އިންތިހާއަށް ލޯބިވީމާ – އެޕިސޯޑް 51

- އެޕިސޯޑް 51 –

ކޮޓަރި ތެރޭގައި އޮތް ސަމާގެ އަތް ދަބަސް ނަގައިގެން އޭނާ ގެއިން ނުކުންނަން ހިނގައިގަތެވެ. ސަމާގެ ހަރަކާތްތައް އަވަސް ވެފައިވާ އިރު، އޭނާ ހުރީ އޭނާގެ ބޯމަތީގައި އޮތް ބޮޑު ބިރުވެރިކަމުން ސަލާމަތް ވާނެ ގޮތެއް އިންތިހާއަށް ބޭނުން ވެފައެވެ. ރިޝްފާއާ ދިމާ ކުރުން ނޫން އިތުރު އެއްވެސް ގޮތެއް ސަމާއަށް މިއަދު އޮތް ނަމަ، އޭނާ މިފަދަ ގަޑިއެއްގައި ބޭރަކަށް ނުނިކުންނާނެއެވެ. ސަމާއަށް ލިބިގެން ދިޔަ އިންޒާރުތަކާ އެކު، ބަޔަކު އޭނާއަށް ފާރަލާކަން އެނގި ހުރެ އޭނާ ނެގީ ރިސްކެކެވެ. ގޭގައި އަތް އުރާލައިގެން އޮއްވާ ކަންތައްތައް ގޯހުން ގޯހަށް ގޮސްދާނެ ތީއެވެ.

ސަމާ ގެއިން ނުކުމެގެން ހިނގާފައި ދިޔައީ ހަލުވި ހިނގުމެއްގައެވެ. ގެއެއްގެ ފާރެއްގެ ނިވަލުގައި ހުރި މާއިޒް މަޑުމަޑުން މަގުމައްޗަށް ނުކުމެލިއެވެ. މާއިޒްއަށް މިއިން ދުވަހެއްގައި ވެސް ސަމާ އެހާ ބާރަށް ހިނގާފައި ދިޔަތަން ފެނިފައެއް ނުވެއެވެ. ސަމާ ފެންނަ ކޮންމެ މީހަކަށް އޭނާގެ ހަރަކާތްތަކުން އޭނާ އުޅެނީ ވަރަށް ހާސްވެގެންކަން ޔަޤީން ވާނެއެވެ. ސަމާގެ ހިތުގެ ހިނގުން ބާރުވެފައިވާ އިރު، ސަމާއަށް ލެވެމުން ދިޔައީ މާނޭވާއެެވެ.

"މަންޖެ ހުރިހާ ކަމެއް ރަނގަޅުތަ؟" ސަމާ ކާރަށް އެރުމާއެކުގައި ޑްރައިވަރ ފަހަތަށް އެނބުރި ހައިރާންކަމާއި އެކު ބަލައިލީ ފަހަތު ސީޓުގައި އިށީން ސަމާގެ މޫނަށެވެ. ސަމާ އާނއެކޭ ބުނާ ފަދަ ގޮތަކަށް ބޯޖަހާލަމުން، ދާންވީ ތަން ބުނެލިއެވެ. ކާރުގެ ގޮޑީގައި ރަނގަޅަށް ހަމަޖެހިލަމުން ސަމާ ފުންކޮށް ނޭވާއެއް ދޫކޮށްލިއެވެ. ބޯ ރަނގަޅަށް ޖައްސާލައިގެން ދެލޯ މަރާލިއެވެ. އެގަޑީ ވެސް ސަމާގެ ބޮލަށް އަރައިފައިވާ ރިހުމެއްގެ ބޮޑު ކަމުން އޭނާއަށް އުނދަގޫ އިޙްސާސެއް ވުން ނޫން އިތުރު ކަމެއް ނުވިއެވެ.

ސަމާ ދަތުރު ކުރަމުން ދިޔަ ކާރަށް ފާރަލަމުން މާއިޒް ގެންދިޔައެވެ. މާއިޒް ނުފެންނާނެހާ ދުރުމިނެއް ބަހައްޓައިގެން އޭނާ ސައިކަލްގައި ދުއްވަމުން ދިޔަ އިރު، އޭނާގެ ހިތަށާއި ސިކުނޑިއަށް ދިޔައީ ލައްކަ އެއްޗެހި ވަންނަމުންނެވެ. މާއިޒްގެ ޙަޔާތުގައި ރިޝްފާ އަކީ އޭނާއަށް އައު ނަމެއް ނޫނެވެ. ރިޝްފާގެ ނަމާ އެކުގައި މާއިޒްގެ ޚިޔާލުތައް އަނބުރާލަނީ ބިރުވެރި ކަމެއްގެ ތެރެއަށެވެ. ހަނދާން ކުރަން ބޭނުން ނުވާ މާޒީއަކަށެވެ. ލޯމައްޗަށް އަދިވެސް އެ ލޭތައް ސިފަވެއެވެ. މެއިން ބުރައިގެން ދިޔަ ލޭތައް އައީ ސީދާ މާއިޒްގެ މޫނަށެވެ. ވަޅި ހިފަހައްޓާލައިގެން މާއިޒް އެރޭ ދިން ހަމަލާ، އޭނާގެ ހަނދާނުން ދުވަހަކުވެސް ފިލައިގެން ނުދެއެވެ. ނަމަވެސް ރިޝްފާގެ ނަމާ އެކުގައި އެ މަންޒަރުތައް މާ ބޮޑަށް ވެސް ސާފު ވެއްޖެއެވެ. އެ މަންޒަރު ކުލަވެ، އިއްޔަ ވީ ކަމެއްހެން މާއިޒަށް އެ ފިކުރުތައް އުނދަގޫ ކުރިއެވެ.

***

ހައިކަލް މަޑުމަޑުން ހިނގާފައި އައިސް އިށީންނީ ނާޝިދުގެ ގާތުގައެވެ. އެވަގުތު ވެސް ނާޝިދު އޭނާގެ ބޮލުގައި އަތް އަޅުވާލައިގެން އިނެވެ. ނާޝިދު އިނީ އިންތިހާއަށް ދެރަވެފައެވެ. ނާޝިދުގެ ސިކުނޑީގައި އެނބުރެމުން ދިޔައީ ފަޔާޒްއާ ދެތޭރޭގައި ކަންތައް ވެގެން ދިޔަ ބޭއިންސާފު ގޮތެވެ. އެފަކީރު ކުރިހާ އާދޭސްތަކަށް ދުނިޔެ ދިނީ ބީރު ކަންފަތެވެ. އޭނާގެ ހައްޤުގައި ނުކުންނަން ދުނިޔެ ހިމޭންވިއެވެ. އުސޫލާ ޤާނޫނުން ކުށެއް ނެތް އިންސާނަކަށް ބޮޑު އަދަބެއް ދިނީއެވެ. ވަލުއީ ޤާނޫނަކީ އެންމެ މައުސޫމް މީހާ ވެސް ކުށްވެރިކަށް ހެދިދާނެ ފަދަ ގޮތަކަށް ފަރުމާކޮށްފައިވާ ޤާނޫނެއް ތާއެވެ. މިހުރިހާ ގޮންޖެހުމަކަށް ފަސް ނުޖެހި ކެރިގެން ނުކުތީ ހަމައެކަނި ނާޝިދެވެ. ފަޔާޒްގެ އޭރުގެ އަނބިމީހާ ވެސް އެރީ އޭނާއާ ދެކޮޅަށެވެ.

އެކަނި މާއެކަނި ވެސް ނާޝިިދު ހިތްވަރު ދޫކޮށް ނުލައެވެ. ފަޔާޒަށް ކުރި ގަދަ އިތުބާރުން ހުރިހާ ކަމެއްގެ ޙަޤީޤަތް ހޯދަން ފެށި ދަތުރު ނާޝިދު ނިންމާލީ ރަން ވަނަ ހޯދައިގެންނެވެ. މިއީ މުޅި ދުނިޔެއަށް ލާމަސީލު މިސާލެކެވެ. އިތުބާރުގެ އެހެން ގިންތިއެކެވެ. ނާޝިދަށް ސިހިފައި ހައިކަލަށް ބަލައިލެވުނީ، ހައިކަލް އޭނާގެ އަތް ނާޝިދުގެ ކޮނޑުގައި ބާއްވާލުމާއެކުގައެެވެ. ނާޝިދުގެ ކެތްތެރިކަން ކޮޅުން ލީއެވެ. ހައިކަލްގެ ގައިގައި ނާޝިދު ބައްދައިގަތުމާއި އެކު އޭނާއަށް ފެށުނީ ރޯން ށެވެ. އުފަލާ ހިތާމައިގެ ކަރުނައެވެ. ނާޝިދަށް ލިބޭ އެންމެ ބޮޑު އުފަލަކީ ނާޝިދުގެ ހިތްވަރުން އެކަނި މާއެކުނި ނުކުމެ ފަޔާޒްގެ ކުށެއް ނެތްކަން ސާބިތު ކުރެވުނީމައެވެ. އެއީ ނާޝިދު އެކަމަކަށް ތާއަބަދު އުފާކޮށް، މާތްﷲއަށް ޝުކުރު ކުރާނެ ކަމެކެވެ.

ނާޝިދުގެ ބުރަކަށީގައި ހައިކަލް ފިރުމަމުން ނާޝިދުގެ ހިތްވަރުގަދަ ކަމާއި، އެކުވެރިއަކަށް ތި ވީ މަތިވެރި ޤުރުބާނީއާ މެދުގައި ފަޚްރުވެރިވާކަމަށް ބުނެ ނާޝިދަށް ތަޢުރީފް ކުރަމުން ގެންދިޔައެވެ. ނާޝިދު ފަދަ ހެޔޮ، ރަނގަޅު ރައްޓެއްސެއް ލިބުނީތީ ހައިކަލް މިއަދު އުފާވާ ކަމަށް އޭނާ ބުންޏެވެ. އެގޮތުގައި ހައިކަލް ވާހަކަދައްކަމުން ދަނިކޮށް ކުއްލިއަކަށް އޭނާގެ ފޯނު ރިންގް ވާން ފެށިއެވެ. ގުޅަމުން ދިޔައީ ނިއުޝާއެވެ.

"ނިއުޝާ އެބަ ގުޅާ!" ހައިކަލް ބަލައިލީ ނާޝިދަށެވެ. ނާޝިދު އެދުނީ ފޯނަށް ޖަވާބު ދޭށެވެ.

"ހައިކަލް.. އަހަރެން ބަނޑަށް ތަދުވަނީ.. ބަނޑަށް ރިއްސަނީ.. ވިހަން ކަންނޭނގެ މިއުޅެނީ.. އަޅެ އާދެބަލަ މިގެއަށް ވަރަށް އަވަހަށް.." ނިއުޝާ ވާހަކަދެއްކީ ވޭނީ ރާގެއްގައެވެ. ނިއުޝާގެ އަޑުން އޭނާއަށް ވެފައިވާ ތަދު ހައިކަަލަށް އިޙްސާސްވި ފަދައެވެ.

"ހައިކަލް ދޭ! ހޮސްޕިޓަލަށް ގެންދެވޭތޯ ބަލާ.. އަހަރެން ކުޑަކޮށް ރެޑީ ވެލައިގެން ދާނީ ފަޔާޒްގެ ގާތަށް.." ނާޝިދު ސޯފާއިން ތެދުވިއެވެ. ހައިކަލް އަވަސް ހިނގުމެއްގައި އެގެއިން ނުކުތެވެ. ނިއުޝާގެ ގެއަށް ދިޔުމަށެވެ.

***

ލެމަންގްރާސް ރެސްޓޯރެންޓާ ތަންކޮޅެއް ދުރުގައި ހުރި މާއިޒްގެ ކަޅި ހުއްޓިފައި ވަނީ ސަމާ އިން ޓޭބަލްއަށެވެ. ސަމާގެ ގާތުގައި އިން އަންހެން މީހާ މާއިޒަށް ފެންނަނީ ފަހަތުންނެވެ. މަގުމަތިން އެ މަންޒަރު ބަލަން ޖެހުމުން އުނދަގޫތަކާ މާއިޒަށް ޖެހުނީ ކުރިމަތިލާށެވެ. ނަމަވެސް އެއީ ކާކުތޯ ބަލާފަ ނޫނީ މިއަދު އެއްވެސް ކަމެއް ކުރަން މާއިޒް ބޭނުން ނުވާ ފަދައެވެ. ކިތަންމެ އިރަކު ހުންނަން ޖެހުނަސް، މިއަދު މާއިޒް ހުރީ މަޑު ކުރާ ގޮތަށެވެ.

ގާތް ގަނޑަކަށް 1 ގަޑި އިރު ފަހުން މާއިޒަށް ފެނުނީ ސަމާ އާއި އެ އަންހެން މީހާ ކޮޅަށް ތެދުވި ތަނެވެ. ހަމަ އެއާއި އެކު، އެ ދެމީހުން މިސްރާބު ޖެހީ އެތަނުން ނުކުންނާށެވެ. މާއިޒަށް ދެލޯ ބޮޑުކޮށްލެވުނެވެ. ހައިރާން ކަމާއި އެއްވަރަށް މާއިޒްގެ ރުޅިގަނޑު ދެގުނަ ވެގެން ދިޔައެވެ. އެއި ހަމަ އެ ރިޝްފާއެވެ. ސަމާ އާއި ރިޝްފާ ވެސް ހުރީ މާސްކް އަޅައިގެންނެވެ. އެ މާސްކާ އެކުގައި ވެސް ހައިކަލަށް ރިޝްފާ އެއް ނޯޅުނެވެ. ރިޝްފާގެ ލޮލާއި ބުމަ އާއި، ނިތްކުރިން އެއީ ރިޝްފާކަން މާ ބޮޑަށް ވެސް މާއިޒަށް ޔަޤީން ވިއެވެ. އައި ރުޅިން މާއިޒް ދަތްކުނޑި ވިކާލިއެވެ. (ނުނިމޭ)