އައްޑޫ ބްރިޖު ސާވޭގެ މަސައްކަތައް ނިންމާލައިފި

ރާއްޖޭގައި މިހާތަނަށް އަޅާ އެންމެ ދިގު ބްރިޖު ކަމަށްވާ ހުޅުމީދޫހިތަދޫ ބްރިޖު އަޅަން މިސްރުގެ އަރަބް ކޮންޓްރެކްޓާސް އިން ސާވޭގެ މަސައްކަތް ނިންމާލައިފި އެވެ. 

މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރު މިނިސްޓްރީން ބުނީ ހިތަދޫ-ހުޅުމީދޫ ބްރިޖް މަޝްރޫޢުގެ  ޑިޒައިން ތައްޔާރުކުރުމަށްޓަކައި ފުރަތަމަ ސާރވޭ ކުރުމުގެ މަސައްކަތްތައް އަރަބި ކޮންޓްރެކްޓަސް ކުންފުނިން ފެށީ މި މަހުގެ ހަ ވަނަ ދުވަހު ކަމަށެވެ. 

ގާތްގަނޑަށް 14 ކިލޯމީޓަރުގެ ދިގު އައްޑޫ ބްރިޖްގެ ޕްރިލިމިނަރީ ޑިޒައިންނާއި ސާވޭގެ މަސައްކަތް ހަވާލު ކުރީ މިސްރު ސަރުކާރުގެ ކުންފުންޏެއް ކަމަށްވާ "ދަ އަރަބް ކޮންޓްރެކްޓާސް" އާއެވެ. އެއްބަސްވުމުގައި ސޮއިކޮށްފައިވަނީ މިދިޔަ މަހުގެ ފަހުކޮޅު އެވެ. މި އެއްބަސްވުމުގައި ދިވެހި ސަރުކާރުގެ ފަރާތުން ސޮއި ކުރެއްވި އިންފްރާ މިނިސްޓަރު ޑރ. އަބްދުﷲ މުއްތޮލިބެވެ. ދަ އަރަބް ކޮންޓްރެކްޓާސް - އޮސްމާން އެންޑް އަހުމަދު އޮސްމާން އެންޑް ކޯގެ ފަރާތުން ސޮއި ކުރެއްވީ އިންޖިނިއާ ހެބާ އަހުމަދު ލައިލާ އެވެ. 

އަރަބް ކޮންޓްރެކްޓާސްއާއެކު އެމްއޯޔޫގައި ސޮއިކުރެއްވުމަށްފަހު އިންފްރާސްޓްރަކްޗަރު މިނިސްޓަރު ޑރ، މުއްތޮލިބު ވިދާޅުވީ މިއީ ހަމައެކަނި ފީޒިބިލިޓީ ހެދުމާއި ޑިޒައިން ހެދުމަށް ސޮއިކުރި އެއްބަސްވުމެއް އެކަނި ނޫން ކަމަށާ މި އެމްއޯޔޫއާއެކު މަސައްކަތް ފެށުމުގެ އަމަލީ މަސައްކަތް ވެސް ފެނިގެންދާނެ ކަމަށެވެ.

"މި [އައްޑޫ ބްރިޖު] މަސައްކަތް އިއުލާނުކޮށްލުމާއެކު ޗައިނާގެ ވަރަށް ގިނަ ކުންފުނިތަކުން ވެސް ޝައުގުވެރިކަން ފާޅުކުރި. އެކަމަކު އަރަބް ކޮންޓްރެކްޓާސްއިން މިކަމަށް ޝައުގުވެރިކަން ފާޅުކޮށް، ގާތުން މަސައްކަތްކޮށް އެމްއޯޔޫގައި ސޮއި ކުރެވިގެން މިދަނީ. މިއީ ހަމައެކަނި ދިރާސާތައް ކޮށްފަ ޑިޒައިންތައް ހެދުމެއް ނޫން. އަރަބް ކޮންޓްރެކްޓާސް އިން ބޭނުންވަނީ މި މަސައްކަތް ނިންމައި މި މަސައްކަތް އައްޑޫ ރައްޔިތުންނަށް ކޮށްދޭ ފަރާތަކީ އަރަބް ކޮންރެކްޓާސް ކަމުގައިވުން. އެހެންވީމަ މި އެމްއޯޔޫއާއެކު ހަރަދުތައް އެނގި ކަށަވަރުވުމާއެކު އެއަށް ބޭނުންވާ ހަރަދުތައް އެނގުމާއެކު އީޕީސީ [އިންޖިއަރިން ޕްރޮކިއުމަންޓް އެންޑް ކޮންސްޓަރަކްޝަން ކޮންޓްރެކްޓާސް] އަކަށް ދެވޭނެ. އެހެންވެ އެކަންކުރުމަށް މި މަސައްކަތް ކުރަން މި ސޮއިކުރީ،" މުއްތޮލިބު ވިދާޅުވި އެވެ.