ސުލްހަވެރިކަމާއެކު ކުރިއަށްދާނަމަ ސްޓެލްކޯ ކައިރީ އޮންނަ އެއްވުމަށް އެއްބާރުލުން ދޭނަން: ފުލުހުން
ކަރަންޓު ބިލު ބޮޑުވުމާ ގުޅިގެން މިއަދު ހަވީރު ސްޓެލްކޯ ކައިރީ ބޭއްވުމަށް ރާވާފައިވާ އިހުތިޖާޖަށް އެއްބާރުލުންދީ އެހީތެރިވާނެކަމަށް ފުލުހުން ބުނެފިއެވެ.
މި މަހުގެ ކަރަންޓު ބިލުތައް ވަރަށް ބޮޑުވެފައިވާކަމަށް ބުނެ އާންމުންގެ ބަޔަކު އިސްނަގައިގެން ސްޓެލްކޯ ކައިރީ ބާއްވާ އެއްވުން ފެށޭނެކަމަށް މީސްމީޑިއާގައި ދައުރުވާ ޕޯސްޓުތަކުގައި ބުނެފައިވަނީ ހަވީރު ހަތަރެއް ޖަހާއިރެވެ.
ސްޓެލްކޯ ކައިރިއަށް އެއްވުމަށް ގޮވައިލާ ޕޯސްޓުތައް މީސްމީޑިއާ މަންސަތަކުގައި ދައުރުވަމުންދާއިރު، ގިނަ ބަޔަކު އަންނަނީ އެމީހުންގެ ގޭބީސީތަކުގެ ކަރަންޓު ބިލު އާދަޔާ ޚިލާފަށް ބޮޑުވެފައިވާތީ ނުރުހުން ފާޅުކުރަމުންނެވެ.
ބައެއް މީހުން ބުނެފައިވާ ގޮތުގައި ކަރަންޓު ބިލުތައް ބޮޑުވެފައިވަނީ އެމީހުން ޗުއްޓީއާ ދިމާކޮށް ރަށުން ބޭރުގައި ތިބި ދުވަސްވަރެއްގައެވެ. އެހެންކަމުން ކުރީ މަސްތަކަށްވުރެ އާދަޔާ ޚިލާފު މިންވަރަކަށް ކަރަންޓު ބިލު ބޮޑުވި ސަބަބަކީ ކޮބައިތޯ އެމީހުން ސުވާލު އުފައްދައެވެ.
ކަރަންޓު ބިލުތައް ބޮޑުވުމުގެ ނުތަނަވަސްކަމުގައި ސްޓެލްކޯ ކައިރިއަށް މީހުން އެއްވުމަށް ނިންމާފައިވާކަން ފުލުހުންގެ ޚިދުމަތުގެ ސަމާލުކަމަށް އައިސްފައިވާކަމަށް ފުލުހުންގެ ޚިދުމަތުގެ ތަރުޖަމާނު ސުޕްރިންޓެންޑެންޓް އޮފް ޕޮލިސް އަޙްމަދު ޝިފާން ވިދާޅުވިއެވެ.
ސްޓެލްކޯއަކީ މުހިއްމު ބިނާރަކަށްވާތީ އެތަން ހިމާޔަތްކުރުމަށް ބޭނުންވާ ވަސީލަތްތައް އެތަނުގައި މިހާރު ގާއިމުކޮށް، އެތަން ހިމާޔަތްކުރުމަށް ފުލުހުން ހަރަކާތްތެރިވާން ފަށާފައިވާކަމަށް ޝިފާނު ވިދާޅުވިއެވެ.
އިތުރަށް އޭނާ ވިދާޅުވީ ސުލްހަވެރިކަމާއެކު އެއްވުމުގެ ކަންކަން ކުރިއަށްދާނަމަ އެ އެއްވުން ކުރިއަށްގެންދިއުމަށް ފުލުހުން އެހީތެރިވެ އެއްބާރުލުން ދޭނެ ކަމަށެވެ. އަދި ހިޔާލު ފާޅުކުރުމުގެ މިނިވަންކަމަށް ފުލުހުންގެ ހިދުމަތުން އަރައިނުގަންނާނެ ކަމަށްވެސް ޝިފާނު ވިދާޅުވިއެވެ.
ކޮމެންޓް
Republic of Maldives