20 ވަނަ ރައްޔިތުންގެ މަޖިލިސް: މަޖިލީހުގެ 21 ވަނަ ރައީސް

ދިވެހިރާއްޖޭގެ އާބާދުވެ ވެރިކަމެއް ގާއިމުވީއްސުރެ މިރާއްޖޭގައި ވެރިކަން ހިނގަމުންދިޔައީ ދުސްތޫރީ ހަމަތަކާއި
އުސޫލުތަކެއްގެ ތެރެއިންނެވެ. މިކަން ދިވެހި ތާރީޚުން ސާބިތުވެއެވެ. ދިވެހިރާއްޖޭގެ ހާސް އަހަރުވީ ރަސްކަމުގެ ތާރީޚު ހެކި ދެއެވެ.

ރާއްޖޭގެ ފުރަތަމަ ގާނޫނުއަސާސީގެ ދުވަސްވަރު 1932 ގެ ލިޔުމެއްގައިވެއެވެ: "މިރާއްޖޭގައި ރަސްރަސްކަލުން ރަަސްކަން ކުރައްވާފައި ވަނީ އެ ރަސްރަސްކަލުން ހިންގަވާ ބޮޑެތި ކަންތައްތަކުގައި ރައްޔިތުންގެ ރުހުމާއި ގަބޫލު ހޯއްދަވައިގެންނެެވެ." 

ދިވެހިރާއްޖޭގެ ވެރިކަން ލިޔެވިގެންވާ ގާނޫނުއަސާސީއެއްގެ ދަށުން ހިންގަން ފެށުނީ އަދި ދިވެހިރާއްޖޭގެ ގާނޫނުއަސާސީއެއް ހިންގަން ފެށުނީ ރައްޔިތުންގެ މަޖިލިސް ވަޒީރުންގެ މަޖިލިސް ވުޒާރާތައް އުފެދުނީ ޑިސެންބަރު 22، 1932 ގައެވެ. މިއަހަރު 92 އަހަރު ފުރޭނެއެވެ.

ޑިސެންބަރު 22، 1932ގައި އުފެދުނު ރާއްޖޭގެ ފުރަތަމަ ޕާލަމަންޓުގައި ދެ ގެ ހިމެނެއެވެ. މަތިގެއަކީ "ގާނޫނު ހަދާ މަޖިލިސް" އެވެ. އަދި ތިރިގެއަކީ "ރައްޔިތުންގެ މަޖިލިސް" އެވެ. ފުރަތަމަ ޖުމުހޫރިއްޔާ 1953 ގައިވެސް ރާއްޖޭގެ ޕާލަމަންޓުގައި ދެ ގެ ހިމެނެއެވެ. މަތިގެއަކީ "ސެނެޓް"އެެވެ. ތިރިގެއަކީ "ރައްޔިތުންގެ ގެ"އެވެ. 

އެއިގެ ފަހުން މިހާތަނަށް މިހާރުގެ ގާނޫނުއަސާސީއާއި ހަމަޔަށް ގާނޫނުއަސާސީ އާއި މެނުވީ ހުރިހާ ގާނޫނެއް ހަދަނީ ރައްޔިތުންގެ މަޖިލީހުންނެވެ. ގާނޫނުއަސާސީއެއް އެކުލަވާލަން ނުވަތަ އިސްލާހުކުރަން ވެއްޖެނަމަ އެކަމަށްޓަކައި ޚާއްޞަކޮށް ރައްޔިތުންގެ ޚާއްޞަ މަޖިލީހެއް އެއްކުރަނީއެވެ. އެއީ މުޅި ރައްޔިތުންގެ މަޖިލީސް ހިމެނޭ އަދި އެ އަދަށް އަލުން އިންތިޚާބުކުރާ މެންބަރުންނާއި އައްޔަން ކުރާ މެންބަރުން ވެސް ހިމެނޭ ޚާއްޞަ މަޖިލީހެކެވެ.

1932 ދިވެހި އެންމެ ފުރަތަމަ ޤާނޫނުއަސާސީއާއެކު ޝަމްސުއްދީން މަހާރަދުންގެ ފަރާތްފުޅުން އިއްވެވި އެންމެ ފުރަތަމަ "ޚުޠުބަތުލްޢަރުޝް" ބަޔާން ވެގެންވިއެވެ:

"ކުރިޔަށް މިއަންނާން އޮތް ފަސް އަހަރަކީ، ވަރަށް ވިސްނަައިގެން ކަންތައް ހިންގާންވީ ފަސް އަހަރެވެ. މިހެނީ، ދުނިޔެއަށް އައިސްފައިވާ ދަތިކަމާއި، އޮޅުދޫކަރައިގެ ތަދުކަމުން، މި ދައުލަތަށް ލިބޭ އާމުދަނީއަށް ލިބެމުން ދަނީ އުނި ކަމެވެ.
މި ވެއަތުވެދިޔަ ތިޔާގެ ދުވަަސްތަކެއްގެ ތަނަވަސްކަން ބޮޑުކަމުން މީސްތަކުންނަށް ދަސްވެ ހޭނިފައި ވަނީ ވަރަށް ޚަރަދު ބޮޑު އުޅުމެކެވެ. މިހެންވީއިރު، ހަމަ އެންމެންމެ މިކަން ކަމަށް ވިސްނައި، އުޅުން ސުލްހަކޮށް ޚަރަދު ކުޑަކޮށް، ތަކެތި ލިބޭނޭ ގޮތްތަކާއި މަސައްކަތްތަކަށް ފިކުރު ފޯރުވައި، ދައުލަތް ހިންގާން ތިބިމީހުން ދައުލަތުގެ ޚަރަދު ވެވުނު ވަރަކުން ކުޑަކޮށް، ރައްޔިތުންނަށް ބުރަ ވެދާނޭ ގޮތުން ހިފެވިފަައި ހުންނަ ފުޒޫލުތަކެތި ހިފުން ވެވުނު ވަރަކުން ކުޑަކޮށް، އެމީހުންނަށް (ރައްޔިތުންނަށް) ލުއި ކޮށްދީގެންނެވެ.
ރާއްޖޭގެ ތަޢުލީމާއި، ބޭސް ފަރުވާގެ ކަންކަމާައި، އަތު މަސަައްކަތާއި، ގޮވާން ކުރެވުމާއި، ރުއް އެރުވުމާއި، މަސްވެރިކަމާއި، އޮޑިދޯނި ބަައްތެލިފަހަރާއި މި އެންމެހައި ކަންކަން ވާނީ ރަނގަޅަށް ކުރި އަރުވާށެވެ. މަގޭ ރައްޔިތުންނަށާއި، މި ދައުލަތުގައި ތިބޭ ބޭރު ރައްޔިތުންނަށް ހަމައެއްވެސް ބާވަތަކުން އަނިޔާއެއް ކޮށްގެން ހަމަހިލައި ނުވާނެ އެވެ."

1968 މި ޖުމުހޫރިއްޔާއާއެކު 1969 ގައި ރައްޔިތުންގެ މަޖިލިސްގެ މެންބަރުން އިންތިޚާބު ކުރުމަށް ވޯޓު ފޮށި ބަހައްޓައިގެން ވޯޓުލާން ފެށި 5 އަހަރުން 5 އަހަރަށް ރައްޔިތުންގެ މަޖިލިސް ހިނގަމުންދާތާ މިއީ55 ވަނަ އަހަރެވެ.

ވީމާ 12 ދޮޅޮސް ފަހަރު ރައްޔިތުންގެ މަޖިލިސް އިންތިޚާބު 5 އަހަރުން 5 އަހަރަށް 55 އަހަރުވުމެވެ.

1932 އިން ފެށިގެން މި ހާތަނަށް ދެމިގެން މި އައިސް މިނިމުނީ 19 ރައްޔިތުންގެ މަޖިލިސް އެވެ. މިފެށެނީ 20 ރައްޔިތުންގެ މަޖިލިސްއެވެ. މި ފަހަރު 20 ވަނަ ރައްޔިތުންގެ މަޖިލިސްގެ ރައީސަކީ ރައްޔިތުންގެ މަޖިލިސްގެ 21 ވަނަ ރައީސެވެ.