ވިލިމާލޭގައި އާންމުންގެ ގެތައް 10 ބުރިއަށް ނަގަން ހުއްދަ ދީފި

ވިލިމާލޭ ގައި އާންމުން ދިރިއުޅޭގެ ތައް 10 ފަންގިފިލާއަށް އިމާރާތް ކުރެވޭ ގޮތަށް ބަދަލު ގެނެސްފި އެވެ.

ހައުސިން މިނިސްޓްރީން މިއަދު ވަނީ އެ ބަދަލު ގެނެސް ގެޒެޓް ކޮށްފައެވެ. މާލެ ސިޓީގެ ޕްލޭނިން ގަވާއިދަށް ގެނެސްފައިވާ ބަދަލުގައި ބުނެފައި ވަނީ ވިލިމާލޭ ގައި އާންމުން ދިރިއުޅޭގެ ތައް 10 ފަންގިފިލާއަށް އިމާރާތް ކުރެވޭނެ ކަމަށެވެ.

އެއީ 30.48 މީޓަރެވެ. މީގެ އިތުރުން މަތީގައި ޓެރަހެއް ނުވަތަ ފުރާޅެއް ލާނަމަ ހުންނަން ޖެހޭ އުސްމިން ވެސް ވަނީ ކަނޑައަޅާފައެވެ.

ވިލިމާލޭގައި އެ ނޫން އިމާރާތްތައް ވެސް އެންމެ އުސްކޮށް ކުރެވޭނީ 10 ބުރިއަށް ކަމަަށް ގަވާއިދުގައި ވެ އެވެ. 

މާލޭގެ ފަސްވަނަ އަވަށުގެ ގޮތުގައި ގުނޭ ވިލިމާލޭ ގައި 10 ބުރިއަށް އިމާރާތް ކުރެވޭ ގޮތް ހެދުމަކީ ރައީސް މުއިއްޒުގެ ރިޔާސީ ވައުދެކެވެ. އެ ކަމަކީ އަވަށުން ގޯތި ލިބުނު މީހުން ވަރަށް ބޮޑަށް އެދެމުން އައި ކަމެއް ވެސް މެ އެވެ.