ވެލިދޫ ކުނި މެނޭޖްކުރާ ސެންޓަރުގައި ރޯވެ ލިބުނު ގެއްލުން ތިން މިލިއަނަށް އަރާ

ވެލިދޫ ވޭސްޓް އެންޑް ރިސޯސް މެނޭޖްމެންޓް ސެންޓަރުގައި އިއްޔެ ހިނގި އަލިފާނުގެ ހާދިސާގައި ތިން މިލިއަން ރުފިޔާގެ ގެއްލުންވެފައިވާ ކަމަށް ވެލިދޫ ކައުންސިލުން ބުނެފި އެވެ.

ވެލިދޫ ކުނިކޮށީގައި ރޯވީ އިއްޔެ މެންދުރު 12:30 ހާއިރު އެވެ. އަލިފާން ރޯވީ އެ އިމާރާތުގެނކުނި ބަހައްޓާ ސަރަހައްދުގައި ކަރަންޓު ޝޯޓެއް ވެގެން ކަމަށް ކައުންސިލުން ލަފާކޮށްފައިވެ އެވެ. އަލިފާން ރޯވާން ދިމާވި ސަބަބުން ކަށަވަރުކުރަން ކައުންސިލުން ދަނީ މަސައްކަތް ކުރަމުންނެވެ.

ވެލިދޫ ކައުންސިލުން ނެރުނު ބަޔާނެއްގައި ބުނެފައި ވަނީ އެ ހާދިސާގައި މީހަކަށް ގެއްލުން ނުވިނަމަވެސް، އިމާރާތުގެ ބޮޑު ބަޔަކާއި އިމާރާތުގައި ބޭނުންކުރަމުންދާ މެޝިންތަކަށް ގެއްލުންވެފައިވާ ކަމަށެވެ. އަދި ފުޓުބޯޅަ ދަނޑުގައި ބޭނުންކުރަމުންދާ ޑްރެގް ބްރަޝް މެޝން ވެސް ބޭނުން ނުކުރެވޭ ވަރަށް ހަލާކުވެފައިވާ ކަމަށެވެ.

ކައުންސިލުން ބުނީ މިލިބުނު ގެއްލުން ތިން މިލިއަނަށް އަރާނެ ކަމަށް ލަފާކުރެވޭ ކަމަށެވެ. 

މިހާދިސާ ހިނގުމުން ކައުންސިލުން ވަނީ އަލިފާނުގެ ހާދިސާ ހިނގި ސެންޓަރުން ދޭ ހިދުމަތްތައް ކައުންސިލް އިމާރާތުން ލިބޭ ގޮތަށް ހަމަޖައްސާފަ އެވެ.

ވެލިދޫ ވޭސްޓް އެންޑް ރިސޯސް މެނޭޖްމެންޓް ސެންޓަރަކީ 2022 ވަނަ އަހަރު ގާއިމްކޮށްފައިވާ 13،000 އަކަފުޓޫގެ ތަނެކެވެ.