ރާއްޖެ އައިޓީގައި | އިކޯ ޓޫރިޒަމްގެ ވާހަކައަށް ބޭރުގެ ޝައުގުވެރިކަން

ރާއްޖޭގައި މިހާތަނަށް އޮތީ ޓޫރިޒަމްގެ މައިގަނޑު އެންމެ ޕްރޮޑަކްޓަކެކެވެ. ވިއްކަނީ ވެސް އެ ޕްރޮޑަކްޓެވެ. މިހާތަނަށް ޓޫރިޒަމް ޑައިވާސިފައި ވާހަކަ ދެއްކިޔަސް އަމަލީ ގޮތުން ކަމެއް ނުކުރެ އެވެ. އެކަމަކު މިފަހަރު އައިޓީބީއަށް ރާއްޖެ ދިޔައިރު ޓޫރިޒަމްގެ ވަކި ޕްރޮޑަކްޓެއް ހަދަން ރަށެއް ހާއްސަ ކުރިކަން ސަރުކާރުން އޮތީ އިއުލާނު ކޮށްފަ އެވެ. އެއީ އިކޯ ޓޫރިޒަމް ފައްކާ ކުރުމަށް ކޭލަކުނެވެ. މިކަންވީ އައިޓީބީގައި ރާއްޖޭން ބޭއްވި ނޫސްވެރިންގެ ބައްދަލުވުމުގައި ނޫސްވެރިންގެ ބޮޑު ޝައުގުވެރިކަމެއް ލިބުނު ވާހަކައަކަށެވެ. 

ނޫސްވެރިންގެ އެ ބައްދަލުވުމުގައި އެމްއެމްޕީއާރުސީގެ ފަރާތުން ބައިވެރިވެވަޑައިގަތް ޗެއާޕާސަން ނޫރައިން ޖަނާހް ވިދާޅުވި ގޮތުގައި ގިނަ ބައެއްގެ މެދުގައި އެންމެ ޝައުގުވެރިވި އެއް ކަމަކީ ރާއްޖޭން އިކޯ ޓޫރިޒަމް ޕްރޮޑަކްޓެއް ގެންނަން ކުރަމުންދާ މަސައްކަތްތަކާއި ޓޫރިޒަމް ޑައިވާސިފައި ކުރަން ކުރާ މަސައްކަތަކާ މެދު އެވެ.

"ޓޫރިޒަމް ޑައިވާސިފިކުރަން ސަރުކާރުން ކުރާ މަސައްކަތްތަކުގެ މައުލޫމާތު ވެސް ސާފު ކުރި. ހާއްސަކޮށް އިކޯ ޓޫރިޒަމް ގެންނަ ވާހަކައަކީ އެ ބޭފުޅުން [ބޭރުގެ ނޫސްވެރިން] ވަރަށް ޝައުގުވެރިވި ކަމެއް،" އައިޓީބީގައި ހުންނަވައިގެން ނޫރައިން ވިދާޅުވި އެވެ.

އޭނާ ވިދާޅުވީ ނޫސްވެރިންގެ އެ ބައްދަލުވުމުގައި މަޓީއާއި ޓޫރިޒަމް އެހެން އެސޯސިއޭޝަންތައް ބައިވެރިވިއިރު، ޓޫރިޒަމްގެ ގިނަ މައުލޫމާތުތަކެއް އެ ބޭފުޅުން ދީފައިވާ ކަމަށެވެ. މި މައުލޫމާތުތަކާއެކު އެނގިގެން ދިޔައީ ރާއްޖެ ދުނިޔޭގެ އެންމެ ވަރުގަދަ ޓޫރިޒަމް ޑެސްޓިނޭޝަންގެ ގޮތުގައި އޮތް މިންވަރާއި ރާއްޖޭގެ ޓޫރިޒަމްގެ ވަރުގަދަކަން ބޭރުގެ ފަރާތްތަކުން ފާހަގަ ކުރުން ކަމަށެވެ.

ކޭލަކުނު އިކޯ ޓޫރިޒަމަށް - ސަރުކާރުން ވަނީ ކޭލަކުނުގައި އީކޯ ޓޫރިޒަމް މަޝްރޫއު ފަށަނީ، ފްލޯޓިން ރޫމްތަކެއް އަޅަން ނިންމާފަ އެވެ. 

އައިޓީބީގައި މިހާރު ވަޑައިގެން އުޅުއްވާ ޓޫރިޒަމް މިނިސްޓަރު އިބްރާހިމް ފައިސަލް އާއި އެމްއެމްޕީއާރުސީން ވަނީ ދުނިޔޭގެ ޓޫރިޒަމްގެ އިސް ފަރާތްކާއެކު ވެސް ބައްދަލުވުންތައް ބާއްވާފަ އެވެ. މި ބައްދަލުވުންތަކުގެ އިތުރުން ރާއްޖޭގެ ކަނެކްޓިވިޓީ ވަރުގަދަ ކުރަން އިތުރު އެއާލައިންތަކާ ވެސް ވާހަކަ ދެކެވުނު ކަމަށް ނޫރެއިން ވިދާޅުވި އެވެ.

"މި ފަހަރުގެ އައިޓީބީގައި އެމްއޭސީއެލް އިން ބައިވެރި. އެމްއޭސީއެލްގެ އެމްޑީއާއެކު ރާއްޖެއަށް އިތުރު އެއާލައިންތައް ގެނެސް، ކަނެކްޓްވިޓީ ރަނގަޅު ކުރެވިދާނެ ގޮތަކާމެދު ވެސް މަޝްވަރާ ކުރެވުނު،" ނޫރެއިން ވިދާޅުވި އެވެ.

ރާއްޖޭގެ ޓޫރިޒަމް ބޯޑުގެ ފުރަތަމަ އަންހެން ޗެއާޕާސަން ނޫރެއިން ވިދާޅުވީ މި ބައްދަލުވުންތަކުން އެނގިގެން ދިޔައީ ރާއްޖެއަށް އޮތް ޝައުގުވެރިކަން ބޮޑުކަން ކަމަށެވެ.

"ޔޫކޭގެ ބޭފުޅުންނާ ވެސް ދިމާވެ މަޝްވަރާ ކުރެވުނު. ޔޫކޭގެ ގިނަ ޓޫރިސްޓުން ޝައުގުވެރިވޭ ރާއްޖޭގެ ވަން އައިލެންޑް ވަން ރިސޯޓް ކޮންސެފްޓް. އަޅުގަނޑުމެން ޔަގީންކަން ދިނިން މި ކޮންސެޕްޓް ކުރިއަށް ގެންދަން މަސައްކަތް ކުރާކަން،" ނޫރެއިން ވިދާޅުވި އެވެ.

އޭނާ ވިދާޅުވީ އެމްއެމްޕީއާރުސީގެ މެނޭޖުމަންޓާއެކު ރާއްޖޭގެ ޓޫރިޒަމްގެ އެންމެ އިސް ފަރާތްތަކާ ބައްދަލުވެ އެ ބޭފުޅުންގެ ހިޔާލުތައް އެނގިގެން ދިއުމަކީ ލިބުނު ބޮޑު އުފަލެއް ކަމަށެވެ.

"ވަރަށް ގިނަ ހިޔާލުތައް ލިބިގެން ދޭ. އަޅުގަނޑުމެން މަސައްކަތް ކުރަމުން ދާނީ އިންޑަސްޓްރީއާ ގުޅިގެން ކުރިއަށްދާން،" ނޫރެއިން ވިދާޅުވި އެވެ.