ގިރާވަރުފަޅުން ލިބުނު ގޯތި ގުޅިފަޅަށް ބަދަލުކުރަން އިތުރު މުއްދަތެއް

ބިންވެރިޔާ ސްކީމްގެ ދަށުން ގިރާވަރުފަޅުން ދޫކޮށްފައިވާ ބައެއް ގޯތި ގުޅީފަޅަށް ބަދަލު ކުރަން ދީފައިވާ މުއްދަތު އިތުރު ކޮށްދީފި އެވެ.

ސަރުކާރުން ކުރިއަށް ގެންގޮސްފައިވާ ބިންވެރިޔާ ސްކީމްގެ ދަށުން ގިރާވަރުފަޅުން ގޯތި ދޫކޮށްފައި ވަނީ އެ ސަރަހައްދަށް ކޮންމެހެން ބޭނުންވާ މުހިއްމު ހިދުމަތްތަކަށް އެކަށީގެންވާ ވަރަށް ބިން އެކަށައެޅުމެއް ނެތި ކަމަށް ހައުސިން މިނިސްޓްރީން ބުނެފައިވެ އެވެ. 

އެހެންވެ، އެ ހިދުމަތްތަކާ އެކު ގިރާވަރުފަޅުގެ ލޭންޑް ޔޫސް ޕްލޭނަށް ބަދަލު ގެނައުމުން ގިރާވަރުފަޅުން ބިން ދޫކޮށްފައިވާ އަދަދަށް ގޯތި ނުނެގޭތީ ގިރާވަރުފަޅުން ދޫކޮށްފައިވާ ބައެއް ގޯތިތައް ގުޅިފަޅަށް ބަދަލު ކުރަން ނިންމައި މިނިސްޓްރީން ވަނީ އެކަމަށް އެދި ހުށަހަޅަން އިއުލާނެއް ކޮށްފަ އެވެ.

އެ އިއުލާނުގެ މުއްދަތު އިއްޔެ ހަމަވި ނަމަވެސް މިނިސްޓްރީން މިހާރު ވަނީ މިމަހުގެ 18 ވަނަ ދުވަހުގެ 23:00 ގެ ނިޔަލަށް އިތުރުކޮށްފަ އެވެ. މިނިސްޓްރީގެ ހިޔާވަހި ޕޯޓަލް އިން އެކަމަށް އެދި ހުށަހެޅޭނެ އެވެ.

މިނިސްޓްރީން ވަނީ ގިރާވަރު ފަޅުން ލިބުނު 1،347 ގޯތި ގުޅިފަޅަށް ބަދަލުކުރަން ނިންމާފަ އެވެ. އެއީ؛

މި އަދަދަށް ވުރެ ގުޅީފަޅަށް ބަދަލުވާން ހުށަހަޅާ މީހުންގެ އަދަދު އިތުރުވާ ނަމަ ގުޅީފަޅުން ގޯތި ލިބޭ ފަރާތްތައް ކަނޑައަޅާނީ ގުރުއަތު ނަގައިގެންނެވެ. މި ގުރުއަތު ނެގުން އޮންނާނެ ތާރީހެއް މިނިސްޓްރީން އާންމުކޮށް އިއުލާނު ކުރާނެ އެވެ.