"އިންސާނުންނަށް އުޅެވޭނެ ރަށަކަށް ފިނޭ ބަދަލު ކުރެވިއްޖެ"

ރައީސް ވިދާޅުވި ގޮތުގައި އާބާދީ މަދުވެ، ރަށުގެ ސައިޒު ކުޑަވުމަކީ އެތަނެއްގައި ދިރިއުޅޭ ބަޔަކަށް ވަކި ކަހަލަ ހިދުމަތްތަކެއް ބޭނުން ނުވާނެ ސަބަބެއް ނޫނެވެ. ރަށުގައި އުޅެނީ ކިތަންމެ މަދު ބައެއް ނަމަވެސް އެ ރައްޔިތުންނަށްވެސް ދަތުރުފަތުރު ކުރެވޭނެ ގޮތާއި ލަފާފުރޭނެ ފަސޭހަ ގޮތެއް އަދި ސާފު ބޯފެނާއި ނަރުދަމާގެ ނިޒާމެއް ގާއިމުވެފައި އޮންނަން ޖެހެއެވެ.

ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް، ފިނޭގައި މިއަދު ވާހަކަފުޅު ދައްކަވަނީ -- ރައީސް އޮފީސް

މި ސަރުކާރުން ގެނައި ތަރައްގީގެ މަޝްރޫއުތަކާއެކު ތިލަންދުންމަތީ ދެކުނުބުރީ (ހދ. އަތޮޅު) ފިނޭއަކީ އިންސާނުން ދިރިއުޅެވޭނެ ފަދަ ރަށަކަށް ބަދަލުކޮށް ލެވިފައިވާ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް މިއަދު ވިދާޅުވެއްޖެ އެވެ.

އެމަނިކުފާނު މިހެން ވިދާޅުވީ ފިނޭގެ ފެނާއި ނަރުދަމާ ނިޒާމު އިފްތިތާހު ކޮށްދެއްވާ އަދި މި ރަށުގައި އިމާރާތް ކޮށްފައިވާ ފެނަކައިގެ އާ އޮފީހާއި އިންޖީނުގެ ހުޅުވައިދެއްވުމަށް ފަހު ވާހަކަފުޅު ދައްކަވަމުންނެވެ. މި މަޝްރޫއުތައް އިފްތިތާހު ކޮށްދެއްވުމަށް މި ރަށަށް ވަޑައިގެން ރައީސް ވިދާޅުވީ ރަށްރަށުގައި ދިރިއުޅޭ ރައްޔިތުން އެންމެ ބޭނުންވާ ކަންކަން ކޮށްދެވި އެކަމުގެ ފަސޭހަ އާއި މަންފާ ރައްޔިތުންނަށް ލިބޭ ދުވަހަކީ ވަރަށް އުފާވެރި ދުވަހެއް ކަމަށެވެ. މިއީ އެފަދަ ދުވަހެއް ކަމަށް ވެސް ވިދާޅުވި އެވެ.

ރައީސް ސޯލިހް ފިނޭއަށް ވަޑައިގެން ކުޑަކުއްޖަކާ ވަހަކަފުޅު ދައްކަވަނީ -- ރައީސް އޮފީސް

ރައީސް ވިދާޅުވި ގޮތުގައި އާބާދީ މަދުވެ / ރަށުގެ ސައިޒު ކުޑަވުމަކީ އެތަނެއްގައި ދިރިއުޅޭ ބަޔަކަށް ވަކި ކަހަލަ ހިދުމަތްތަކެއް ބޭނުން ނުވާނެ ސަބަބެއް ނޫނެވެ. ރަށުގައި އުޅެނީ ކިތަންމެ މަދު ބައެއް ނަމަވެސް އެ ރައްޔިތުންނަށް ވެސް ދަތުރުފަތުރު ކުރެވޭނެ ގޮތާއި ލަފާ ފުރޭނެ ފަސޭހަ ގޮތާއި ސާފު ބޯފެނާއި ނަރުދަމާގެ ނިޒާމެއް ގާއިމުވެފައި އޮންނަން ޖެހެއެވެ.

ފަސް ސަތޭކަ މީހުންގެ އާބާދީއެއް އޮތް ފިނޭއަކީ މިއަދު އިންސާނުން ދިރިއުޅެން ރަނގަޅު ރަށަކަށް ބަދަލުކޮށްލެވިފައިވާ ކަމަށް ވެސް ރައީސް ވިދާޅުވިއެވެ. އަދި ވިދާޅުވީ މި ދައުރު ނިމެންވާއިރަށް ރާއްޖޭގެ ހުރިހާ ރަށެއްގައި ފެނާއި ނަރުދަމާގެ ނިޒާމު ގާއިމުކޮށް ނިންމަވާނެ ކަމަށެވެ.

ދަތި ނުވެ ދެން އައިސް ލިބޭނެ

މިއަދުގެ ރަސްމިއްޔާތުގައި ރައީސް ސޯލިހް ވަނީ ފެކަނަ ކުންފުންޏަށް ވަރަށް ބޮޑަށް ތައުރީފު ކުރައްވާފަ އެވެ. އެ ކުންފުންޏާމެދު ވަރަށް ބޮޑު އިތުބާރެއް އެބައޮތް ކަމަށާއި ފެނަކައިން ނަތީޖާ ދައްކަމުންދާ ކަމަށް ވެސް ވިދާޅުވިއެވެ.

ރައީސް ވިދާޅުވީ ފެނާއި ކަރަންޓްގެ އިތުރުން އައިސް ޕްލާންޓްތައް ހިންގުމުގެ މަސައްކަތް ވެސް މިހާރު ފެނަކައާ ހަވާލުކޮށްފައިވާ ކަމަށެވެ. އެ ނިންމުމާއެކު އަތޮޅުތަކުގެ ތެރޭގައި ހުރި އައިސްޕްލާންޓްތަކާއި ފެނަކައިން ހަވާލުވެ އައިސް ލިބުމުގައި އޮތް ދަތިތަކަށް ހައްލެއް ހޯދުމުގެ މަސައްކަތް ފަށާފައިވާ ކަމަށެވެ. ރައީސް ވިދާޅުވި ގޮތުގައި އައިސް ވިއްކުން ފެނަކައާ ހަވާލު ކުރުމާއެކު ދެން ދަތި ނުވެ އައިސް ލިބޭނެ އެވެ.

މިހާތަނަށް މަސްވެރިންނަށް، އައިސް ފޯރުކޮށް ދެމުން ގެންގޮސްފައި ވަނީ ސަރުކާރުގެ މަސް ކުންފުނި މިފްކޯއިންނެވެ. ނަމަވެސް ސަރުކާރުން މިވަނީ މަސްވެރިންނަށް އައިސް ފޯރުކޮށް ދިނުމުގެ "އޮޕަރޭޝަން" ފެނަކައިގެ ދަށަށް ގެނެސްފަ އެވެ. އެއީ މި މަހުގެ 22 ވަނަ ދުވަހު ސަރުކާރުން ނިންމި ނިންމުމެކެވެ.

ސަރުކާރުގެ ހަރަދުގައި ރާއްޖޭގެ އެކި ހިސާބުތަކުގައި ގާއިމް ކޮށްފައިވާ 14 އައިސް ޕްލާންޓާ ދެން އޮޕަރޭޓް ކުރާނީ ފެނަކައިންނެވެ. މިފްކޯގެ ދަށުން މަސްވެރިންނަށް އައިސް ވިއްކަން 22 އައިސް ޕްލާންޓެއް ހިންގަ އެވެ. މި ޕްލާންޓުތަކުން ދުވާލަކު 830 ޓަނުގެ އައިސް އުފައްދަ އެވެ.

ކޮމެންޓް

2
450
އުމްނާ
2 years ago

ފިނޭ މީހުން ވެސް އުޅެނީ މި ވާހަކަ އަޑު އަހާފައި ލަދުން ކައި ކުރަން ނުކެރިގެން އެހެންތާ ވާނީ ވާއެއް ނުވާއެއް އެނގޭ ބަޔަކު ނޫނިއްޔާ އައިސްގެން މިއުޅެނީ ކަރަށް ނާރު ނަގައި ފެލެނީ ވިއްޔާ. ފިނޭ މީހުންނަށް ކޮށް ދޭނެ ކަންކަން ވެސް ދިގު ރުކެއްހާ ދިގު އެކަމަކު އެ މީހުން ދެނެހުރި ކަމެއް ނެތް

ހަބީބައްތަ
2 years ago

ފިނޭގައި ކުރީން އުޅުނީ މުޅީން ފިނދަނަ ކަމަށް ވަނީ. ރައީސް ސޯލިހު ވެރިކަމަށް ވަޑައިގެން އެ ރަށުން ފިނދަނަތައް ފައްސާލައި އިންސާނުންނަށް އެރަށުގައި އުޅެވެނެ ގޮތް މިހާރު ވަނީ ހަދާފައި އެއީ މި ސަރުކާރުގެ ބިޔަ ބޮޑު މަޝްރޫއެއް

މި މަސައްކަތުގައި އަހަރެމެން ހަމަ ހަމަ ވާނެ، އިންސާފުވެރި ވާނެ، އިތުބާރު ދަމަހައްޓާނެ

Newsroom
Phone: 7819333
Email: news@themirror.mv
Marketing
Phone: 7399333
Email: marketing@themirror.mv
H. Fairlin, Bodu thakurufaanu magu, Male
Republic of Maldives
© 2025 Mi. All rights reserved.