މަޑިފުއްޓަށް ޑްރަގް ގެންދިޔަ މީހަކު 27 އަހަރާ 11 މަހަށް ޖަލަށް

ތ. މަޑިފުއްޓަށް މަސްތުވާތަކެތި ގެންދިޔަ މީހަކު 27 އަހަރާ 11 މަހަށް ޖަލާން ހުކުމް ކޮށްފި އެވެ.

މި ހުކުމް ކުރީ މަޑުފުށީ ކޯޓުންނެވެ. މަޑިފުއްޓަށް މަސްތުވާތަކެތި ގެންދިއުމުގެ މައްސަލާ ގައި ދިގު މުއްދަތުގެ ޖަލު ހުކުމެއް އައީ އެ އަތޮޅު ތިމަރަފުށީ ދޮންވެލި، ހުސައިން ޝަރޫންގެ މައްޗަށެވެ.

މި އަހަރުގެ ފެބްރުއަރީ ފަސް ވަނަ ދުވަހުގެ ވަގުރެއް ގައި ޝަރޫން، މަޑިފުއްޓަށް މަސްތުވާތަކެތި އެެތެރެކުރާ ކަމުގެ މައުލޫމާތު އެ ރަށު ޕޮލިހަށް ލިބިގެން އޭނާ މަޑިފުއްޓަށް އައުމާ އެކު ބަނދަރު މަތީން ހުއްޓުވައި ބަލާ ފާސްކުރި އެވެ. ފުލުހުން ބުނީ އޭނާގެ އަތުން މަސްތުވާތަކެތި ފެނިފައިވާ ކަަމަށެވެ.

އެ މައްސަލާ ގައި ޝަރޫންގެ މައްޗަށް ދައުވާ އުފުލި އެވެ. މަޑިފުށީ ކޯޓުން މިއަދު ނިންމީ އެ މައްސަލަ ޝަރޫންގެ މައްޗަށް ސާބިތުވާ ކަމަށެވެ. އެހެން ކަމުން 27 އަހަރާއި 11 މަހާއި 20 ދުވަހަށް ޖަލަށް ލުމަށެވެ.