އަހުމަދީނިޖާދު އީރާނުގެ ރައީސްކަމަށް އަނެއްކާވެސް ކުރިމަތިލައްވަނީ

އީރާނުގެ ކުރީގެ ރައީސް އަޙްމަދީނިޖާދު މިމަހު އޮންނަ އެ ޤައުމުގެ ރިޔާސީ އިންތިޚާބުގައި ވާދަކުރެއްވުމަށް ނަން ހުށަހަޅުއްވައި ރަޖިސްޓާކުރައްވައިފިކަމަށް އީރާނުގެ ދައުލަތުގެ މީޑިއާއިން ރިޕޯޓުކޮށްފިއެވެ. 

ފެށުނު ޖޫން މަހުގެ އަށާވީސް ވަނަ ދުވަހު އީރާނުގެ ރިޔާސީ އިންތިޚާބުގެ ވޯޓުލުން ފެށޭނެއެވެ. އެ އިންތިޚާބަކީ މޭ ނަވާރަ ވަނަ ދުވަހު ދަތުރުކުރެއްވި ހެލިކޮޕްޓަރު ވެއްޓި އީރާނުގެ ރަައީސް އިބްރާހީމް ރައީސީ އަވަހާރަވުމާ ގުޅިގެން ބާއްވާ އިންތިޚާބެކެވެ. 

އުމުރުފުޅުން 67 އަހަރުފުޅުގެ އަހްމަދީނީޖާދުވަނީ ޖެހިޖެހިގެން ދެ ދައުރު އީރާނުގެ ރައީސްކަން ކުރައްވާފައެވެ. 2005 ވަނަ އަހަރުން 2013 ވަނަ އަހަރަށް ދެމިގެންދިޔަ އޭނާގެ ވެރިކަމަކީ އީރާނުގެ ނިއުކުލިއާ ޕްރޮގުރާމު ފަދަ ކަންކަމާ ގުޅިގެން ހުޅަނގާއި އީރާނުގެ ގުޅުން ހީރަނުވެ ނުތަނަވަސްކަން ބޮޑުވި ދައުރެކެވެ. 

ރިޔާސީ އިންތިހާބުގައި ވާދަކުރެއްވުމަށް ނަން ހުށަހަޅުއްވާފައިވާ އެހެނިހެން ބޭފުޅުންނެކޭ އެއްފަދައިން އޭނާއަށް އިންތިހާބުގައި ވާދަކުރެއްވޭނެކަން ނުވަތަ ނޫންކަން ނިންމާނީ 12 ފަޤީހެއްގެ މައްޗަށް އެކުލެވޭ ގާޑިއަން ކައުންސިލުންނެވެ. 

މީގެ ކުރިން 2021 ވަނަ އަހަރާއި 2017 ވަނަ އަހަރު އެ ކައުންސިލުންވަނީ އަޙްމަދީނީޖާދަށް އިންތިހާބުގައި ވާދަނުކުރެއްވޭނެކަމަށް ކަނޑައަޅާފައެވެ. 

އާދީއްތަދުވަހު ދާހިލީ ވުޒާރާގައި ރިޔާސީ އިންތިހާބަށް ކުރިމަތިލެއްވުމަށް ނަންފުޅު ރަޖިސްޓްރީކުރައްވައި ބިޑް ހުށަހެޅުއްވުމަށްފަހު އަހްމަދީނީޖާދު ވިދާޅުވެފައިވަނީ އީރާނަށް ކުރިމަތިވެފައިވާ އެ ޤައުމަށް ކުރިމަތިވެފައިވާ ހުރިހާ މައްސަލަތަކަކީ އެ ޤައުމުގެ ފުރިހަމަ ޤާބިލުކަން ބޭނުންކުރެވިއްޖެނަމަ ހައްލުކުރެވޭނެ މައްސަލަތަކެއް ކަމަށެވެ. 

އަޙްމަދީނީޖާދުގެ އިތުރަށް އީރާނުގެ ރައީސްކަމަށް ކުރިމަތިލައްވާ ވަރުގަދަ ކެނޑިޑޭޓުންގެ ތެރޭގައި އެ ޤައުމުގެ ބަރުލަމާނުގެ ކުރީގެ ރައީސް އަލީ ލަރިޖާނީއާއި ނިއުކުލިއާ ހަތިޔާރާ ބެހޭ މަޝްވަރާތަކުގައި އިސްކޮށް އުޅުއްވި ސައީދު ޖަލީލީ ހިމެނިވަޑައިގަންނަވައެވެ. 

އިންތިހާބަށް ކުރިމަތިލެއްވުމަށް ނަން ހުށަހެޅުއްވި ބޭފުޅުންގެ ތެރެއިން އިންތިހާބުގައި ވާދަކުރެއްވޭނެ ބޭފުޅުން ޖޫންމަހުގެ 11 ވަނަ ދުވަހު ގާޑިއަން ކައުންސިލުން އިއުލާނުކުރާނެއެވެ.