ފިނޭގައި ފެނާ ނަރުދަމާ އިފްތިތާހުކޮށް އިންޖީނުގެ ހުޅުވައިފި

ތިލަދުންމަތީ ދެކުނުބުރީ (ހދ) ފިނޭގައި ފެނާއި ނަރުދަމާގެ ނިޒާމު އިފްތިތާހުކޮށް އެ ރަށުގައި އިމާރާތް ކޮށްފައިވާ އައު އިންޖީނުގެ މިއަދު ހުޅުވައިފި އެވެ.

ފިނޭގައި ފެނާއި ނަރުދަމާގެ ނިޒާމު އިފްތިތާހުކޮށް އެ ރަށުގައި އިމާރާތް ކޮށްފައިވާ އައު އިންޖީނުގެ ހުޅުވައިދެއްވީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހެވެ. އުތުރުގެ ހަތަރު ރަށަކަށް ފެއްޓެވި ދަތުރުފުޅުގައި އެމަނިކުފާނު މި ރަށަށް ވަޑައިގެންނެވީ މި މަސައްކަތްތައް އިފްތިތާހު ކޮށް ދެއްވުމަށެވެ.

ރައީސް ސޯލިހަށް ފިނޭންވެސް އިން ވަނީ ވަރަށް ހޫނު މަރުހަބާއެއް ކިޔާފައެވެ.

ފިނޭގައި ފެނުގެ ނިޒާމު ގާއިމުކޮށްފައިވަނީ ސާސީ ކޮންސްޓްރަކްޝަން ޕްރައިވެޓް ލިމިޓެޑާއި ހަވާލު ކޮށްގެންނެވެ. އޮކްޓޫބަރު 20، 2019 ގައި ފެށުނު މި މަސައްކަތް އެ ކުންފުނިން ނިންމީ އޮގަސްޓް 7، 2022 ގަައެވެ. ޕްރޮޖެކްޓްގެ އަގަކީ 21,335,698.08 ރުފިޔާ އެވެ.

މި މަސައްކަތުގެ ދަށުން ދުވާލަކު 40 ޓަނުގެ ފެން އުފައްދާ އާރްއޯ ދެ ޕްލާންޓާއި 4.5 ކިލޯ މީޓަރުގެ ފެނުގެ ނިޒާމުގެ ވިއުގައެއް އެޅުމާއި ފެން ރައްކާކުރުމަށް 130 ޓަނުގެ ދެ ތާންގީ އަދި ވާރޭފެން ރައްކާ ކުރުމަށް 110 ޓަނުގެ ތާންގީއެއް ވަނީ ބަހައްޓާފައެވެ. އަދި 179 ގެއަކަށް ފެނުގެ ކަނެކްޝަން ވަނީ ގުޅައިދީފައެވެ.

ފެނަކައިން ބުނީ ފިނޭގައި މިއަދު ހުޅުވި އައު އިންޖީނުގެ އާއި ފެނަކަ އިމާރާތަކީ އެންމެ ޒަމާނީ އިންޖީނުގެއަކާއި އޮފީސް އިމާރާތެއް ކަމަށެވެ.