އައިވީއެފްގެ ހިދުމަތަށް ހުޅުވާލައިފި، މިއަހަރު 100 މީހުނަށް ފުރުސަތު ދޭނެ

ދަރިމައިވުމާ ގުޅޭ ދެ ފަރުވާ ކަމަށްވާ އައިޔޫއައި އަދި އައީވީއެފްގެ ހިދުމަތް އާސަންދަ ސްކީމްގެ ދަށުން ހޯދަން ބޭނުންވާ ފަރާތްތަކަށް ފޯމު ހުށަހަޅަން ހުޅުވާލައިފި އެވެ.

ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އިން ބުނީ އިއްޔެއިން ފެށިގެން މޭ މަހުގެ 15 ވަނަ ދުވަހުގެ މެންދުރުފަހު 2:00 ގެ ނިޔަލަށް އައިވީއެފްގެ ހިދުމަތް ހޯދަން ބޭނުންވާ ފަރާތްތަކަށް ފޯމު ހުށަހެޅޭނެ ކަމަށެވެ. އަދި އިއްޔެއިން ފެށިގެން އައިޔޫއައިގެ ހިދުމަތަށް އޮތީ ހުޅުވާލާފަ އެވެ.

ފޯމު ހުށަހަޅާ މީހުންގެ ތެރެއިން ޝަރުތު ހަމަވާ މީހުން ނެގުމަށްފަހު، މިއަހަރު އައިވީއެފްގެ ހިދުމަތް ދޭން ނިންމާފައި ވަނީ އެންމެ މަތިން ޕޮއިންޓް ލިބޭ 100 ދެމަފިރިންނަށް ކަމަށް އެންސްޕާ އިން ބުންޏެވެ.

އަދި އައިޔޫއައިގެ ފަރުވާ ފޯރުކޮށްދޭނީ އާސަންދަ ސްކީމް މެދުވެރިކޮށް އެ ހިދުމަތް ދިނުމަށް އެމްޕެނަލްކުރެވޭ ރާއްޖޭގެ ސިއްހީ ހިދުމަތް ފޯރުކޮށްދޭ މަރުކަޒުތައް މެދުވެރިކޮށް، މިކަމަށް ސްކީމުން ކަނޑައަޅާފައިވާ މިންވަރަށް، ޖުމްލަ ތިން ފަހަރަށް ކަމަށް ވެސް އެންސްޕާއިން ބުންޏެވެ.

އެންސްޕާ އިން ބުނީ އައިވީއެފްގެ އެހީއަށް އެދި ފޯމު ހުށަހަޅާތާ ފަސް ދުވަހުގެ ތެރޭގައި ފުރިހަމަނުވާ ކަމެއް އޮތް ނަމަ އެކަން އީމެއިލްގެ ޒަރިއްޔާއިން އަންގާނެ ކަމަށެވެ. އަދި ފޯމު ފުރިހަމަކުރުމަށްފަހު އެ އެޖެންސީއަށް ފޯމު ބަލައިގަންނަތާ 15 ދުވަސް ތެރޭގައި ޝަރުތު ހަމަވާކަން ނުވަތަ ނޫންކަން އެ ފަރާތްތަކަށް އަންގާނެ ކަމަށެވެ.

މޭ 15 އިން ފެށިގެން ރަސްމީ 30 ދުވަހުގެ ތެރޭގައި އައިވީއެފްގެ އެހީ ހަމަޖެހުނު މީހުންނަށް އެސްއެމްއެސް މެދުވެރިކޮށް އަންގާނެ ކަމަށް ވެސް އެންސްޕާއިން ބުންޏެވެ. އެފަރާތްތަކު ޒާތީ މައުލޫމާތު ހާމަނުވާނެހެން ލިސްޓު ވެސް އާންމު ކުރާނެ އެވެ.

އަދި، އައިޔޫއައިއަށް އެދި ހުށަހަޅާ ފަރާތްތަކަށް ރަސްމީ ފަސް ދުވަސް ތެރޭގައި ގޮތެއް ނިންމުމަށްފަހު އެސްއެމްއެސްއަކުން އަންގާނެ ކަމަށެވެ.

މިއަހަރު އެހީ ހަމަނުޖެހޭ މީހުން އަންނަ އަހަރު ހުޅުވާލުމުން އެހީއަށް އެދުމުގެ ފުރުސަތު އަލުން އޮންނާނެ އެވެ.

އާސަންދައިގެ ދަށުން އައިވީއެފްގެ ހިދުމަތް ފޯރުކޮށްދިނުމަކީ ރައީސް ޑރ. މުހައްމަދު މުއިއްޒުގެ ވެރިކަމުގެ ފުރަތަމަ 100 ދުވަހުގެ ވައުފުޅެކެވެ.