ޓޫރިޒަމް ރަންޔޫބީލް އެވޯޑު ބެހީ ރިސޯޓު 40 މުވައްޒަފަކަށް

ޓޫރިޒަމަށް ބައި ގަރުނު، ނުވަތަ ރަންޔޫބީލް ފުރުން ކުލަގަދަކޮށް ފާހަގަ ކުރާނެ ކަމަށް މިދިޔަ ސަރުކާރުން ވައުދުވި އެވެ. އެކަމު ތަފާތު ވާހަކަތަކެއް ދެއްކުމަށް ފަހު ފެނުނީ އެވޯޑްތަކެއް ބަހަން ފެށިތަނެވެ. 

ހުއްޓުމެއް ނެތި ދެ އަހަރު ދުވަހަށް ދެމިގެން ދިޔަ "އެވޯޑް ބެހުމު" ގެ އެ ހަރަކާތުގައި ބެހި އެވޯޑްތަކާއި ޓޯކަންތައް ހަދަން 200،000 އަށްވުރެ ގިނަ ރުފިޔާ ހަރަދު ކޮށްފައި ވެއެވެ. އަދި މި އެވޯޑު ދީފައިވަނީ ޓޫރިޒަމް ސިނާއަތުގެ ހިދުމަތްތެރިންގެ އަދަދު އުޅެނީ 148 ގަ އެވެ. މީގެ ތެރޭގައި ތިބި ރިސޯޓް މުވައްޒަފުންގެ އަދަދަކީ 40 އެވެ.

ސަރުކާރުގެ ރަސްމީ އިދާރާ އިން "މިރާ" އަށް ލިބިފައިވާ މައުލޫމާތުތައް ދައްކާ ގޮތުގައި މި އެވޯޑު 148 މީހަކަށް ބަހާފައި ވެއެވެ. އަދި ގޯލްޑް ޕެލެޓުން ހަދާފައިވާ ޓޯކަން ދީފައިވާ މީހުންގެ އަދަދު އުޅެނީ 325 ގަ އެވެ. 

ރާއްޖޭގެ ބައި ގަރުނުވީ ޓޫރިޒަމް ތާރީހުގައި މަސައްކަތްކޮށް ރިޓަޔާ ކޮށްފައިވާ އެތައް ބަޔަކު ތިބިއިރު މި އެވޯޑް ގިނަ ބަޔަކަށް ދީފައެއް ނެތެވެ. މީގެ ތެރޭގައި ޓޫރިޒަމް ސިނާއަތުގެ ހައްގުގައި އެތައް ގުރުބާނީއެއްވީ ޓޫރިޒަމް މުވައްޒަފުންގެ ގިނަ ބަޔަކު ވެސް ހިމެނެ އެވެ. ދިވެހި ޓޫރިޒަމް މުވައްޒަފުންގެ ގޮތުގައި 27،000 ދިވެހިން ތިބި ކަމަށް ތަފާސް ހިސާބުތަކުން ދައްކާއިރު ރިސޯޓް މުވައްޒަފުންގެ ތެރޭން އެންމެ 40 މީހަކަށެވެ. 

ޓޫރިޒަމް ސިނާއަތުގައި 15 އަހަރާއި 30 އަހަރު ދުވަހުގެ ދިގު މުއްދަތަށް ހިދުމަތްކޮށްފައިވާ ގިނަ ބަޔަކު ތިބިއިރު މިއިން އެއްވެސް މީހެއްގެ އަގު ވަޒަން ކޮށްފައެއް ނެތެވެ. މީގެ އިތުރުން އޭރުގެ ސަރުކާރާއި ޓޫރިޒަމް މިނިސްޓަރާ ހިޔާލު ތަފާތުވެފައިވާ ގިނަ ބަޔަކަށް އެވޯޑު ދީފައެެއް ނެތެވެ. އެކަމަކު މި މީހުންނަކީ ޓޫރިޒަމްގެ މުހިންމު ހިދުމަތްތެރިންނެވެ.