އަދަބެއްގެ ގޮތުން ޗައިނާއިން އަސްކަރީ ހަރަކާތާއެކު ތައިވާނު ވަށާލައިފި

އަދަބެއްގެ ގޮތުން ތައިވާނުގެ ވަށައިގެން ޗައިނާއިން ދެ ދުވަހުގެ އަސްކަރީ ތަމްރީނުތަކެއް ފަށައިފިއެވެ. އަސްކަރީ ތަމްރީނުތައް ފަށާފައި މިވަނީ ވިލިއަމް ލައި ޗިންގް-ޓޭ ތައިވާނުގެ ރައީސްކަމުގެ ހުވާ ކުރެއްވިތާ ތިން ދުވަސް ފަހުންނެވެ.

ތައިވާނުގެ އަމިއްލަ ވެރިކަން ކުރާ ޖަޒީރާ ސަރަހައްދުގެ ވަށައިގެންވާ ކަނޑާއި ވައިގެ ސަރަހައްދުގައި ޗައިނާއިން ދެ ދުވަހުގެ އަސްކަރީ ތަމްރީނުތަކެއް ފަށާފައިވާ ކަމަށް ޗައިނާގެ ދައުލަތުގެ މީޑިއާއިން ރިޕޯޓް ކުރެއެވެ. 

ޗައިނާގެ ދައުލަތުގެ ނޫސް އެޖެންސީ ޒިންހުއާ އިން ބުނީ ޕީޕަލްސް ލިބަރޭޝަން އާމީގެ އީސްޓަން ތިއޭޓާ ކޮމާންޑުން ބުރާސްފަތި ދުވަހުގެ ހެނދުނު 7:45 ގައި ތައިވާން ކަނޑުއޮޅި އާއި ތައިވާނުގެ އުތުރާއި ދެކުނު އަދި އިރުމަތީގެ އިތުރުން ކިންމެން، މަޓްސޫ، ވޫކިއު އަދި ޑޮންގްޔިންގެ ރަށްތަކުގެ ވަށައިގެންވާ ސަރަހައްދުތަކުގައި މި ތަމްރީނުތައް ފަށާފައިވާ ކަމަށެވެ.

އަސްކަރިއްޔާގެ ތަރުޖަމާނު ކާނަލް ލީ ޝީ ވިދާޅުވީ އަސްކަރިއްޔާ، ނޭވީ، ވައިގެ އަސްކަރިއްޔާ އަދި ރޮކެޓް ފޯސް ގުޅިގެން ކުރިއަށް ގެންދާ މި ތަމްރީނުތަކަކީ "ތައިވާން އިންޑިޕެންޑެންސް" ބާރުތަކުން ހިންގާ ވަކިވެގަތުމުގެ އަމަލުތަކަށް ދޭ ވަރުގަދަ އަދަބެއް ކަމަށާއި ބޭރުގެ ނުފޫޒު ފޯރުވުމާއި ހިތްވަރު ދިނުމާ ދެކޮޅަށް ދޭ ހަރުކަށި އިންޒާރެއް ކަމަށެވެ.

"ޖޮއިންޓް ސްވޯޑް-2024އޭ" ގެ ކޯޑް ނަމުން ނަން ދީފައިވާ މި ތަމްރީނުތަށް ފަށާފައި ވަނީ ތައިވާނުގެ އާ ރައީސް ވިލިއަމް ލައި ޗިންގް-ޓޭ މަގާމުގެ ހުވާ ކުރައްވައި، ޗައިނާއިން އަމިއްލަ ރަށެއް ކަމަށް ބުނާ ޓައިވާނަށް "ބިރު ދެއްކުން" ހުއްޓާލުމަށް ބެއިޖިންއަށް ގޮވާލިތާ ތިން ދުވަސް ފަހުންނެވެ.

އެއްބައިވަންތަކަމުގެ އަމާޒަށް ވާސިލްވުމަށް ބާރުގެ ބޭނުން ކުރާނެ ކަމަށް ބެއިޖިންއިން އިންކާރު ނުކުރާ އިރު، ލައި ހުވާ ކުރުމާ ގުޅިގެން ބެއިޖިން އިން ވަނީ ރުޅިވެރިކަމާއެކު ރައްދު ދީފަ އެވެ.

ތައިވާނުގެ ދިފާއީ ވުޒާރާއިން ބުނީ ޗައިނާއިން ކުރިއަށް ގެންދާ ތަމްރީނުތަކާ ގުޅިގެން އެ ގައުމުގެ އަސްކަރިއްޔާ "ހައި އެލާޓަށް" އައިސްފައިވާ ކަމަށާއި އެއީ ސަރަހައްދީ ސުލްހަ އާއި ހަމަޖެހުމަށް ބުރޫ އަރާ ފަދަ އަމަލުތައް ކަމަށް ވެސް ތައިވާނުން ސިފަ ކޮށްފައިވެ އެވެ.

މި ތަމްރީނުތައް ފެށުމުން ލައި ޗިންގްޓޭ ވިދާޅުވީ "ބޭރުގެ" ގޮންޖެހުންތަކާއި ނުރައްކާތަކާއެކު ވެސް މިނިވަން ކަމާއި ޑިމޮކްރަސީގެ އަސާސްތައް ދިފާއު ކުރުމުގައި ދެމި ހުންނަވާނެ ކަމަށެވެ. އަދި ކޮމާންޑާ އިން ޗީފްގެ ހައިސިއްޔަތުން "ގައުމު ހިމާޔަތް ކުރުމަކީ" އޭނާގެ މަސްއޫލިއްޔަތެއް ކަމަށެވެ.