ތިލާމާލޭ ބުރިޖުގެ މަޝްރޫޢު ލަސްވެފައިވާކަމަށް ދެކެވޭ ވާހަކަ މިިނިސްޓަރު ދޮގުކުރައްވައިފި

މާލެއާއި ވިލިމާލެއާއި ގުޅިފަޅު އަދި ތިލަފުށި ގުޅުވައިލުމަށް އަޅަމުންދާ ތިލަމާލޭ ބުރިޖުގެ މަސައްކަތް މަޑުޖެހި ޝެޑިއުލަށްވުރެ ލަސްވެފައިވާކަމަށް ފެތުރޭ ވާހަކަތައް ކޮންސްޓްރަކްޝަން އެންޑް އިންފްރަސްޓްރަކްޗާ މިނިސްޓަރު ޑރ.އަބްދުﷲ މުއްތަލިބު ދޮގުކުރައްވައިފިއެވެ. 

ބައެއް ނޫސްތަކުން ރިޕޯޓުކުރި ގޮތުގައި މޫސުން ގޯސްވުމުގެ ސަބަބުން ތާވަލާ އެއްގޮތަށް ބުރިޖުގެ މަސައްކަތް ނުކުރެވި މިހާރު މަޑުޖެހިފައިވެއެވެ. އަދި އެކަމުގެ ސަބަބުން ބުރިޖު މަޝްރޫޢުގެ ތާވަލަށް އެ މަސައްކަތް ނުނިމޭނެކަމަށް މިނިސްޓްރީގެ ބައެއް މަސްދަރުތަކާ ހަވާލާދީ ރިޕޯޓުކޮށްފައިވެއެވެ. 

އެންމެ ފަހުން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މިނިސްޓަރު މުއްތަލިބު ވިދާޅުވެފައިވަނީ ބުރިޖުގެ މަސައްކަތް ތާވަލާ އެއްގޮތަށް މިހާރުވެސް ކުރިއަށްދާ ކަމަށެވެ. އަދި ތާވަލުކުރެވިފައިވާ ގޮތަށް ބުރިޖުގެ މަސައްކަތް ނިންމައިލެވޭނެ ކަމަށެވެ. 

އޭނާ ވިދާޅުވި ގޮތުގައި ތިލަމާލެ ބުރިޖުގެ މަސައްކަަތްކުރަނީ ދެ ސެގްމެންޓަކަށް ބަހާލައިގެންނެވެ. ފުރަތަމަ ސެގްމެންޓަކީ މާލެއިން ގުޅިފަޅާ ހަމައަށް ގުޅުވައިލުމެވެ. އެ ސެގްމެންޓުގެ މަސައްކަތް ނިންމުމަށް ކަނޑައަޅާފައިވަނީ 2026 ވަނަ އަހަރުގެ 31 މާޗަށެވެ. އަދި އަންނަ އަހަރުގެ ނިޔަލަށް މާލެއާއި ވިލިމާލެ ގުޅުވައިލުމުގެ މަސައްކަތް ނިމޭނެކަމަށްވެސް ޑރ.މުއްތަލިބު ވިދާޅުވިއެވެ. 

ބުރިޖުގެ ދެވަނަ ސެގްމެންޓަކީ ގުޅިފަޅާއި ތިލަފުށި ގުޅުވައިލުމެވެ. މިނިސްޓަރު ވިދާޅުވި ގޮތުގައި އެ މަސައްކަތް ނިމޭނީ 2026 ވަނަ އަހަރުގެ ސެޕްޓެންބަރު މަހުގެ 30 ވަނަ ދުވަހާ ހަމައަށެވެ. 

ބުރިޖުގެ މަސައްކަތް މަޑުޖެހި ތާވަލަށްވުރެ ލަސްވަމުންދާކަމަށް ބުނެ ބައެއް މީޑިއާއިން ރިޕޯޓުކުރުމާ ގުޅިގެން އެކްސްއަށް ކުރެއްވި ޕޯސްޓެއްގައި މުއްތަލިބު ވިދާޅުވީ އެއީ ސައްހަ ޚަބަރެއް ނޫން ކަމަށެވެ. 

އޭނާ ވިދާޅުވި ގޮތުގައި މި މަހު މޫސުން ގޯސްވުމުގެ ސަބަބުން މަސައްކަތް ލަސްވި ނަމަވެސް އެ މަޝްރޫޢު ތާވަލަށްވުރެ ލަސްވެފައިނުވާ ކަމަށެވެ. އަދި ބުރިޖުގެ މަސައްކަތް ނިންމުމަށް ކަނޑައަޅާފައިވާ މުހުލަތުގައި ނިންމައިލެވޭނެކަމުގެ ޔަގީންކަން އެބައޮތް ކަމަށެވެ.