ޖިހާދުގެ ނަމުގައި ހަނގުރާމައަށް ދިއުމުގެ ހުކުމް ހަނދާންކޮށްދީފި

ދާހިލީ ހަނގުރާމަތައް ހިނގާ ގައުމުތަކަށް ޖިހާދުގެ ނަމުގައި ހަނގުރާމައަށް ދިއުމަކީ ހަރާމް ކަމެއް ކަން ފަތުވާ ކައުންސިލުން ހަނދާން ކޮށްދީފި އެވެ.

އެ ކައުންސިލުން މިއަދު ވަނީ ދާހިލީ ހަމަނުޖެހުންތައް ހިނގަމުންދާ އިސްލާމީ ގައުމުތަކަށް ޖިހާދުގެ ނަމުގައި ހަނގުރާމައަށް ދިއުމުގެ ހުކުމުގެ ނަމުގައި 2015 ވަނަ އަހަރު ނެރެފައިވާ ފަތުވާއެއް އަނެއްކާ ވެސް ނެރެފަ އެވެ.

މިފަތުވާ ނެރެފައި ވަނީ ސީރިއާގެ ދާހިލީ ހަނގުރާމައަށް ގޮސް ތިބި 21 މީހަކު ދިވެހި ސަރުކާރުން މިދިޔަ އަންގާރަ ދުވަހު ގެނެސްފައި ވަނިކޮށެވެ. އެ ގައުމުގައި 100 އެއްހާ ދިވެހިން ޖިހާދަށް ގޮސްވެއްޖެ އެވެ. އޭގެ ތެރެއިން 90 މީހަކު ތިބީ އަނބުރާ ރާއްޖެ އަންނަން ބޭނުންވެފަ އެވެ. އަދިވެސް ޖިހާދަށް ދިއުމުގެ ވިސްނުން ގެންގުޅޭ މީހުން ރާއްޖޭގައި އެބަ އުޅެ އެވެ.

އިސްލާމީ ބައެއް ގައުމުތަކުގައި ހިގަމުންދާ ދާހިލީ ހަމަނުޖެހުންތަކަކީ، އިސްލާމީ ގައުމުތަކާ ދެކޮޅަށް ރޭވިފައިވާ ސިލްސިލާ މުއާމަރާތުތަކެއްގެ ބޮޅުތަކުގެ ތެރެއިން ބޮޅެކެވެ. އިސްލާމީ ގައުމަކަށް ނިސްބަތްވާ ބަޔަކު ޖިހާދު ކުރުމުގެ ނަމުގައި ހަމަނުޖެހުން ހިނގަމުންދާ އިސްލާމީ ގައުމަކަށް ދިއުމަކީ މުސްލިމުންގެ ދުޝްމަނުންގެ ކުރިމަތީގައި އިސްލާމީ ގައުމުތަކުގެ ކަންތައްތަކާ ބެހުމަށް ދޮރު ހުޅުވިގެންދާނެ ކަމެކެވެ.

ފަތުވާގައި އިތުރަށް ބުނެފައި ވަނީ، ދާހިލީ ހަނގުރާމަ ހިނގަމުންދާ ސޫރިޔާ ފަދަ ގައުމުތަކުގައި ޖިހާދު ކުރަން ބޭނުންވާ އެ ގައުމުގެ ޒުވާނުން އެބަ ތިބި ކަމަށެވެ. މި ޒުވާނުންނަކީ ވަރަށް ރަގަޅަށް ތަމްރީނު ލިބިފައިވާ އެކަމަށް ގާބިލު ބައެއް ކަމަށެވެ. އެމީހުން އެދެނީ އެމީހުންނަށްޓަކައި ދުއާ ކޮށްދިނުމަށެވެ. މިއަދު ހާލަތު އޮތް ގޮތުން އިތުރު ބަޔަކު އެމީހުން ގާތަށް ދިއުމަށް އެމީހުން ނޭދޭ ކަމަށެވެ. 

އިސްލާމީ ބައެއް ގައުމުތަކުގައި ހިނގަމުންދާ މި ހަމަނުޖެހުމަކީ އިސްލާމީ އުއްމަތާ ކުރިމަތިވެފައިވާ ފިތުނައެކެވެ. ފިތުނައެއް ކުރިމަތިވުމުން އަމަލު ކުރާނެ ގޮތް ކީރިތި ރަސޫލާ ބަޔާންކުރައްވާފައިވެ އެވެ. އޭގެ ތެރޭގައި ހިމެނެނީ އެކަމުން ސަލާމަތްކޮށް ދެއްވުމަށް އެދި ދުއާ ކުރުމާއި، އެކަމަށް ކެތްތެރިވުމާއި، ބައިބައި ނުވުމާއި، އުއްމަތުގެ ވަހްދަތަށްޓަކައި މަސައްކަތް ކުރުން ފަދަ ކަންކަމެވެ.