ފުލުހުން ބުނީ ދަނގެތީ ހެލްތު ސެންޓަރަށް ގެންދިޔަ އިރުވެސް އެމީހާ އޮތީ ނިޔާވެފައި ކަމަށެވެ.
ރިސޯޓެއްގައި މޫދަށް އެރި އުޅުނު ފަތުރުވެރިއަކު ގެނބިގެން ސަލާމަތްކުރަން މަސައްކަތް ކުރި ދިވެހި މުވައްޒަފަކު މަރުވެއްޖެ އެވެ.
ފުލުހުން މިއަދު މީޑިއާތަކަށް ފޮނުވި މެސެޖެއްގައި ބުނީ، އދ. ސެންޓަރާ ރިސޯޓުގައި ފަތުރުވެރިއަކު ގެނބިގެން އުޅެނިކޮށް ސަލާމަތްކުރުމަށް މަސައްކަތް ކުރި ދިވެހި މުވައްޒަފަކު ގެނބި، ހާލު ދެރަވެގެން ދަނގެތީ ހެލްތު ސެންޓަރަށް ގެންދިޔަ އިރު އެމީހާ އޮތީ މަރުވެފައި ކަމަށެވެ.
މި ހާދިސާގައި ނިޔާވީ އުމުރުން 39 އަހަރުގެ ދިވެހި ފިރިހެނެކެވެ.
ފުލުހުން ބުނީ ގެނބުނު ފަތުރުވެރިޔާގެ ހާލު ރަނގަޅު ކަމަށެވެ. އަދި މިކަމުގައި ބަލަން ޖެހޭ ކަންކަން ބަލަމުންދާކަަމަށް ވެސް ފުލުހުން ބުނެ އެވެ.
މި ދުވަސްވަރު ހާއްސަކޮށް އުތުރާއި މެދުރާއްޖެތެރޭގެ ސަރަހައްދުތަކަށް މޫސުން ގޯސްކަމުން، މޫދަށް ނޭރުމަށާއި ފަޅު ރަށްރަށާއި ފިނޮޅު ފަދަ ތަންތަނަށް ވެސް ނުދިއުމަށް ފުލުހުންނާއި ކަމާބެހޭ އިދާރާތަކުން އަންނަނީ އިލްތިމާސްކުރަމުންނެވެ.