އެއާޕޯޓު ލިސްޓުގައި ދާންދޫ ހިމަނަން އެދެފި

އެއާޕޯޓު އަޅާ ލިސްޓުގައި ގއ. ދާންދޫ ހިމަނަން ދާއިރާގެ މެންބަރު އަބްދުﷲ ޔައުގޫބް ރައީސް ޑރ. މުހައްމަދު މުއިއްޒު އަރިހު އެދިވަޑައިގެންފި އެވެ.

އެމްޑީޕޫގެ އެ މެންބަރު، ޔައުގޫބް، ރައީސަށް ފޮނުއްވި ސިޓީގައި ވިދާޅުވީ އެ އަތޮޅުވިލިނގިލީގައި އެއާޕޯޓެއް ތަރައްގީކުރުމުގެ މަސައްކަތް ފެށުމަށް މިދިއަ ފެބުރުއަރީ މަހުގެ ސަރުކާރުން ސޮއި ކޮށްފައިވާ ކަމަށާއި އޭގެ ފަހުން ކޫއްޑޫ އޮޕަރޭޝަން ހުއްޓި ދާއިރާގެ ރައްޔިތުން އެއާޕޯޓަށް ކުރަންޖެހޭ ދަތުރުގެ ވަގުތު އިތުރަށް ދިގުލައިގެން ގޮސްފައިވާ ކަމަށެވެ.

''...މިއީ މިހާރުވެސް މި ދެމެދުގައި ހޭދަވާ ވަގުތުތަކަށް އިތުރު ދަތިތަކާއި ބުރަ މި ދާއިރާގެ ރައްޔިތުންނަށް އުުފުލަންޖެހޭ ކަމެއްކަން އިއްޒަތްތެރި ރައީސަށް ހަނދުމަ ކޮށްމެވެ،'' އޭނާގެ ސިޓީގައި ވެއެވެ.

މި އަހަރުގެ ބަޖެޓުގައި އެ ދާއިރާގައި އެއާޕޯޓެއް އަޅަން ހިމަނާފައިވާއިރު ގިނަ ރައްޔިތުން ދެކޭ ގޮތުގައި އެއާޕޯޓު އަޅަން އެންމެ އެކަށީގެންވާ ރަށަކީ ދާންދޫ އާއި ވޮޑަމުއްލާ އާދި ދެމެދު ފަޅުތެރެއިން ބައެއް ހިއްކައިގެނެވެ. އަދި އެއާޕޯޓުގެ ޕްރޮޖެކްޓުގެ ކޮންސެޕްޓާ ކުރެހުންތަކެއް ވެސް އެ ސިޓީއާ އެކު ޔައުގޫބް ވަނީ ރައީސާ ހިއްސާކުރައްވާފައެވެ.

އޭނާ އެދިވަޑައިގެންނެވީ ސަރުކާރުގެ ސިޔާސަތުގެ ތެރެއިން އެއާޕޯޓް ތަރައްގީކުރާ ރަށްތަކުގެ ލިސްޓަށް ދާންދޫ ދާއިރާއަށް ބަޖެޓުކޮށްފައިވާ އެއާޕޯޓް އަލުން އިއުލާންކޮށް ދެއްވުމަށެވެ.