަރާރުގައި ބުނެފައިވެއެވެ. 

ޓިކްޓޮކާމެދު ގެންގުޅުއްވާ ވިސްނުންފުޅު ޓްރަމްޕު ބަދަލުކުރެއްވިކަން ފުރަތަމަ ހާމަކުރެއްވީ މި އަހަރުގެ މާޗު މަހުއެވެ. އެއީ ޓިކްޓޮކަށް އިންވެސްޓުކުރައްވާފައިވާ ބޮޑު ވިޔަފާރިވެރިއެއްކަމަށްވާ ރިޕަބްލިކަން ޕާޓީއަށް މަދަދުވެރިވާ ޖެފް ޔަސްއާ ބައްދަލުކުރެއްވުމަށް ފަހުއެވެ. 

2016 ވަނަ އަހަރު އެމެރިކާގެ ރައީސްކަމަށް ކުރިމަތިލައްވަން ނިންމެވިކަން އިއުލާނުކުރެއްވި ތަގުރީރުގައި ޓްރަމްޕު ވިދާޅުވެފައިވަނީ އޭނާއަކީ ބިލިއަނަރެއްކަމަށްވާތީ އޭނާގެ މައްޗަށް ފައިސާގެ މަސްލަހަތުތަކުން ނުފޫޒު ނުފޯރުވޭނެ ކަމަށެވެ.

ޓިކްޓޮކްގެ މިލްކުވެރި ޗައިނާ ކުންފުނިން އެ މަންސަ ވިއްކައިނުލައިފިނަމަ، އެމެރިކާގައި ޓިކްޓޮކް މަނާވެދާނެ ގާނޫނެއް މި އަހަރުގެ އޭޕްރީލުގައި އެމެރިކާގެ ރައީސް ޖޯ ބައިޑަން ތަސްދީގުކުރައްވާފައިވެއެވެ.

ޓިކްޓޮކްގައި އޮންނަ ބައިޓްޑާންސްގެ ހިއްސާ ވިއްކުމަށް އެ ބިލުން ނުވަ މަސްދުވަހުގެ މުހުލަތެއް ލިބެއެވެ. އެ ބިލުގައި ކަނޑައަޅާފައިވާ މުހުލަތުގެ ތެރޭގައި އެ ހިއްސާ ދޫކޮށްނުލައިފިނަމަ އެމެރިކާގައި ޓިކްޓޮކް ބޭނުންކުރުން މަނާވާނެއެވެ. 

މިބިލު އެމެރިކާގެ ކޮންގުރެސްއިން ފާސްކޮށް ބައިޑަން ތަސްދީގުކުރެއްވީ ބައިޓްޑާންސްއިން ޓިކްޓޮކް ބޭނުންކުރާ އެމެރިކާ މީހުންގެ މައުލޫމާތުތައް އެއްކޮށް ޗައިނާ ސަރުކާރާ ހިއްސާކުރާކަމަށް އެމެރިކާގެ ސިޔާސީން ތުހުމަތުކުރަމުން އައި ދުވަސްވަރެއްގައެވެ.