ރަށު ޓޫރިޒަމުން ދައުލަތަށް | މާފުށިން 93 މިލިއަން، 5 ރަށުން 19.5 މިލިއަން

މިއީ ޝައުގުވެރި ސުވާލުތަކެކެވެ؛ ރަށު ޓޫރިޒަމް ނުވަތަ ގެސްޓްހައުސް ހިންގާ ރަށްރަށުން އެންމެ ބޮޑު އާމްދަނީއެއް ދައުލަތަށް ޓެކުހުގެ ގޮތުގައި ދައްކަނީ ކޮން ރަށަކުން ހެއްޔެވެ؟ އެ ވިޔަފާރި ފުޅާކޮށް ހިންގާ ރަށްރަށުން ޓެކުހުގެ ގޮތުގައި ދައުލަތަށް އަހަރަކު ކިހާ ފައިސާއެއް ދައްކާ ބާއެވެ؟ 

"މި" ނޫހަށް ލިބިފައިވާ ދައުލަތުގެ ރަސްމީ ހިސާބު ކަރުދާހަކުން އެނގޭ ގޮތުގައި ރާއްޖޭގެ ގެސްޓްހައުސް ވިޔަފާރީގައި އެންމެ ބޮޑު އާމްދަނީއެއް ދައުލަތަށް ދައްކަނީ މާލެ ސިޓީގެ މި ވިޔަފާރި ކުރާ ތަންތަން ނުހިމަނައި ބަލައިފިނަމަ ހަ ރަށަކުންނެވެ. 

އެއީ މާލެ އަތޮޅުގެ މާފުއްޓާއި އއ. ތޮއްޑޫ އަދި އއ. އުކުޅަހުގެ އިތުރުން އދ. ދަނގެއްޗާއި މާލެ އަތޮޅު ހިންމަފުށްޓާއި ވ. ފުލިދޫ އެވެ. 

ތިން ޓެކުހެއްގައި މި ރަަށްތަށުން ޖުމްލަ 112 މިލިއަން ރުފިޔާ ވަނީ މިދިޔަ އަހަރު ދައުލަތަށް ދައްކާފަ އެވެ. މި ހިސާބުތައް ދައްކާ ގޮތުގައި މާފުށި ނުހިމަނައި ބަލާނަމަ މި އަދަދު އުޅެނީ 19.5 މިލިއަން ރުފިޔާގަ އެވެ. މާފުށިން އެކަނި 93 މިލިއަން ރުފިޔާ ދައުލަތަށް ދީފައި ވެ އެވެ. 

މި ހަ ރަށުން މާފުށި ނުލައި ބަލާނަމަ ގްރީން ޓެކުހަށް ދައްކާފައި ވަނީ ފަސް މިލިއަން ރުފިޔާ އެވެ. މާފުށިން އެކަނި މިދިޔަ އަހަރު ގްރީން ޓެކުހަށް 22 މިލިއަން ރުފިޔާ ވަނީ ދައުލަތަށް ދައްކާފަ އެވެ.  

ގެސްޓްހައުސް އައިލެންޑުގެ ގޮތުގައި ސިފަ ކުރާ ކ. މާފުށީގައި ޓޫރިޒަމް މިނިސްޓްރީގެ އެންމެ ފަހުގެ ހިސާބުތައް ދައްކާ ގޮތުގައި ހުރީ 58 ގެސްޓްހައުސް އެވެ. އެ ރަށުގައި ޖުމްލަ 1,922 ޓޫރިސްޓު އެނދު އެބަހުއްޓެވެ. ދެވަނައަށް އެންމެ ގިނައިން ގްރީން ޓެކްސް ދައްކާފައިވަނީ އުކުޅަހުންނެވެ. އެ ރަށުގައި 26 ގެސްޓްހައުސްއާއެކު ޖުމްލަ 386 އެނދު ހުރިއިރު އެ ރަށުން ޖީއެސްޓީއަށް 1.8 މިލިއަން ރުފިޔާ ދައްކާފައިވެ އެވެ. 

ޓޫރިޒަމް ޓެކްސް ނުވަތަ (ޓީޖީއެސްޓީ) ގެ ގޮތުގައި މާފުށި ނުލައި މި ރަށްތަކަށް ބަލާނަމަ ޖުމްލަ ލިބިފައިވަނީ 11.3 މިލިއަން ރުފިޔާ އެވެ. ނަމަވެސް މާފުށިން މިދިޔަ އަހަރު ޓީޖީއެސްޓީގެ ގޮތުގައި 57 މިލިއަން ރުފިޔާ ވަނީ ދައުލަތަށް ދައްކާފަ އެވެ. 

ދެވަނައަށް އެންމެ ގިނައިން ޓީޖީއެސްޓީ ދައްކާފައިވަނީ އުކުޅަހުންނެވެ. އެ ރަށުން 5.1 މިލިއަން ރުފިޔާ ޓީޖީއެސްޓީގެ ގޮތުގައި ދެއްކި އެވެ. 

ޖީއެސްޓީގައި މާފުށި ނުހިމަނައި ފަސް ރަށުން 3.1 މިލިއަން ރުފިޔާ ވަނީ ޖީއެސްޓީއަށް ދައްކާފަ އެވެ. ޖީއެސްޓީގެ ގޮތުގައި ދައުލަތަށް މާފުށިން މިދިޔަ އަހަރު 13 މިލިއަން ރުފިޔާ ދެއްކި އެވެ. އަދި  ދެވަނައަށް އެންމެ ބޮޑު ޖީއެސްޓީއެއް ދައުލަތަށް ދީފައި ވަނީ ދަނގެތިންނެވެ. އެ ރަށުން 1.2 މިލިއަން ރުފިޔާ ޖީއެސްޓީގެ ގޮތުގައި ދެއްކި އެވެ.