އަމީނީ މަގުގެ ފަހު ދެ ސެގްމެންޓްގައި މިއަދު ތާރު އަޅަން ފަށާނެ

މާލޭގެ އަމީނީ މަގުގެ ނުނިމި އޮތް ބައިގައި މިއަދު ތާރު އަޅަން ފަށާނެ އެވެ. އަމީނީ މަގުގައި ނުނިމި އޮތީ މަގުގެ އެންމެ ފަހު ދެ ސެގެމެންޓްގެ މަސައްކަތެވެ. 

އިންފްރާ މިނިސްޓަރު އަބްދުﷲ މުއްތޮލިބު މިއަދު ވިދާޅުވީ އެ މަގުގެ ނުނިމި އޮތް ބަައިގައި ތާރު އަޅަން ތައްޔާރު ވެފައިވާ ކަމަށެވެ. 

"އިރާދަ ކުރެއްވިއްޔާ [އަމީނީ މަގުގެ ނުނިމި އޮތް ބައިގައި] ތާރު އެޅުމުގެ މަސައްކަތް މިއަދު ފެށިގެން ދާނެ،" މިނިސްޓަރު ވިދާޅުވި އެވެ. 

ރައީސް ޑރ. މުހައްމަދު މުއިއްޒުގެ ސަރުކާރު ފެށި އިރު އަމީނީ މަގުގެ މަސައްކަތް އޮތީ އެންމެ ފަހު ދެ ސެގެމެންޓާ ހަމައިން މަސައްކަތް ހުއްޓިފަ އެވެ. އެ މަގުގެ ނުނިމި އޮތް ބައި ގެ މަސައްކަތް ރޯޑް ޑިވެލޮޕްމެންޓް ކޯޕަރޭޝަނުން ފެށީ މިދިއަ ޑިސެމްބަރު މަހުގެ ނުވަ ވަނަ ދުވަހު އެވެ. 

އަމީނީމަގު ހެދުމުގެ މަސައްކަތް ކުރިއަށް ގެންދަނީ ޖުމްލަ 13 ސެގްމަންޓަކަށް ބަހާލައިގެންނެވެ. އެ މަޝްރޫއުގައި 1.79 ކިލޯ މީޓަރުގެ މަގު ހެދުން ހިމެނެ އެވެ. މި މަސައްކަތް ސަރުކާރުން ރޯޑް ޑިވެލޮޕްމަންޓް ކޯޕަރޭޝަނާ ހާވާލު ކުރީ 84.4 މިލިޔަން ރުފިޔާ އަށެވެ. 

ކުރީގެ ރައީސް ސޯލިހްގެ ވެރިކަމުގައި ފެށި އެ މަސައްކަތް ސަރުކާރު ނިމުނު އިރު ވެސް ނުނިންމުނެވެ.