ކޯރަމް ހަމަނުވެގެން މިއަދުގެ ޖަލްސާ ނުބޭއްވުނު، ދެން އޮންނާނީ ދައުރުގެ ފަހު ޖަލްސާ

ރައްޔިތުންގެ މަޖިލީހުގެ މިއަދު ބާއްވަން އެޖެންޑާ ކުރި ޖަލްސާގެ ކޯރަމް ހަމަ ނުވެގެން ޖަލްސާ ކެންސަލްކޮށްލައިފި އެވެ.

މިއަދުގެ ޖަލްސާ ފެށުމަށް 9:00 ގައި މަސައްކަތް ކުރި ނަމަވެސް ކޯރަމް ހަމަނުވާތީ 10:00 ގައި ޖަލްސާ ފަށަން މަޖިލީހުގެ ރައީސް މުހައްމަދު އަސްލަމް ނިންމަވައި އެކަން އިއުލާނު ކުރެއްވި އެވެ. 

ނަމަވެސް އެވަގުތަށް ވެސް ކޯރަމް ނެތުމުން އަނެއްކާވެސް 11 ޖަހާއިރު ފައްޓަން މަސައްކަތް ކުރެއްވި އެވެ. އެވަގުތު މަޖިލީހަށް ހާޒިރުވެ ތިބީ އެންމެ 10 މެމްބަރުންނެވެ. 

"އަޅުގަނޑަށް ތަކުރާރުކޮށް ބަލާލެވިއްޖެ. ކޯރަމް ބެލް 11 ގެ ފަހުން ޖަހައި މިހާރު ފަސް މިނެޓު ވެސް ހަމަވީ. އެހެންވީމާ އަޅުގަނޑު ގަސްދުކުރަނީ މި ޖަލްސާ ނިންމާލަން،" މަޖިލީސް ނިންމަވާލައްވަމުން އަސްލަމް ވިދާޅުވި އެވެ.

މިއަދުގެ ޖަލްސާ ނިންމާލާފައިވާއިރު މިއަދަށް މާ ބޮޑު މަސައްކަތެއް އެޖެންޑާ ކޮށްފައެއް ނެތެވެ. ގިނަ މަސައްކަތްތައް އޮތީ ކޮމެޓީތަކުގަ އެވެ. 

މެމްބަރުންގެ ފަރާތުން ވަޒީރުންނާ ކުރަން ހުށަހަޅާފައިވާ 21 ސުވާލެއް އޮތް ކަމަށް އިއްޔެ އަސްލަމް ވިދާޅުވި އެވެ. ނަމަވެސް އެބައި ކުރިއަށް ނުގެންދެވިގެން އުޅެނީ ސުވާލު ހުށަހެޅި މެމްބަރުން އަދި ވަޒީރުންނަށް ވަގުތު ނުވެގެން ކަމަށް ވެސް ވިދާޅުވި އެވެ.

ދެން އޮންނާނީ 19 ވަނަ މަޖިލީހުގެ އެންމެ ފަހު ޖަލްސާ އެވެ. އެޖަލްސާ އޮންނާނީ އަންނަ ހަފްތާގެ ހޯމަ ދުވަހު އެވެ. އާ މަޖިލީހަށް އިންތިހާބުވި 93 މެންބަރުން ހުވާ ކުރާނީ އަންނަ މަހުގެ 28 ވަނަ ދުވަހު އެވެ.