ބޯހިމަނާ ނުނިމެނީ މާލެއާ ހުޅުމާލޭގައި

ރާއްޖޭގެ އާބާދީ އާއި މީހުން ދިރިއުޅޭ ތަންތަނުގެ މައުލޫމާތު އެއް ކުރުމަށް މުޅި ރާއްޖޭގައި ފެށި ބޯހިމެނުމުގެ މަސައްކަތް ނިމުނު ނަމަވެސް، މާލެ އަދި ހުޅުމާލޭގައި ނުނިމޭ ކަމަށް މޯލްޑިވްސް ސްޓެޓިސްޓިކްސް ބިއުރޯ (އެމްބީއެސް) އިން ބުނެފި އެވެ

އެމްބީއެސްގެ ސީނިއާ ސްޓެޓިސްޓިކަލް އޮފިސަރު އައިމިނަތު މުޝްފިގާ އިބްރާހިމް ރޭ "މި" ނޫހަށް ވިދާޅުވި ގޮތުގައި ބޯހިމެނުގެ މަސައްކަތް ރާއްޖޭގެ އެކި ހިސާބުތަކުގައި އެއްކޮށް ނިމިފައިވި ނަމަވެސް ވެރިރަށް މާލެ އަދި ހުޅުމާލެ އަދިވެސް މުޅީން ނިންމާނުލެވޭ ގޮތެއް ނުވެއެވެ.

މި މަހުގެ 13 އިން ފެށިގެން ކުރިއަށްދާ ބޯހިމެނުގެ މަސައްކަތުގައި އެނިއުމަރޭޓަރުން ލިބުން ދަތިވުމުގެ ސަބަބުން މާލޭގައި ބޯހިމެނުން ކުރިޔަށް ގެންދިޔައީ 27 ވަނަ ދުވަހާ ހަމައަށް މުއްދަތު އިތުރުވެސް ކޮށްގެނެވެ.

"މިއަދު ވެސް އަޅުގަނޑުމެންގެ އެނިއުމަރޭޓަރުން ހުޅުމާލޭގެ ގޭގެ އަށް ވަންނަން ދާނެ،" މުޝްފިގާ ވިދާޅުވި އެވެ.

ބޯހިމެނުމުގެ ވަގުތީ ނަތީޖާ އިއުލާނު ކުރާނީ އޮކްޓޫބަރު ހަވަނަ ދުވަހު އެވެ. އަދި ދާއިމީ ނަތީޖާ އިއުލާނު ކުރާނީ ގައުމީ ތަފާސް ހިސާބުގެ ދުވަސް ކަމަށްވާ އޮކްޓޫބަރު 20 އެވެ.

ރާއްޖޭގައި ކުރިން ވެސް އެކި ސިފަ ސިފައިގައި ބޯހިމަނަ އެވެ. އެކަމަކު ރަސްމީ ސިފައެއްގައި ފުރަތަމަ ރާއްޖޭގައި ބޯހިމަނާފައިވަނީ 1911 ވަނަ އަހަރުގެ ތެރޭގަ އެވެ. ރާއްޖޭގައި އެންމެ ފަހުން ބޯހިމަނާފައި ވަނީ މީގެ އަށް އަހަރު ކުރިން 2014 ވަނަ އަހަރު އެވެ. އޭރުގެ ނަތީޖާ ދައްކާ ގޮތުން ރާއްޖޭގައި ދިރިއުޅޭ މީހުންގެ އާބާދީ އަކީ 402،071 އެވެ. ނަމަވެސް ސްޓެޓިކްސްގެ އެންމެ ފަހުގެ ލަފާ ކުރުމުގެ މައްޗަށް އެކުލަވާލި ތަފާސްހިސާބު ދައްކާ ގޮތުން މިއަހަރު ނިމޭއިރު 579،330 މީހުން ދިރިއުޅޭ އެވެ. ރާއްޖޭގައި ދިރިއުޅޭ އާބާދީގެ ތެރެއިން 45 ޕަސަންޓަކީ ޒުވާނުންނެވެ. ޒުވާނުންގެ އާބާދީގައި ދިވެހި ޒުވާނުންގެ ޕަސެންޓަކީ 47 އެވެ. ބިދޭސީ ޒުވާނުންގެ ޕަސެންޓަކީ 53 އެވެ. ރާއްޖޭގައި ހަރަކާތްތެރިވާ ބިދޭސީންގެ އެކަށީގެންވާ މައުލޫމާތު އެއްކުރެވެމުން ނުދެ އެވެ. ނަމަވެސް އަންދާޒާ ކުރެވޭ ގޮތުގައި 200،000 ބިދޭސީން މިހާރު އުޅޭނެ އެވެ.