ގައުމީ ދުވަހުގެ ޖަލްސާއަށް ރައީސް އުތީމަށް ވަޑައިގެންފި

މި އަހަރުގެ ގައުމީ ދުވަހުގެ ރަސްމީ ޖަލްސާއަށް ރަައީސުލްޖުމްހޫރިއްޔާ އިބްރާހިމް މުހައްމަދު ސޯލިހް ތިލަދުންމަތީ އުތުރުބުރީ (ހއ) އުތީމަށް މިއަދު ވަޑައިގެންފި އެވެ. ގައުމީ ދުވަހަކީ މާދަމާ އެވެ.

ގައުމީ ދުވަހުގެ ޖަލްސާއަށް ރައީސުލްޖުމްހޫރިއްޔާ އުތީމަށް ވަޑައިގެންފައިވަނީ ތިލަދުންމަތީ ދެކުނުބުރި (ހދ) ގެ ދެ ރަށަކަށް ވަޑަައިގެންނެވުމަށް ފަހު އެވެ. އެއީ ނައިވަދޫ އާއި ފިނޭ އަށެވެ.

ގައުމީ ދުވަހަށް އުތީމު ވަނީ ވަރަށް ބޮޑަށް ތައްޔާރު ކޮށްފައެވެ. ރައީސްގެ ދެކަނބަލުންނަށް އުތީމުން ވަނީ ވަރަށް ހޫނު މަރުހަބާއެއް ކިޔާފައެވެ. މަރުހަބާ ކިޔާފައިވަނީ ސަގާފީ ހަރަކާތްތަކާއެކުގައެވެ.

ގައުމީ ދުވަހުގެ ރަސްމީ ޖަލްސާ އޮތީ މާދަމާ ހެނދުނު އެވެ. އޭގެ ކުރީން މިރޭ ފަތިހު އުތީމު، ގަނޑުވަރު މައިދާނުގައި އޮންނަ ގައުމީ ދުވަހުގެ ދިދަ ނެގުމުގެ ރަސްމިއްޔާތުގައިވެސް ރައީސްގެ ދެކަނބަލުން ބައިވެރިވެވަޑައިގަންނަވާނެ އެވެ. މިރޭވެސް އޮތީމުގައި ދެ ހަރަކާތެއް އޮންނާނެ އެވެ.

އެއީ ރައީސްގެ ދެކަނބަލުންގެ ޝަރަފުގައި އުތީމު ރައްޔިތުން ދެއްވާ ފަރިއްކޮޅަކާއި ސަގާފީ ހަރަކާތްތަކުގެ ޝޯ އެކެވެ.

އުތީމުގެ ކުރީން ރައީސް ވަޑައިގެންނެވި ދެ ރަށުގެ ތެރެއިން ފިނޭގައި ވަނީ ފެނާއި ނަރުދަމާ ނިޒާމު އިފްތިތާހު ކޮށްދެއްވާ އަދި މި ރަށުގައި އިމާރާތް ކޮށްފައިވާ ފެނަކައިގެ އާ އޮފީހާއި އިންޖީނުގެ ހުޅުވައިދެއްވައިފއެވެ. އަދި ނައިވަދޫގެ ފެނުގެ ހިދުމަތް ވަނީ އިފްތިތާހު ކޮށްދެއްވާފައެވެ.

މީގެ އިތުުރުން އ. އާއި ހދ. އަދި ށ. އަތޮޅުގައި މިހާރު ފަށާފައިވާ އާރުޓީއެލް ފެރީގެ ހިދުމަތް ކުރިއަށްދާ ގޮތް މި ދަތުރުފުޅުގެ ތެރެއިން ރައީސް ބައްލަވާ ލެއްވުމަށްވެސް ވަނީ ހަމަޖެހިފައެވެ.

ރައީސް ސޯލިހްގެ ވެރިކަމަށް ވަޑައިގެން ހއ. އަދި ހދ. ގައި ތަރައްގީގެ މުހިންމު މަޝްރޫއުތަކެއް ދަނީ ހިންގަމުންނެވެ. އެގޮތުން ހދ. ހަނިމާދޫ އެއާޕޯޓް ތަރައްގީ ކުރުމުގެ ބިޔަ މަޝްރޫއު އާއި ހދ. ކުޅުދުއްފުށީ ހޮސްޕިޓަލް ތަރައްގީ ކުރުމުގެ މަޝްރޫއާއި ފެނާއި ނަރުދަމާ ނެތް ހުރިހާ ރަށެއްގައި އެ މަސައްކަތްތައް ކުރިއަށް ދިއުން ފާހަގަ ކުރެ އެވެ. ހަނިމާދޫ އެއާޕޯޓް ތަރައްގީ ކުރުމުގެ ބިޔަ މަޝްރޫއުގައި ރޭ ވަނީ ސޮއި އަޅާފައެވެ.