ތިލަފުށިން ކުލީ ބިން މިލްކުރަން ބޭނުންވާ ފަރާތްތަކުން ސިޓީއެއް ހުށަހަޅަން އެދިއްޖެ

ތިލަފުށީގެ އެއްވަނަ ފިޔަވަހިން މިހާރު ކުއްޔަށް ދީފައިވާ ބިންތައް މިލްކު ކުރަން ބޭނުންވާ ފަރާތްތަކަށް އެފުރުސަތު ހުޅުވާލާފައިވާއިރު އެކަމަށް އެދި ހުށަހަޅާނެ ގޮތް ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިން ބަދަލުކޮށްފި އެވެ.

ކުރީން އެޗްޑީސީ އިން އެދިފައި ވަނީ އެކަމަށް ޝައުގުވެރިވާ ފަރާތްތަކުން އެޕްލިކޭޝަން ފޯމު ފުރިހަމަ ކުރުމަށްފަހު އެޗްޑީސީގެ ސޭލްސް އީމެއިލަށް މެއިލް ކުރުމަށެވެ. ނަމަވެސް މިހާރު އެދިފައި ވަނީ ބިން މިލްކު ކޮށްދިނުމަށް އެދޭ ސިޓީއެއް، business@hdc.mv އަށް އީމެއިލް ކުރުމަށެވެ.

މިމަހުގެ ދެވަނަ ދުވަހު އެޗްޑީސީން ހުޅުވާޅާފައި ވަނީ ތިލަފުށީގެ އެއްވަނަ ފިޔަވަހިން 5،000 އަކަފޫޓު ނުވަތަ އެއަށް ވުރެ ބޮޑެތި ބިން ކުޔަށް ނަގާފައިވާ ފަރާތްތަކުން ބިން މިލްކު ކުރަން ބޭނުންވާނަމަ އެކަމަށް އެދުމަށެވެ.

ތިލަފުއްޓަކީ މާލެ ސަރަހައްދުގެ ވިޔަފާރިއާއި އިންޑަސްޓްރިއަލް ހަބްގެ ގޮތުތައި ތަރައްގީކުރާ މައި މަރުކަޒެވެ. ސިނާއީ އެތައް މަސައްކަތެއް ކުރަމުންދާ އެރަށުގައި ސިމެންތި ބަންދުކުރުމާއި، ފުޅިއަށް ގޭސް އެޅުމާއި، އޮޑިދޯނިފަހަރު ބަނުން ފަދަ ތަފާތު އިންޑަސްޓްރިއަލް މަސައްކަތް ކުރަމުން ދެއެވެ.

އަދި ކުރިއަށް އޮތްތަނުގައި އިންޓަނޭޝަނަލް ޕޯޓް ތިލަފުއްޓަށް ބަދަލުކުރުމާ އެކު، މުދާ ކްލިއާ ކުރުމާއި ގުދަން ކުރުމަށް އަދި މުދާ މާލެއާއި ރަށްތަކަށް ސަޕްލައިކުރުމުގައި ވިޔަފާރިތަކަށް ގިނަ ފަސޭހަތަކެއް ލިބިގެންދާނެއެވެ. މީގެ އިތުރުން މިހާރު ކުރިއަށް ދާ ތިލަ-މާލެ ބްރިޖް މެދުވެރިކޮށް ތިލަފުއްޓާއި މާލެ ގުޅުވާލުމުން ވިޔަފާރި މުދާ އުފުލުމުގައި ލުއިފަސޭހަވެ، މުދާ ސަޕްލައި ކުރުމަށް ހޭދަވާ ވަގުތު ކުޑަވެގެންދާނެއެވެ.

އެޗްޑީސީ އިން ވަނީ ތިލަފުށީގެ ދެވަނަ ފިޔަވަހިން ސިނާއީ ބޭނުންތަކަށް ބިން ވިއްކުމަށް ވެސް ހުޅުވާލާފަ އެވެ. އެފުރުސަތު ހުޅުވާލީ ހަމައެކަނި ދިވެހިންނަށެވެ.