މަހުން މަހަށް ބަލާއިރު ފުލުހަށް ހުށަަހެޅި މައްސަލަ 22 އިންސައްތަވަނީ މަދުވެފައެވެ.
އޭޕްރީލު މަހާ އަޅާބަލާއިރު ފާއިތުވި މޭ މަހުގައި ފުލުހުންގެ ޚިދުމަތަށް ރިޕޯޓުކޮށްފައިވާ މައްސަލަތަކުގެ އަދަދު މަދުވެއްޖެއެވެ.
ފުލުހުންގެ އިދާރާއިން އާންމުކޮށްފައިވާ ތަފާސްހިސާބުތަކުން ދައްކާ ގޮތުގައި މޭ މަހު ފުލުހުންގެ ޚިދުމަތަށް ޖުމްލަ 759 މައްސަލައެއް ހުށަހެޅިފައިވެއެވެ. އޭގެ ތެރެއިން 244 މައްސަލައަކީ ވައްކަމުގެ މައްސަލަތަކެވެ.
ދެން އެންމެ ގިނައިން ފުލުހަށް ހުށަހެޅިފައިވަނީ މަގުމަތީގައި ހިނގާ ހާދިސާތަކާ ގުޅޭ މައްސަލަތަކެވެ. އެބާވަތުގެ 169 މައްސަލައެއް ފުލުހަށް ހުށަހެޅިފައިވެއެވެ. ތިންވަނައަށް އެންމެ ގިނައީ މަސްތުވާތަކެތީގެ މައްސަލަތަކެވެ. މަސްތުވާތަކެއްޗާ ގުޅުންހުރި 88 މައްސަލައެއް ރިޕޯޓުކޮށްފައިވެއެވެ.
ތަކެތި ގެއްލިގެން 78 މައްސަލައެއް ހުށަހަޅާފައިވާއިރު މާރާމާރީގެ 30 މައްސަލައަކާއި ފޭރުމުގެ 36 މައްސަލައެއް ހުށަހަޅާފައިވެއެވެ. އަދި މަކަރާއި ހީލަތުގެ 25 މައްސަލައަކާއި ފޯޖަރީގެ 12 މައްސަލައަކާއި މުދަލަށް ގެއްލުންދިނުމުގެ 45 މައްސަލައެއް ހުށަހަޅާފައިވެއެވެ.
އޭޕްރީލް މަހާ އަޅާބަލާއިރު މޭ މަހުގައި ހުށަހަޅާފައިވާ މައްސަލަތައްވަނީ މަދުވެފައެވެ. އެގޮތުން އޭޕްރީލު މަހުގައި ޖުމްލަ 976 މައްސަލައެއް ފުލުހަށް ހުށަހަޅާފައިވެއެވެ. އެހެންކަަމުން މަހުން މަހަށް ބަލާއިރު ފުލުހަށް ހުށަަހެޅި މައްސަލަ 22 އިންސައްތަވަނީ މަދުވެފައެވެ.
ވަކިވަކި މައްސަލަތަކަށް ބަލާއިރު ވައްކަމުގެ މައްސަލަތައް ހުށަހެޅި މިންވަރާއި މަގުމަތީގައި ހިނގާ ހާދިސާތައް ރިޕޯޓުކޮށްފއިވާ މިންވަރާއި މަސްތުވާތަކެތީގެ މައްސަލަތައް ރިޕޯޓުކޮށްފައިވާ މިންވަރުވެސް އޭޕްރީލު މަހަށްވުރެ މޭ މަހުވަނީ މަދުވެފައެވެ.