ކެލާ ރިސޯޓް ޕްރޮޖެކްޓްގެ އެމްއޯޔޫގައި މިނިސްޓަރު ފައިސަލް ސޮއި ކުރައްވައިފި

ހއ. ކެލާ ފަޅުތެރޭގައި ރިސޯޓް ތަރައްގީ ކުރަން ޓޫރިޒަމް މިނިސްޓްރީ އާއި ކެލާ ކައުންސިލާއި ދެމެދު އެމްއޯޔޫއެއްގައި އިއްޔެ ސޮއި ކޮށްފި އެވެ. 

އެމްއޯޔޫގައި ޓޫރިޒަމް މިނިސްޓްރީން ސޮއި ކުރެއްވީ މިނިސްޓަރު އިބްރާހިމް ފައިސަލް ކެލައަށް ވަޑައިގެން އެރަށުގައި ބޭއްވި ރައްމިއްޔާތެއްގައި މިނިސްޓަރު ފައިސަލެވެ. ކެލައަށް ވަޑައިގެން މިނިސްޓަރު ފައިސަލް ވަނީ ކެލާގައި ހިންގާނެ އެފަދަ އެހެން ބައެއް ޕްރޮޖެކްޓްތަކުގެ މައުލޫމާތު އޮޅުންފިލުއްވަވާފަ އެވެ. 

ކެލާ ފަޅުތެރޭގައި ތަރައްގީ ކުރާ ރިސޯޓް ޕްރޮޖެކްޓްގެ ފުރިހަމަ ތަފުސީލުތައް އަދި ސަރުކާރުން ހާމައެއް ނުކުރެ އެވެ.

ކެލާ ފަޅުތެރޭގައި ރިޒޯޓެއް ތަރައްގީ ކުރުން ހަގީގަތަކަށް ހަދައިދެއްވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވީ މިދިއަ ފެބުރުއަރީ މަހުގެ ތެރޭ ކެލައަށް ވަޑައިގެން އެ ރަށުގެ ރައްޔިތުންނާ ބައްދަލު ކުރައްވައި ވާހަކަފުޅު ދައްކަވަމުންނެވެ. 

އެ ދުވަހު ރައީސް ވިދާޅުވީ ކެލާ ފަޅުތެރޭގައި ތަރައްގީކުރާ ރިޒޯޓުގެ ފައިދާ ކެލާއާއި މުޅި އަތޮޅަށް ކުރާނެ ކަމަށެވެ. އަދި ރަށްރަށުގައި ގެދޮރުވެރިކަން ގާއިމު ކުރުމަށް ހައުސިން ޕްރޮޖެކްޓްތައް ހިންގަން ކަނޑައަޅާފައިވާ ޕްލޭންގެ ދަށުން ކެލައަކީ އިސްކަންދޭނެ ރަށެއް ކަމަށް ވެސް ރައީސް އެ ދުވަހު ވިދާޅުވި އެވެ.