މިނިސްޓަރު ވަނީ ކުށަށް ޒިންމާ އުފުލަން ޖެހޭ އުމުރު 12 އަހަރަށް ދަށް ކުރަން ސަރުކާރުން ނިންމާފައިވާކަން ހާމަ ކުރައްވާފައެވެ.
ސަރުކާރުގެ މި ނިންމުން އައީ އއ. ރަސްދޫ މިސްކިތެއްގެ ތެރޭ ކުޑަކުއްޖަކަށް ވަރަށް ބޮޑަށް އަނިޔާ ކުރާ މަންޒަރު ފެންނަ ވީޑިއޯއެއް އާންމުވެ އެ މައްސަލަ ހޫނުވެފައި ވަނިކޮށެވެ. މިރޭ އޮތް ނޫސްވެރީންގެ ބައްދަލްވުމެއް ގައި މިނިސްޓަރު އޮފް ހޯމްލޭންޑް ސެކިއުރިޓީ އެންޑް ޓެކްނޯލޮޖީ އަލީ އިހްސާން ވިދާޅުވީ ކުޑަކުދީންނާ ގުޅޭ މައްސަލަތައް ހައްލު ކުރުމުގައި ކުށަށް ޒިންމާ އުފުލަން ޖެހޭ އުމުރު މަތިކޮށްފައި އޮތުމަކީ ގޮންޖެހުމެއް ކަމަށެވެ.
މިހާރު އޮތް ގޮތުން ކުށްކުރާ ކުޑަކުދިންނަށް 15 އަހަރުނުވާ ނަމަ އަދަބު ނުދެވެ އެވެ.
މިނިސްޓަރު ވަނީ ކުށަށް ޒިންމާ އުފުލަން ޖެހޭ އުމުރު 12 އަހަރަށް ދަށް ކުރަން ސަރުކާރުން ނިންމާފައިވާކަން ހާމަ ކުރައްވާފައެވެ. މިނިސްޓަރު ވިދާޅުވީ މިހާރު އޮތްގޮތުން އެ އުމުރުގެ ކުއްޖަކު ޖިނާއީ ކުށެއް ކުރި ނަމަވެސް އެ ކުށަށް ޒިންމާ އެއް ނުކުރެވެ އެވެ.
ކުޑަކުއްޖަކަށް އެހެން ތިން ކުއްޖަކު އަނިޔާ ކުރި ހާދިސާ ހިނގީ އިހަކަށް ރޭ ތަރީވީސް ނަމާދު ވަގުތު އެވެ. އެކަން އެނގޭ މީހަކު ބުނީ ކުއްޖާ ދަމާ ނެރެ އަނިޔާ ކުރީ ތަރާވީސް ނަމާދަށް ހުއްޓާ ކަމަށެވެ. އަނިޔާކުރުމަށް ފަހު އެކަން ސިއްރު ކުރަން އެންގުމުން ކުއްޖާ އެ ވާހަކަ އޮތީ ސިއްރުކޮށްފަ އެވެ. އާއިލާ އަަށް އެކަން އެނގުނީ ވީޑިއޯ އާންމުވުމުންނެވެ.
ވީޑިއޯ ގައި ފެންނަނީ މިސްކިތުގެ ވުލޫކުރާ ބަޔަަށް ކުއްޖާ ގެންގޮސް ވަރަށް ބޮޑަށް އަނިޔާކުރާ މަންޒަރެވެ. އެ ކުއްޖާއަށް ރަބަރުގަނޑާއެކު އެއްޗެއް ކާން މަޖުބޫރު ކުރުވައެވެ. އެ ނުކެއުމުން ވަރަަށް ބާރަށް އަތާއި ފައިން އެ ކުއްޖާއަށް ހަމަލާދީ އަނިޔާ ކުރެ އެވެ.
އަދި ކުއްޖާއަށް ހުތުރުބަހުން މުހާތަބުކޮށް ތަޅުން މަތީ އިށީންނަށް މަޖުބޫރު ކުރުވައެވެ. އަދި ކުޑަކަކޫ ޖަހާ އާދޭސް ކުރުމަށް އަންގަ އެވެ. ކުއްޖާ ބިރުން ހުރެ ކުޑަކަކޫ ޖެހުމުން ބޯމަތީ ފައިން ވަރަށް ބާރަށް ޖަހަ އެވެ. މުޅި ވީޑިއޯގައި 16 ފަހަރު އެ ކުއްޖާގެ ގައިގައި އަތާއި ފައިން ވަރަށް ބާރަށް ޖަހާ މަންޒަރު ފެނެ އެވެ.
ކުއްޖާގެ މޫނު މަތީ ވަރަށް ބާރަށް އެތައް ފަހަރަކު ޖަހަ އެވެ. ކުއްޖާއަށް އަނިޔާ ކުރުން އެ މީހުން ހުއްޓާލަނީ މިސްކިތުގައި ކުރަމުން ދިޔަ ނަމާދު ނިމި އިމާމު ސަލާމް ދޭ އަޑުއިވުމުންނެވެ.
މިނިސްޓަރު ވިދާޅުވީ ކުށުގެ ވެށީގައި 200 ވަރަކަށް ކުދީން އުޅޭ ކަމަށް ރެކޯޑްތަކުން ދައްކާ ކަމަށެވެ. އެ ކުދީން ރިހިބިލިޓޭޓް ކުުރަން ޖެހޭ ކަމަށާ އެ މަސައްކަތް ވަރަށް އަވަހަށް ފަށާނެ ކަމަށް ވިދާޅުވި އެވެ.