މުއިއްޒު ވެރިކަމުން ބާލަން ތައްޔާރުތޯ އާޒިމް އައްސަވައިފި
ދަ ޑިމޮކްރެޓްސް އިން ސަރުކާރާ ދެކޮޅަށް ނުކުމެފައިވާއިރު ކުރީގެ ރައީސް އިބްރާހިމް މުހައްމަދު ސޯލިހު ވެސް އިއްޔެ އެކްސްގައި ޕޯސްޓެއް ކުރައްވާ އިންޑިއާ ދިފާއު ކުރެއްވި އެވެ.
މިވަގުތު ރާއްޖެ އާއި އިންޑިއާއާ ދެމެދު އުފެދިފައިވާ ނުތަނަވަސް ކަމާ ގުޅިގެން، ޑރ. މުހައްމަދު މުއިއްޒުގެ ސަރުކާރާ ދެކޮޅަށް ދަ ޑިމޮކްރެޓްސް އިން ނުކުމެއްޖެ އެވެ.
މައްސަލަ ޖެހުނީ އިންޑިއާގެ ލަކްޝަދީބުގެ ރަށްތަކުގައި ޓޫރިޒަމް ކުރިއަރުވާ ޗުއްޓީ ހޭދަ ކުރަން އެ ރަށްތައް ހިޔާރު ކުރުމަށް އިންޑިއާގެ ބޮޑުވަޒީރު ނެރެންދުރަ މޯދީ އެ ގައުމުގެ ރައްޔިތުންނަށް ގޮވާލެއްވުމާ އެކު ރާއްޖޭގެ ޓޫރިޒަމާ ދެކޮޅު ޝުއޫރުތަކާއެކު އިންޑިއާގެ ރައްޔިތުން ތެދުވުމުންނެވެ.
އެޔާއެކު ސަރުކާރުގެ އިސް މަގާމުތަކުގައި ތިބި ބައެއް ބޭފުޅުން، މޯދީއަށް ނިސްބަތްކޮށް އެކްސްގައި ބައެއް ޕޯސްޓްތައް ކޮށްފައިވެ އެވެ. އެންމެ ގިނަ ބަޔަކަށް އަޅައިގަތީ ޔޫތު މިނިސްޓްރީގެ ނައިބުންގެ ގޮތުގައި ތިއްބެވި މަލްޝާ ޝަރީފާއި މަރިޔަމް ޝިއުނާ ކުރެއްވި ޕޯސްޓެވެ. ޝިއުނާ ވަނީ މޯދީ އަކީ "ޖޯކަރެ" އް ގެ ގޮތުގައި ސިފަ ކުރައްވާ އެއީ "އިޒްރޭލްގެ ޕަޕެޓެ" އް ކަމަށް ވިދާޅުވެފަ އެވެ. ޝިއުނާ މިފަދައިން ވިދާޅުވީ ރައީސް މުއިއްޒުގެ ފޮޓޯތަކަކާއެކު މުއިއްޒަކީ "ޗައިނާގެ ޕަޕެޓެ" އް ކަމަށް ބުނެ އިންޑިއާ ބަޔަކު ޕޯސްޓް ކުރުމުންނެވެ.
މިކަމާ ދެކޮޅަށް އިދިކޮޅު ސިޔާސީ ޕާޓީތަކުން ތެދުވެފައިވާއިރު، ދަ ޑިމޮކްރެޓްސްގެ ޕާލަމެންޓްރީ ގްރޫޕްގެ ލީޑަރު، އަލީ އާޒިމް ވަނީ މި ސަރުކާރު ބަދަލު ކުރަން ރައްޔިތުން ތައްޔާރަށް ތިބިތޯ ސުވާލު ކުރައްވާފަ އެވެ.
އާޒިމް އެކްސްގައި ކުރެއްވި ޕޯސްޓެއްގައި ވިދާޅުވެފައި ވަނީ، އަވަށްޓެރި ގައުމުތަކުގެ މެދުގައި ގުޅުގައި ބަދަހިކޮށް، ގައުމުގެ ހާރިޖީ ސިޔާސަތުތައް ދަމަހައްޓަން މަސައްކަތް ކުރުމަކީ އެ ޕާޓީގެ އަސާސެއް ކަމަށެވެ. އެ އަސާސާއި ރައީސް ޑރ. މުހައްމަދު މުއިއްޒުގެ ސަރުކާރުން ހިލާފުވެފައިވާ ކަމަށް ވިދާޅުވި އެވެ.
"ޑރ. މުއިއްޒު މަގާމުން ވަކި ކުރުމަށް އަޅަން ޖެހޭ ކޮންމެ ފިޔަވަޅެއް އެޅުމަށް ތިޔަބޭފުޅުން ތައްޔާރުތޯ؟ ރައީސްގެ އިތުބާރު ނެތް ވޯޓް ނަގަން އެމްޑީޕީން އޮތީ ތައްޔާރަށްތޯ؟" އާޒިމްގެ ޕޯސްޓްގައި ލިޔުއްވާފައި ވެއެވެ.
އާޒިމް މިއަދު މި ސަރުކާރު ބަދަލު ކުރަން ގޮވާލާފައިވާއިރު، ސަރުކާރުގެ އިސްވެރިން މޯދީއާ ދެކޮޅަށް ކުރެއްވި ޕޯސްޓްތަކާ ދެކޮޅަށް ކުރީގެ ރައީސް މުހައްމަދު ނަޝީދު ވެސް ވަނީ ޕޯސްޓެއް ކުރައްވާފަ އެވެ. އަދި އެ ޕާޓީއަށް ނިސްބަތްވާ ގަލޮޅު އުތުރު ދާއިރާ މެމްބަރު އީވާ އަބްދުﷲ އިއްޔެ ވަނީ އިންޑިއާގެ ނިއުސް ޗެނެލްއަކަށް އިންޓަވިއު ދެއްވަމުން އެކަމަށް އިންޑިއާގެ ރައްޔިތުންގެ ކިބައިން މާފަށް ވެސް އެދިވަޑައިގެންފަ އެވެ.
ދަ ޑިމޮކްރެޓްސް އިން ސަރުކާރާ ދެކޮޅަށް ނުކުމެފައިވާއިރު ކުރީގެ ރައީސް އިބްރާހިމް މުހައްމަދު ސޯލިހު ވެސް އިއްޔެ އެކްސްގައި ޕޯސްޓެއް ކުރައްވާ އިންޑިއާ ދިފާއު ކުރެއްވި އެވެ.
ކޮމެންޓް
އެމް.ޑީ.ޕީ އާއި ޑިމޮކްރެޓްސް އަކީ އިންޑިޔާގެ ފައިބުޑުގަ ދޫލާ އަޅުކުދިން. އެމީހުންނަށް ކެތެއް ނުވާނެ ރާއްޖެ އަމިއްލައަށް ހިންދެމިލާ ، ޕްރޯމޯލްޑިސް ބޭފުޅަކު ރާއްޖެ ލީޑް ކުރާކަށް. ތިމާ މެންނަށް ލިބޭ ކަޓާ، ކާޕެޓާ ނުލިބޭނެދޯ.....
Republic of Maldives