ބަޖެޓުގެ 800 މިލިއަންގެ އަމާޒެއް، ބްލޫ ކާބަން ވިއްކޭތޯ ބަލަން ސޮޔެއް

ރާއްޖޭގެ ކަނޑުތަކުންނާއި މޫދު ވިނަތައް ހުންނަ ސަރަހައްދުތަކުން އުފައްދާ ކާބަން ކްރެޑިޓްސް ބޭރަށް ވިއްކޭނެތޯ ބަލަން، އިސްލާމިކް ޓްރޭޑް ފައިނޭންސް ކޯޕަރޭޝަން (އައިޓީއެފްސީ) އެކު އެމްއޯޔޫއެއްގައި ސޮއި ކޮށްފި އެވެ.

މި އެމްއޯޔޫގައި ދިވެހި ސަރުކާރުގެ ފަރާތުން ސޮއި ކުރެއްވީ ފިނޭންސް މިނިސްޓަރު ޑރ. މުހައްމަދު ޝަފީގެވެ. އައިޓީއެފްސީގެ ފަރާތުން ސޮއި ކުރެއްވީ ސީއީއޯ ހާނީ ސަލީމް ސޮންބޮލް އެވެ.

ކާބަން ކްރެޑިޓު ވިއްކައިގެން ދައުލަތަށް އާމްދަނީ ހޯދުމަކީ ފިނޭންސް މިނިސްޓްރީން ނެރެފައިވާ 2024-2026 ގެ ގެ ފިސްކަލް ސްޓްރެޓީގެ އާމްދަނީ އިތުރު ކުރަން ހުށަހަޅާފައިވާ އާ ކަންތައްތަކުގައި ހިމެނޭ ކަމެކެވެ. ފިނޭންސުން ވަނީ ކާބަން ކްރެޑިޓު ވިއްކަައިގެން އާމްދަނީއަށް 863.5 މިލިއަން ރުފިޔާ ލިބޭނެ ކަމަށް އަންދާޒާ ކޮށްފަ އެވެ. މިއީ ބޭރަށް ފެހި ހަކަތަ ވިއްކައިގެން އާމްދަނީ ހޯދަން ސަރުކާރުން މަސައްކަތް ކުރާ ފުރަތަމަ ފަހަރެވެ.

ކާބަން ކްރެޑިޓް ވިއްކުން - މި ކަމަކީ ދުނިޔޭގެ ބައެއް ގައުމުތަކުގައި އާމްދަނީ ހޯދުމަށް ބޭނުން ކުރާ ވަސީލަތެކެވެ. އަދި މިކަމަކީ ރާއްޖެ ފަދަ ތިމާވެށީގެ ގޮތުން ހިމާޔަތްވެފައިވާ ގައުމުތަކުގައި ކުރެވިދާނެ ކަމެއްގެ ގޮތުގައި ދިރާސާތަކުން ދައްކަ އެވެ. މިކަން ކުރާ ކުޅިތަކާއި މޫދުވިނަ ހުރި ކަނޑުގެ ސަރަހައްދުތައް ހިމާޔަތްކޮށްގެން ނުވަތަ އެ ސަރަހައްދުތައް އިޔާދަކޮށްގެން، މި ތަންތަނުން ކާބަން ރައްކާކުރާ މިންވަރު ހިސާބުކުރުމަށް ފަހު "ކާބަން ކްރެޑިޓްސް" ދުނިޔޭގެ ބާޒާރުގައި ވިއްކުމެވެ. 

ކާބަން ކްރެޑިޓު ގަންނަނީ ކާބަން އެމިޝަންސް ނުވަތަ ޖައްވަށް ގިނައިން ވިހަ ގޭސްތައް ދޫކުރާ ކުންފުނިތަކުން، ރެގިއުލޭޓަރުންގެ މިންގަނޑުތަކާ އެއް ހަމައަށް އެމިޝަންސް ތިރިކުރުމަށެވެ. މި ބާވަތުގެ ހަކަތަ ކުންފުނިތަކެކޭ އެއްގޮތަށް، ކާބަން އެމިޝަން މަތި ގައުމު ތަކުންވެސް ގަންނާނެ އެވެ.