ޗައިނާގެ ބިރު ދެއްކުން ހުއްޓާލަން ޓައިވާނުގެ އާ ރައީސް ގޮވާލައްވައިފި

ޓައިވާނުގެ ވެރިކަން ކުރާ ޕާޓީން ތާރީހީ ތިންވަނަ ދައުރަކަށް ހުވާ ކުރެއްވުމަށް ފަހު، ޗައިނާއިން "ބިރުދެއްކުން" ހުއްޓާލަން ޓައިވާނުގެ އާ ރައީސް ގޮވާލައްވައިފި އެވެ.

ކުރީގެ ނައިބު ރައީސްކަން ވެސް ކުރައްވާފައިވާ ލައިގެ ހުވާ ކުރެއްވުމުގެ ރަސްމިއްޔާތު މިދިއަ ހޯމަ ދުވަހު ބާއްވާފައި ވަނީ މިހާރުގެ އާ ނައިބު ރައީސް ސިއާއޯ ބިކިމްއާ އެކުގަ އެވެ. ސިއާއޯއަކީ ކުރިން ޓައިވާނުން އެމެރިކާއަށް ކަނޑައަޅާފައި ހުންނެވި އެންވޯއީގެ މަގާމު އަދާ ކުރެއްވި ބޭފުޅެކެވެ.

ލައިގެ 30 މިނެޓުގެ އިފްތިތާހީ ތަގުރީރުގައި ވިދާޅުވެފައި ވަނީ ޓައިވާންގައި ސުލްހަ ގާއިމު ކުރުމަށް ހާއްސަ އިސްކަމެއް ދެއްވާނެ ކަމަށާއި ޓައިވާނަށް ޑިމޮކްރަސީގެ ރަންޒަމާން މި އައީ ކަމަށެވެ. އަދި ޓައިވާނަކީ ޑިމޮކްރަސީގެ ބައިނަލްއަގުވާމީ ޗެއިންގެ "މުހިންމު ލިންކެއް" ގެ ގޮތުގައި ސިފަ ކުރައްވައި، އެ ގައުމުގެ ސިޔާދަތު ދިފާއު ކުރުމުގެ އަޒުމް ތަކުރާރު ކުރެއްވި އެވެ.

"ރިޕަބްލިކް އޮފް ޗައިނާ ޓައިވާންގެ މުސްތަގުބަލް ނިންމާނީ މި ގައުމުގެ 23 މިލިއަން ރައްޔިތުން. އަޅުގަނޑުމެން ނިންމާ މުސްތަގުބަލަކީ ހަމައެކަނި ގައުމުގެ މުސްތަގުބަލެއް ނޫން، ދުނިޔޭގެ މުސްތަގުބަލް،" ޓައިވާންގެ ރަސްމީ ނަން ބޭނުން ކުރައްވަމުން ލައި ވިދާޅުވި އެވެ. 

މިދިޔަ ޖެނުއަރީ މަހު ބޭއްވި އިންތިހާބުގައި އިދިކޮޅު ކުއޯމިންޓަންގް (ކޭއެމްޓީ) ޕާޓީ އާއި ޓައިވާން ޕީޕަލްސް ޕާޓީ ވާދަވެރިންގެ މައްޗަށް ލައި ކާމިޔާބު ހޯއްދެވީ ދިރިއުޅުމުގެ މައްސަލަތަކާއި، ޗައިނާގެ ރައީސް ޝީ ޖިންޕިންގެ ވެރިކަމުގައި ބާރު ގަދަކޮށް އޮތް އަވަށްޓެރި ޗައިނާއާ މެދު އަމަލު ކުރާނެ ގޮތަކާ މެދު އުފެދިފައިވާ ސުވާލުތަކަށް ހައްލު ހޯދުމުގެ ވައުދުތަކާއެކު އެވެ.

ޑީޕީޕީ އަލުން އިންތިހާބު ވުމުން ހަމަނުޖެހުންތަކުގެ ނުރައްކާ ބޮޑުވާނެ ކަމަށް ބެއިޖިންއިން ދިން އިންޒާރުތަކަށް ވޯޓުލާ މީހުން ވަނީ ދެކޮޅު ހަދާފަ އެވެ. ޑީޕީޕީން ދެކޭ ގޮތުގައި ޓައިވާނަކީ ޗައިނާގެ ނުރައްކާތަކުން ދިފާއުވެ ވަރުގަދަ ޑިމޮކްރެޓިކް ގައުމުތަކާ އެކު ގުޅުން ބަދަހިކުރަން ޖެހޭ ޑިފެކްޓޯ ސިޔާދަތީ ގައުމެކެވެ.

"ޓައިވާނާ ދެކޮޅަށް ސިޔާސީ އަދި އަސްކަރީ ގޮތުން ބިރުދެއްކުން ހުއްޓާލައި، ޓައިވާން ސްޓްރައިޓް (ކަނޑުއޮޅި) އާއި އެ ސަރަހައްދުގެ ސުލްހަ މަސަލަސްކަން ދެމެހެއްޓުމުގެ ބައިނަލްއަގުވާމީ މަސްއޫލިއްޔަތު އަދާ ކުރުމުގައި ޓައިވާން ބައިވެރިކޮށް ހަނގުރާމައިގެ ބިރުވެރިކަމުން ދުނިޔެ ސަލާމަތް ކުރަން ގޮވާލަން،" ލައި ގެ އިފްތިތާހީ ތަގުރީރުގައި ވިދާޅުވި އެވެ.