ރާއްޖޭގެ މާލީ ބާޒާރު ވަރުގަދަ ކުރަން އިނގިރޭސިންގެ އެހީ ހޯދަނީ

ރާއްޖޭގެ މާލީ ބާޒާރެއް ގާއިމްކޮށް ފައިނޭންޝަލް ސެންޓަރު ހަދަން އިނގިރޭސިވިލާތުގެ ފަންނީ އެހީ ހޯދަން މަޝްވަރާކޮށްފި އެވެ. 

ކޮމަންވެލްތުގެ ޓްރޭޑް އެންޑް އިންވެސްޓްމަންޓް ރައުންޑްޓޭބަލްގައި ބައިވެރިވެވަޑައިގަތުމަށް އިކޮނޮމިކް މިނިސްޓަރު މުހައްމަދު ސައީދު މިހާރު އިނގިރޭސިވިލާތައް ކުރައްވަމުން ގެންދަވާ ދަތުރުފުޅުގައި ވަނީ ކޮމަންވެލްތު ގައުމުތަކުގެ މާލީ ކަންކަމާބެހޭ މުހިންމު ބައްދަލުވުމެއްގައި ބައިވެރިވަޑައިގަންނާވެ އެވެ. 

މިނިސްޓަރު ސައީދުގެ މި ދަތުރުފޫޅުގެ އެންމެ ބޮޑު އަމާޒަކީ، ރާއްޖޭގެ އިގްތިދާއި އުމްރާނީ ތަރައްގީ ކުރިއެރުވުމަށް، ދިވެހި މާލީ ބާޒާރު ތަނަވަސްކުރުމުގައި އިނގިރޭސިވިލާތުގެ މާލީ ދާއިރާގެ ބައިވެރިންގެ އެހީތެރިކަން ހޯދުން ކަމަށް އިކޮނޮމިކް މިނިސްޓްރީން ބުނެ އެވެ. 

އެ މިނިސްޓްރީން ބުނީ، މިނިސްޓަރުގެ މި ދަތުރުފުޅުގައި އެންމެ ބޮޑަށް މަޝްވަރާކުރައްވަނީ، ރާއްޖޭގައި އިންޓަނޭޝަނަލް ފައިނޭޝަލް ސާވިސް އޮތޯރިޓީއަކާއި ޑިވޮލޮޕްމަންޓު ބޭންކެއް ގާއިމްކުރުން ކަމަށެވެ. 

މިނިސްޓަރުގެ މި ދަތުރުފުޅުގައި އިންފްރާސްޓްރަކްޗާ ޒަމާނީކުރުމާއި، އިންޓަރނޭޝަނަލް ފައިނޭންޝަލް ސެންޓަރުތައް އުފެއްދުމަށް ޒަމާނީ، ސްޓްރެޓެޖީއާއި، އޮޕަރޭޝަންސް ފްރޭމްވޯކެއް ތަރައްޤީކުރުމާ ގުޅޭގޮތުން މަޝްވަރާކުރާނެ އެވެ.  ދަތުރުފުޅުގެ ތެރެއިން އިނގިރޭސި ސަރުކާރުގެ ވެރިންނާއި މާލީ މާހިރުންނާ ބައްދަލުކުރައްވާނެ އެވެ. 

ސަރުކާރުން ދަނީ މޯލްޑިވްސް އިކޮނޮމިކް ގޭޓްވޭގެ ނަމުގައި ކުންފުންޏެއް އުފައްދައި އެއް އިގްތިސޯދެއްގެ މައްޗަށް ރާއްޖެ ބަރޯސާވެފައި އޮންނަ އޮތުން ނިމުމަކަށް ގެންނަން މަސައްކަތް ފައްޓަވާފަ އެވެ.