ޑިވެލޮޕްމަންޓް ބޭންކަކީ ކުރިމަގަށް އަޅާ މުހިންމު ފިޔަވަޅެއް: ފައިސަލް

ޑިވެލޮޕްމެންޓް އިންވެސްޓްމަންޓް ބޭންކެއް އުފެދެވުމަކީ ދިވެހި އިގްތިސޯދުގެ މުސްތަގުބަލަށް އެޅި މުހިންމު ފިޔަވަޅެއް ކަމަށް ޓޫރިޒަމް މިނިސްޓަރު އިބްރާހިމް ފައިސަލް ވިދާޅުވެއްޖެ އެވެ. 

ރާއްޖޭގައި އިންވެސްޓުމަންޓު ބޭންކެއް ގާއިމް ކުރުމަށް މި ސަރުކާރުން ހިފާފައިވާ އަމާޒުގެ ދަށުން އިއްޔެ ރައީސް ޑރ. މުހައްމަދު ވަނީ ޑިވެލޮޕްމަންޓު ބޭންކު އޮފް މޯލްޑިވްސް ލިމިޓެޑް އުފައްދަވާފަ އެވެ. 

އެކަން ފާހަގަ ކުރައްވަމުން ޓޫރިޒަމް މިނިސްޓަރު ފައިސަލް ވިދާޅުވީ، ޑިވެލޮޕްމަންޓު ބޭންކެއް ރާއްޖޭގައި ގާއިމް ކުރުމަކީ ރައީސް މުއިއްޒުގެ ދުރުވިސްނޭ ސިޔާސަތުތަކުގެ ދަށުން އެޅުއްވި ވަރަށް މުހިންމު ފިޔަވަޅެއް ކަމަށެވެ. 

"މިކަމުން ސާބިތު ކޮށްދެނީ އިގްތިސޯދު ކުރިއެރުވުމަށް ރައީސް ޑރ. މުހައްމަދު މުއިއްޒު ދެއްވާ ދެގޮތެއް ނުވާ އަހައްމިއްޔަތު... ރާއްޖެއަށް އޮތީ ފާގަތި މުސްތަގުބަލެއް،" ފައިސަލް ވިދާޅުވި އެވެ. 

ޑިވެލޮޕްމަންޓު ބޭންކަކީ ސައްތައިންސައްތަ ސަރުކާރު ކުންފުންޏެކެވެ. 

މި ކުންފުނި އުފެއްދުމުގެ ބޭނުނަކީ ސަރުކާރުގެ ސިޔާސަތުތަކާ އެއްގޮތްވާ ގޮތުގެ މަތީން، ދެމެހެއްޓެނިވި އިގްތިސާދީ އަދި އިޖްތިމާއީ ތަރައްގީއަށް އިންވެސްޓު ކުރުމާއި، އުމްރާނީ ތަރައްގީއަށް ބޭނުންވާ ފައިސާ ހޯދުމާއި، ސިންޑިކޭޝަން ފައިނޭންސް މެދުވެރިކޮށް ޕީއެސްއައިޕީ މަޝްރުއޫތަކަށް ފައިސާ ފޯރު ކޮށްދިނުމަށް ދިމާވާ ގޮންޖެހުންތައް ހައްލު ކުރުމެވެ. 

މިއީ ދިވެހިރާއްޖޭގެ ބޭންކިން ނިޒާމުގައި ބޭރު ފައިސާ ބެހެއްޓުމުގެ ޝައުގުވެރިކަން އިތުރު ކުރުމަށް އެޅި މުހިންމު ފިޔަވަޅެއް ކަމަށް ސަރުކާރުން ބުނެ އެވެ. 

ބޭންކިން ނިޒާމަށް ޑިވެލޮޕްމަންޓު ބޭންކެއްގެ މުހިންމު ކަމަކީ ރައްޔިތުންނަށް ބޭނުންވާ ތަރައްގީ ގެނައުން ކަމަށް ސަރުކާރުން ބުނެ އެވެ. މި ބޭންކު ގާއިމު ކުރެވުމުން، ތަރައްގީއަށް ބޭނުންވާ ލޯނާއި ފައިސާ ދިނުމުގައި މިހާރަށްވުރެ ފަސޭހަވާނެ ކަަމަށް ވެސް ބުނެ އެވެ.