މަސް ދުވަހުގެ ފަރުވާއަށް ފަހު "މާކޭ" ގަދަ ވެއްޖެ

ފިޔަގަނޑު ބިންދައިގެން ގޮސް ހާލު ދެރަވެފައި ވަނިކޮށް ފެނުނު މާކަނާ އަށް ފަރުވާ ދީފި އެވެ.

އެނިމަލް ވެލްފެއާ މިނިސްޓްރީން ބުނީ ފިޔަގަނޑު ބިންދައިގެން ގޮސްފައިވާ މާކަނާއެއް މި އަހަރުގެ ޖަނަވަރީ މަހުގެ ތެރޭގައި މާލެ ސިޓީ ރަސްފަންނުން، ސަލާމަތް ކޮށްފައިވާ ކަމަށާ މި މާކަނާގެ ނަމަކަށް "މާކޭ" ކިޔާފައިވާ ކަމަށެވެ.

މި މާކަނާ ސަލާމަތްކޮށް އެއަށް ބޭނުންވާ ފަރުވާ ހޯދަދީ އެ ދިރިއުޅޭނެ ރައްކާތެރި މާހައުލެއް ހޯދައިދިނުމުގެ މަސައްކަތް ކާމިޔާބު ކުރެވިފައި ވަނީ ސަރުކާރު އިދާރާތަކާއި އެންޖީއޯތަކާއި ޖަނަވާރަށް ފަރުވާ ކުރާ ހޮސްޕިޓަލަކާއި އާންމުންގެ ތެރެއިން ޖަނަވާރުންނަށް އެހީތެރިވުމުގައި މަސައްކަތްކުރާ ފަރާތްތަކާއި ގުޅިގެން ކަމަށް ވެސް ބުންޏެވެ.

"މާކޭ ފުރަތަމަ ފެނުނީ ރަސްފަންނުން. މާކޭ ފެނުން އިރު މާކޭގެ ފިޔަގަނޑު އޮތީ ވަރަށް ބޮޑަށް ބިންދައިގެން ގޮސް ވެލި ވަދެ ވަރަށް ބޮޑަށް އިންފެކްޓްވެފައި. މީގެ އިތުރުން މާކޭގެ ދެފިޔަ ވެސް ހުރީ ކޮށާފައި. އެހެން ކަމުން މާކޭ އަށް ވަނީ ވަރަށް ބޮޑަށް އެހީތެރިކަން ބޭނުންވެފައި،"

މާކޭ ސަލާމަތް ކުރީ އާމުންގެ ތެރެއިން ދެމަފިރިއަކު ކަމަށާ އެ ދެމަފިރިންނަކީ ޖަނަވާރުންނަށް ލޯބިކުރާ ޖަނަވާރުންނަށް އެހީތެރިވުމުގެ ގޮތުން ވޮލެންޓިއާ ކުރާ ބައެއް ކަމަށް ވެސް ބުންޏެވެ. މި ދެމެފިރިންނާއި ރާއްޖޭގައި އަލަށް ގާއިމު ކުރެވުނު އެންޖީއޯއެއް ކަމުގައިވާ ވެލްފެއާ ފޯ އައިލެންޑް ކެޓްސް އާއި ގުޅިގެން ވަގުތުން މާކޭއަށް ފަރުވާ ދިނުމަށް މަސައްކަތް ފެށި ކަމަށެވެ.

"މާކޭގެ ފިޔަގަނޑު ބިންދައިގެން ދިޔަތާ ފަސްވަނައަށް ވީ ދުވަހު އެ ދެމަފިރިން މާކޭ ނަގައިގެން ފަރުވާ ކުރުމަށް އޮއޭސިސް ވެޓް ހޮސްޕިޓަލަށް ގެންދިއަ. މާކޭގެ ފިޔަގަނޑު ބިނދި ކަށި ބޭރަށް ނުކުމެ ޒަހަމްވެފައިވާ ތަން އިންފެކްޓްވުމުގެ ސަބަބުން މާކޭގެ ހާލު ވަރަށް ދެރަވި. އަދި އެއް މަސްވަންދެން އޮއޭސިސް ވެޓް ހޮސްޕިޓަލުގައި މާކޭގެ ފަރުވާ ކުރިއަށް ދިޔަ. މި ގޮތުން އިންފެކްޝަންގެ ސަބަބުން މާކޭގެ ފިޔަގަނޑު ވެސް ބުރިކޮއްލަން ޖެހުނު،" 

މާކޭއަށް ބޭނުންވާ ފަރުވާ ހޯދީ އޮއޭސިސް ވެޓެރިނަރީ ހޮސްޕިޓަލުން ވެލްފެއާ ފޯ އައިލެންޑް ކެޓްސް އެންޖީއޯގެ ހަރަދުގަ އެވެ. އަދި ފަރުވާ ކުރިއަށް ދިޔަ އެއްމަސް ދަވަހުގެ މުއްދަތުގައި މާކޭއަށް ކާންދީ ބެލެހެއްޓީ މާކޭ ހޮވި ދެމެފިރިންގެ އަމިއްލަ ގޭގައި ކަމަށް ވެސް ބުންޏެވެ.

މާކޭގެ ސާޖަރީއަކީ ރާއްޖޭގައި ކުރެވުނު އެއްމެ ފުރަތަމަ މާކަނާ ސާޖަރީ އެވެ. އެހެންކަމުން ހޭނައްތަން ބޭނުންކުރާ މާސްކްތަކާއި، ސާޖަރީއަށް ބޭނުންވާ ބައެއް އާލަތްތައް ޖެހުނީ ރާއްޖެއިން ލިބޭ އާއްމު ތަކެތިން ހަދާށެވެ. މި ސާޖަރީ ކޮށްފައިވަނީ އޮއޭސިސް ވެޓް ހޮސްޕިޓަލުގެ ޑރ. ގަންގާ ވިޖެސިންގެ ލީޑުގެ ދަށުން ޓީމަކުން އެވެ. އަދި މި ސާޖަރީގައި ރާއްޖޭގެ ފުރަތަމަ ޖަނަވާރުންގެ ޑޮކްޓަރުކަމުގައިވި ޑރ. ހުސައިން މިސްފާހް ސާމީ ވެސް ބައިވެރިވެ އެހީތެރިވި އެވެ.

މާކޭގެ ފަރުވާއަށް ފަހު ގެންގޮސްފައި ވަނީ އެމަރެލްޑް ރިސޯޓަށެވެ. އަދި މާކޭ ހުންނަން އެމަރަލްޑް ރިސޯޓްސްގެ އަތިރިމަތިން ވަކި ސަރަހައްދެއް ހާއްސަކޮށް އެ ސަރަހައްދުގައި އެ ސޮރަށް ހިމާޔަތް ލިބޭނެހެން ހުރިހާ އިންތިޒާމެއް ވަނީ ގާއިމުކޮށްފައެވެ. އަދި އެ ސޮރަށް ބޭސްކުރުމާއި މާކޭ ބެލެހެއްޓުމުގެ ޒިންމާ އެ ރިސޯޓުން ނަގާފައިވާ ކަމަށް ވެސް ބުންޏެވެ.

"މިހާރު މާކޭގެ ހާލު ދަނީ ރަނގަޅުވަމުން،" މިނިސްޓްރީން ބުންޏެވެ.