ޕީޖީ ޝަމީމަށް ހަމަލާދީ ޒަހަމް ކޮށްލައިފި

ދިވެހި ދައުލަތުގެ ޕްރޮސެކިއުޓާ ޖެނެރަލް ހުސައިން ޝަމީމަށް ތޫނު އެއްޗަކުން ހަމަލާ ދީ އެ މަނިކުފާނު ޒަހަމް ކޮށްލައިފި އެވެ. 

އެ މަނިކުފާނަށް ލިބި ވަޑައިގެންނެވި ޒަހަމްތަކުގެ ތަފުސީލާއި ހާލުކޮޅުގެ ސީރިއަސް ކަމާބެހޭ އެއްވެސް ތަފުސީލެއް ރަސްމީ އެއްވެސް ފަރާތަކުން ސާފު ކޮށްދީފައެއް ނެތެވެ. ނަމަވެސް ޝަމީމްގެ ހާލުކޮޅު ރަނގަޅެވެ. ހަމަލާ ދީފައި ވަނީ ވާތަށެވެ. 

މިއަދު ދިން އެ ހަމަލާއަށް ފަހު އެ މަނިކުފާނު ގެންދަވަނީ އަދިވެސް އޭޑީކޭގައި ފަރުވާ ހޯއްދަވަމުންނެވެ. 

ފުލުހުންގެ އިދާރާއިން މިއަދު ޕީޖީ ބުނީ ޝަމީމަށް މަގުމަތީން ހަމަލާދީފައިވާ ކަމަށް ރިޕޯޓް ކޮށްފައިވާ ކަމަށާއި އޭޑީކޭގައި އެ މަނިކުފާނު ފަރުވާ ހޯއްދަމުން ގެންދަވާއިރު އެ ހަމަލާ ދީފައި ވަނީ ތޫނު އެއްޗަކުން ކަމަށެވެ. 

ހަމަލާ ދިން ފަހުން ޝަމީމްގެ އެހީތެރިއެއް މެދުވެރިކޮށް އެ މަނިކުފާނާ ފޯނުން ކުޑަކުޑަ ވަގުތު ކޮޅަކަށް ގުޅޭ ގޮތްވި އެވެ. އެ ފޯންކޯލުގައި ހަމަ އެކަނި ވިދާޅުވީ ހަމަލާ ދިނީ ގޭ ދޮރުމަތީން ކަމަށެވެ.

އަދި ހަމަލައިގެ ހާދިސާ އައި ގޮތާއި ހަމަލާ ދިނީ ލަކުޑިގަނޑަކުން ކަމެއް ނޫނީ ވަޅިއަކުން ކަމެއް ދަންނަވާން ވެސް ކުއްލިއަކަށް ހަމަލާ އައި ގޮތުން އެނގި ވަޑައި ނުގަންނަވާ ކަމަށެވެ. އަދި ވިދާޅުވީ އަތްޕުޅަށް ލިބި ވަޑައިގެންފައިވާ ޒަހަމާ ބެހޭ ގޮތުން އެއްޗެއް ވިދާޅުވާން އެނގި ވަޑައިގަންނަވާނީ ވެސް ޑޮކްޓަރުން ބައްލަވައި ފަރުވާގެ ކަންކަން ނިމުމުން ކަމަށެވެ.

"ހަމަލާއެއް ދީފި، އަޅުގަނޑު މި އޮތީ އޭޑީކޭގައި. ފަރުވާގެ ކަންކަން ކުރިޔަށް އެބަ ހިނގާ މިތާނގައި،" ވިދާޅުވި އެވެ.

ޝަމީމަށް ދިން ހަމަލާއާ ގުޅިގެން މިހާތަނަށް އެއްވެސް މީހަކު ހައްޔަރެއް ނުކުރެ އެވެ. އެކަމަކު އެ ހަމަލައާ ގުޅޭ ތަހުގީގެއް ފަށާފައިވާ ކަމަށް ފުލުސް އިދާރާއިން ނޫސްތަކަށް ފޮނުވި މެސެޖެއްގައި ބުނެފައި ވެއެވެ. 

އިންޒާރުތައް ލިބުނު ނަމަވެސް ޝަމީމަކީ ހަށި ފާރަވެރިންގެ ގެންގުޅުއްވާ ބޭފުޅެއް ނޫނެވެ. އަދި ރަސްމީ ގަޑި ނިމުމުން މަގުމަތީގައި އުޅުއްވާއިރު ވެސް އެ މަނިކުފާނު އުޅުއްވަނީ ގިނަކަންޏާ ވަރަށް ސާދަކޮށެވެ.